وبلىستىق توتەنشە جاعدايلار دەپارتامەنتىنىڭ يميدجدىك جۇمىس جانە سىرتقى كوممۋنيكاتسيالار توبىنان حابارلاعانداي, اتاۋلى ايالداما №14 ءورت ءسوندىرۋ بولىمىنە تاياۋ ورنالاسقان. ال ايالدامانى جابدىقتاۋ ءۇشىن 1988 جىلى ارنايى ماقساتتاعى قولدانىستان شىعارىلعان ءورت ءسوندىرۋ اۆتوكولىگى پايدالانىلعان.
«بۇل جوبانى ىسكە اسىرۋعا اتىراۋ قالاسىنداعى №14 ءورت ءسوندىرۋ ءبولىمىنىڭ قۇتقارۋشىلارى باستاماشى بولدى. ەسكى كولىك ءبىر ايدا قايتا وڭدەلىپ, ايالداما رەتىندە قۇراستىرىلدى», دەپ حاباردار ەتتى دەپارتامەنتتىڭ يميدجدىك جۇمىس جانە سىرتقى كوممۋنيكاتسيالار توبىنان.
ەرەكشە ايالداما الىستان قاراعاندا, ءورت ءسوندىرۋ كولىگى تۇرعانداي اسەر بەرەدى. ايالدامانىڭ اتاۋى – «قۇتقارۋشى». بۇل جازۋدىڭ ۇستىڭگى بولىگىنە 112 ءنومىرى جازىلعان. ءورت ءسوندىرۋ قىزمەتى تۋرالى اقپارات بەرىلگەن.
«بۇل, بىرىنشىدەن, ەسكى كولىكتى قايتا پايدالانۋ ارقىلى ەكولوگيالىق مادەنيەت پەن سانا قالىپتاستىرۋ, ەكىنشىدەن, توتەنشە جاعداي كەزىندە ەرگە ءتان ەرەكشە ارەكەتپەن جۇمىس ىستەيتىن ءورت سوندىرۋشىلەر ەڭبەگىن ناسيحاتتاۋ. قوعامدىق كولىكتى كۇتۋگە ىڭعايلى, ءارى كۇننىڭ ىستىعى مەن جەلدەن قورعايدى. بالالار مەن جاسوسپىرىمدەرگە قاۋىپسىزدىك تەحنيكاسى مەن قۇتقارۋشىلار قىزمەتى تۋرالى وي سالىپ, قىزىعۋشىلىعىن تۋدىرادى», دەدى دەپارتامەنت وكىلى.
تۇرعىندار بۇل ايالدامانى فوتو-ۆيدەوعا ءتۇسىرىپ, الەۋمەتتىك جەلىگە جۇكتەپ جاتىر. ءتىپتى بالالارىن ايالدامانىڭ جانىندا سۋرەتكە تۇسىرەتىندەر دە كوبەيدى.
اتىراۋ وبلىسى
