وسى رەتتە عالىمداردىڭ زاماناۋي ازىرلەمەلەرىنىڭ ماڭىزىن اتاپ وتكەن ءجون. جۋىردا ق.ساتباەۆ ۋنيۆەرسيتەتىنىڭ عالىمدارى تابيعي كوزدەردەن الىنعان سۋدى تازارتىپ, زالالسىزداندىراتىن ءارى بەلسەندىرەتىن يننوۆاتسيالىق كوپساتىلى سۇزگى ازىرلەپ شىعاردى. وندىرىسكە دايىن تاجىريبەلىك ۇلگىنى تانىستىرعان عالىمدار پىكىرىنە سۇيەنسەك, ءامباباپ سۇزگى تازا سۋ الۋدى بارىنشا ارتتىرادى.
جوبا عىلىم جانە جوعارى ءبىلىم مينيسترلىگى عىلىم قورى مەن بيزنەس قاۋىمداستىعىنىڭ قولداۋىمەن جۇزەگە اسىپ وتىر. عىلىمي ازىرلەمەنىڭ وندىرىسكە ەنۋىمەن جاڭا تەحنولوگيالاردى قولدانىسقا ەنگىزۋ ارقىلى سۋ قاۋىپسىزدىگىن كۇشەيتۋگە بولادى. جوبا جەتەكشىسى, ينجەنەر-ەكولوگ, PhD ۇمبەتالى سارسەمبين اۋىزسۋدى كوپساتىلى وڭدەۋگە ارنالعان كوپفۋنكتسيونالدى «اكۆاكوز» قوندىرعىسىنىڭ وندىرىستىك ەرەكشەلىگىن ايتىپ بەردى.
«بۇل تەحنولوگيا ءۇش كەزەڭنەن تۇرادى. ەڭ الدىمەن سۇزگىلەۋ مەن سوربتسيا جاساۋ ءۇردىسى ارقىلى مەحانيكالىق جانە ورگانيكالىق قوسپالار جويىلادى. سودان كەيىن وزونداۋ ۇدەرىسى جۇرەدى. ونىڭ بارىسىندا سۋ قۇرامىنداعى ميكرواعزالار جويىلىپ, سۋعا انتيوكسيدانتتىق قاسيەت بەرەدى. سوڭعى كەزەڭدە اۋىر مەتالدار مەن لاستاعىش قالدىقتار جويىلادى. ناتيجەسىندە, تاپ-تازا جانە قاۋىپسىز سۋ الىنادى», دەيدى ءۇ.سارسەمبين.
«اكۆاكوز» قوندىرعىسى – سۋدىڭ تابيعي مينەرالدىق قۇرامىن ساقتاي وتىرىپ تازارتادى. سۇزگى ارقىلى تازارتىلعان سۋدىڭ دەنساۋلىققا پايداسى دا زور. سۇزگىدەن وتكەن سۋدىڭ قىشقىلدى-توتىقسىزدانۋ پوتەنتسيالى –130-150 مۆ-قا دەيىن جەتەدى. بۇل كورسەتكىش سۋدىڭ بيواكتيۆتىلىگىنىڭ كورىنىسى. ال سۋدىڭ pH دەڭگەيى 7,4-كە تەڭ.
جاڭا قۇرىلعىنى تۇرعىن ۇيلەردە جانە اۋىلدىق ەلدى مەكەندە, مەديتسينالىق مەكەمەدە, تاماق ونەركاسىبىندە جانە توتەنشە جاعدايلاردا قولدانۋعا بولادى.
الماتى
