جاڭادان سالىنعان كەشەن ۋاقىت سۇرانىسىنا ساي بوي كوتەرگەنىن ايتا كەتكەن ءجون. كەشەن اۋماعىندا اۋداندىق ارحيۆ, بالالار مەن جاسوسپىرىمدەر ورتالىعى, كىتاپحانا بار. سونىمەن قاتار فۋتبول الاڭى, ۆولەيبول جانە باسكەتبول ويناۋعا ارنالعان پاركەت تە قاراستىرىلىپتى.
ءوڭىر باسشىسى ەربول قاراشوكەەۆتىڭ ايتۋىنشا, جەرگىلىكتى جۇرتتىڭ يگىلىگى ءۇشىن قولعا الىنعان ىلكىمدى جوبالار ارمەن قاراي دا جالعاسپاق. اسىرەسە اۋداندار مەن اۋىلداردا الەۋمەتتىك نىساندار مەن كەشەندەردى سالۋدىڭ ماڭىزى زور.
جاڭادان سالىنعان بالالار مەن جاسوسپىرىمدەر ورتالىعى اۋىل بالالارىنىڭ قوسىمشا ءبىلىم الۋىنا مۇمكىندىك تۋعىزباق. سونداي-اق مۇنداعى ماماندار جاسوسپىرىمدەردىڭ جەكە قىزىعۋشىلىقتارىن دامىتۋعا بارىنشا كومەكتەسەدى.
رەسمي دەرەككە جۇگىنسەك, جالپى اۋماعى 311 شارشى مەتردى قۇرايتىن جاڭا نىسان 150 ادامعا ارنالعان ەكەن. عيماراتتا 4 وقۋ جانە 3 اكىمشىلىك بولمە قاراستىرىلعان. مۇندا «School Media – جاس ءتىلشى», «كومپيۋتەرلىك ساۋاتتىلىق جانە 3D كەسكىندەۋ», «جانتانۋ – پسيحولوگيا», سونداي-اق «Energy club – كۇش پەن سەرگەكتىك» ۇيىرمەلەرى جۇمىس ىستەيدى. بۇدان بولەك, ينتەرنەت-كافە بار.
ەكى قاباتتى جاڭا كىتاپحانادا جەرگىلىكتى تۇرعىنداردىڭ رۋحاني سۇرانىسىن قاناعاتتاندىرۋ ءۇشىن بارلىق جاعداي جاسالىپتى. مۇندا جالپى وقىرماندارعا, بالالار مەن جاسوسپىرىمدەرگە ارنالعان بولىمدەر, ەلەكتروندى وقۋ زالى, ارنايى ءماجىلىس زالى, زاعيپ جاندارعا ارنالعان ارنايى كابينەت جانە كىتاپ قورىن تولىقتىرۋ مەن وڭدەۋ ءبولىمى بار. ال رۋحانيات ورداسىندا 46 800 كىتاپ ساقتالعان. ۋاقىت وتكەن سايىن مۇنداعى كىتاپ قورىنىڭ تولىعا تۇسەتىنىنە ەشكىمنىڭ كۇمانى جوق.
جەرگىلىكتى جۇرت بۇل اۋماقتان جاڭا ارحيۆ نىسانىنىڭ سالىنعانىنا قۋانىپ وتىر. اۋداندىق ارحيۆ عيماراتى ەكى قاباتتان تۇرادى. ءبىرىنشى قاباتتا ءبىر قويما مەن ەكى قۇجات قابىلداۋ بولمەسى ورنالاسقان. ەكىنشى قاباتتا قويما, كونفەرەنتس-زال جانە جەتى قىزمەتتىك كابينەت بار.
«بۇعان دەيىن ارحيۆ سالاسىنا, ناقتى ايتقاندا اۋدان تاريحىنا قاتىستى قۇجاتتار ىڭعايلاستىرىلعان عيماراتتا ساقتالىپ كەلدى. بار بولعانى ەكى بولمەدە مىڭداعان قۇجات ورنالاستى. ال بۇگىننەن باستاپ زامان تالابىنا ساي سالىنعان ەڭسەلى جاڭا عيماراتقا كوشىپ وتىرمىز», دەيدى اۋداندىق ءارحيۆتىڭ ديرەكتورى كەلسىنكۇل كۇلەكەەۆا.
وبلىس اكىمى ەربول قاراشوكەەۆ مۇنداعى سپورت الاڭدارىن ارالاپ كورىپ, اۋىل سپورتىن وركەندەتۋگە ۇلەس قوسىپ جۇرگەن جەرگىلىكتى جاستارمەن جۇزدەسىپ, ولارعا ارنايى ەستەلىك سىيلىق تابىستادى.
«اۋىلىمىز ۋاقىت وتكەن سايىن كوركەيىپ كەلەدى. بۇگىن مۇندا جاڭا عيماراتتار بوي كوتەردى. سپورت الاڭدارى اشىلىپ, حالىق يگىلىگى ءۇشىن بەرىلىپ جاتىر. مۇنىڭ ءبارى جەرگىلىكتى اتقارۋشى بيلىك وكىلدەرىنىڭ بىزگە جاساعان قولداۋى مەن قامقورلىعى دەپ تۇسىنەمىز.
مۇندا سپورتشىلاردىڭ الاڭسىز جاتتىعۋىنا بارلىق جاعداي قاراستىرىلعان. ەندى ءبىز وسى جەردە جاتتىعۋ ارقىلى ۇلكەن جارىستاردان ولجالى ورالۋعا كۇش سالامىز. جەرگىلىكتى جاستارعا وسىنداي جاعداي جاساپ وتىرعان ازاماتتارعا العىستان باسقا ايتارىمىز جوق», دەيدى جاس ۆولەيبولشى بالاۋسا قوناقباي.
جامبىل اۋدانىندا باستاۋ العان ىرگەلى جوبا الداعى ۋاقىتتا ءوڭىرىمىزدىڭ وزگە دە ايماقتارىندا جالعاساتىنىنا ەشكىمنىڭ كۇمانى جوق. ويتكەنى ءوڭىر باسشىسى اۋىل تۇرعىندارىنىڭ تالاپ-تىلەگىن نازاردان تىس قالدىرمايتىنىن ايتىپ وتىر.
جامبىل وبلىسى
