سۋرەت: egov.kz
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, بيىلعى 1 قىركۇيەكتەگى ەسەپتە ەلىمىزدە مۇگەدەكتىگىمەن ءماج الۋشىلار سانى شامامەن 543,7 مىڭ ادامعا, اسىراۋشىسىنان ايىرىلعان جاندار 184,1 مىڭ ادامعا جەتكەن.
مۇگەدەكتىگى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبىنا, سەبەبىنە بايلانىستى سارالانادى. سونداي-اق ءتيىستى قارجى ءار جىلعا ارنالعان «رەسپۋبليكالىق بيۋدجەت تۋرالى» زاڭدا بەلگىلەنگەن ەڭ تومەن كۇنكورىس دەڭگەيىنە قاراي ەسەپتەلەدى.
اسىراۋشىسىنان ايىرىلعان جاندارعا مەملەكەتتىك الەۋمەتتىك جاردەماقىلاردىڭ مولشەرى قايتىس بولعان اسىراۋشىنىڭ قامقورلىعىنداعى ادامداردىڭ سانىنا, قايتىس بولۋ سەبەپتەرى مەن ەڭ تومەن كۇنكورىس دەڭگەيىنە بايلانىستى بولادى.
بۇدان باسقا, مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا الەۋمەتتىك تاۋەكەلدەر تۋىنداعان جاعدايدا ماسق-دان الەۋمەتتىك تولەمدەر اۋدارىلادى. ماسەلەن, بيىلعى 1 قىركۇيەككە دەيىن 97 مىڭ ادام ەڭبەك ەتۋ قابىلەتىنەن ايىرىلعانى ءۇشىن, 65,9 مىڭعا جۋىق وتباسى اسىراۋشىسى قايتىس بولعاندىقتان, الەۋمەتتىك تولەم العان.
تولەمدەردىڭ مولشەرى كەيىنگى ەكى جىلداعى ماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىس, ەڭبەككە قابىلەتتىلىگىنەن ايىرىلۋ كوەففيتسيەنتتەرى, اسىراۋىنداعى ادامدار سانى, مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى مەن تابىستى اۋىستىرۋىنا قاراي بەلگىلەنەدى. بۇل تولەمدەر رەسپۋبليكالىق بيۋدجەتتەن بەرىلەتىن وزگە الەۋمەتتىك جاردەماقىلارعا قوسىمشا اۋدارىلادى.
مۇگەدەكتىككە, سونداي-اق اسىراۋشىسىنان ايىرىلعاندارعا تولەنەتىن مەملەكەتتىك الەۋمەتتىك جاردەماقىلاردىڭ مولشەرى 2025 جىلعى 1 قاڭتاردان باستاپ, ەڭ تومەن كۇنكورىس دەڭگەيىنىڭ ۇلعايۋىنا بايلانىستى 6,5%-عا ءوستى. ۇكىمەتتىڭ شەشىمىمەن ەڭبەككە قابىلەتتىلىگىنەن ايىرىلعاندارعا جانە اسىراۋشىسى قايتىس بولعان جاندارعا ماسق-دان تولەنەتىن تولەمدەردىڭ مولشەرى دە 6,5%-عا ارتتى. ايتالىق, بيىل جالپى سىرقاتى مەڭدەپ, مۇگەدەكتىك ساناتىنا وتكەندەرگە مەملەكەتتىك الەۋمەتتىك جاردەماقى مولشەرى ارتتى: ءى توپ ءۇشىن – 101 702, ءىى توپ ساناتىنداعىلارعا – 81 362, ءىىى توپ مۇگەدەكتىگىن العان زاعيپتار ءۇشىن – 55 474 تەڭگە.
بيىلعى 1 قىركۇيەكتەگى ەسەپتە ەڭبەككە قابىلەتتىلىگىنەن ايىرىلعاندارعا بەرىلەتىن الەۋمەتتىك تولەمدەردىڭ ورتاشا مولشەرى 71 468, اسىراۋشىسى قايتىس بولعان وتباسىلارعا بەرىلەتىن جاردەماقى 74 460 تەڭگە بولدى.
