فوتو: ۇلتتىق ۇلان
پەتروپاۆل قالاسىندا وتكەن كونفەرەنتسياعا وتاندىق جانە شەتەلدىك جوعارى وقۋ ورىندارىنىڭ پروفەسسور-وقىتۋشىلار قۇرامى, كۋرسانتتار مەن ستۋدەنتتەر قاتىستى. اسكەري سالاداعى اقپاراتتىق قاۋىپسىزدىك جۇيەسىن جەتىلدىرۋدى كوزدەيتىن شارادا اسكەري ءبىلىم بەرۋ جۇيەسىنە تسيفرلىق تەحنولوگيالاردى ءتيىمدى ەنگىزۋ, الەۋمەتتىك جەلىلەردەگى مانيپۋلياتسيا, فەيك كونتەنتتىڭ تارالۋى سەكىلدى تاقىرىپتار تالقىلاندى.
شارا بارىسىندا اكادەميانىڭ اسكەري پەداگوگيكا جانە پسيحولوگيا كافەدراسىنىڭ وقىتۋشىلارى پولكوۆنيك بولات سماعۇلوۆ, زاپاستاعى پولكوۆنيك الەكساندر ميتياەۆ جانە پودپولكوۆنيك قازىبەك مۇراتاەۆتىڭ ەلەكتروندى وقۋ قۇرالى تۇرىندەگى ۇجىمدىق ەڭبەگى كوپشىلىك نازارىنا ۇسىنىلدى.
وقۋ قۇرالىندا ۇلتتىق ۇلاننىڭ ستراتەگيالىق كوممۋنيكاتسيالارىن جەتىلدىرۋ جونىندەگى ۇسىنىمدار كەشەنى, ونىڭ ىشىندە ينستيتۋتسيونالدىق, تەحنولوگيالىق جانە ءبىلىم بەرۋ شارالارى قاراستىرىلعان. وقۋ قۇرالى HTML باعدارلاماسى تىلىندە قۇراستىرىلعان جانە «اقپاراتتىق-پسيحولوگيالىق قاراما-قايشىلىق», «جۋرناليستيكا نەگىزدەرى» پاندەرى بويىنشا كۋرسانتتاردى دايارلاۋعا, سونداي-اق جەكە قۇراممەن تاربيە جۇمىسىن جۇرگىزۋ باعىتىن دا قامتىعان.
كونفەرەنتسيادا ۇلتتىق ۇلان اكادەمياسىنىڭ ەكىنشى كۋرس كۋرسانتى يسلام اۋەسحان جاساندى ينتەللەكتتىڭ مەديا ورتاداعى ادام ساناسىنا ىقپالى تۋرالى وزەكتى بايانداما جاسادى.
ول مەديا پلاتفورمالارداعى الگوريتمدەردىڭ پايدالانۋشىلاردىڭ مىنەز-قۇلقىن بولجاۋ مۇمكىندىگىنە توقتالىپ, بۇل ءۇردىستىڭ اقپاراتتىق قاۋىپسىزدىك پەن جەكە كەڭىستىككە اسەرىن سارالادى.
عىلىمي جيىنعا قازاقستان مەن شەت ەلدەردەن 65-تەن استام عىلىمي ەڭبەك كەلىپ تۇسكەن.
جيىن قورىتىندىسىندا ساراپشىلار ۇلتتىق ۇلان اكادەمياسى باستاماسىمەن جۇزەگە اسىرىلىپ جاتقان تسيفرلاندىرۋ باعىتىنداعى عىلىمي زەرتتەۋلەردىڭ جاڭا ساپالىق دەڭگەيگە كوتەرىلگەنىن وڭ باعالادى.
