كۇن مەن جەلدىڭ, سۋدىڭ تابيعي قۋاتىن ءتيىمدى پايدالانۋ ارقىلى ايماق اتقامىنەرلەرى ەكولوگيالىق تازا ءارى تۇراقتى ەنەرگەتيكالىق جۇيە قالىپتاستىرۋدى ماقسات ەتكەن.
وبلىس اكىمدىگىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى عالىم يساقوۆتىڭ ايتۋىنشا, ءوڭىردىڭ تابيعي جاعدايى بالامالى ەنەرگيا كوزدەرىن وندىرۋگە ەرەكشە قولايلى. سول سەبەپتى جامبىل جەرى ينۆەستورلار نازارىن وزىنە كوبىرەك اۋدارىپ وتىر.
قازىرگى كەزدە جالپى قۋاتى 571,3 مەگاۆاتت بولاتىن جيىرما ەكى نىسان جۇمىس ىستەپ تۇر. ولاردىڭ قاتارىندا التى سۋ ەلەكتر ستانتسياسى, ون جەل ەلەكتر ستانتسياسى جانە التى كۇن ەلەكتر ستانتسياسى بار.
بيىلعى توعىز ايدىڭ وزىندە وبلىستا 602,1 ميلليون كيلوۆاتت ساعاتتان استام ەلەكتر ەنەرگياسى وندىرىلگەن. سوڭعى ءتورت جىل ىشىندە وبلىستا بىرنەشە ءىرى جوبا جۇزەگە اسىرىلدى. سونىمەن قاتار قۋاتى 100 مەگاۆاتت بولاتىن «جاڭاتاس» جەل ەلەكتر ستانتسياسى ىسكە قوسىلىپ, وبلىس ەنەرگەتيكاسىنا تىڭ سەرپىن بەردى. قۇنى 49 ميلليارد تەڭگەنى قۇرايتىن بۇل جوبا ءوڭىردىڭ ەنەرگەتيكالىق تاۋەلسىزدىگىن نىعايتىپ, جاڭا جۇمىس ورىندارىنىڭ اشىلۋىنا جول اشتى.
2021 جىلى «تاسوتكەل» سۋ قويماسىنداعى ەكىنشى كەزەڭدى قامتىعان سۋ ەلەكتر ستانتسياسى پايدالانۋعا بەرىلىپ, قوسىمشا 9,2 مەگاۆاتت قۋات كوزى ىسكە قوسىلدى. كەلەسى كەزەكتە جامبىل اۋدانىندا قۋاتى 50 مەگاۆاتت «AEC ASA» كۇن ەلەكتر ستانتسياسى ىسكە قوسىلدى. تالاس اۋدانىندا دا قۋاتى 13,5 مەگاۆاتت ءۇش جەل ستانتسياسى جۇمىس ىستەي باستادى. بۇل – شەنگەلدى, شەنگەلدى-2 جانە نوۆاتەكس جوبالارى. 2024 جىلى سارىسۋ اۋدانىندا قۋاتى 100 مەگاۆاتت شوقپار جەل ەلەكتر ستانتسياسى تولىق ىسكە قوسىلدى. ءوڭىردىڭ تابيعي الەۋەتىن ەسكەرگەن شەتەلدىك كومپانيالار دا بۇل باعىتقا ايتارلىقتاي قىزىعۋشىلىق تانىتىپ وتىر. مويىنقۇم اۋدانىندا فرانتسيانىڭ «Total Eren» كومپانياسى قۋاتى ءبىر گيگاۆاتت بولاتىن ءىرى جەل ەلەكتر ستانتسياسىن سالۋدى جوسپارلاۋدا.
جوبا 2028 جىلى اياقتالماق. سارىسۋ مەن تالاس اۋداندارىندا بىرىككەن اراب امىرلىكتەرىنىڭ «Masdar» كومپانياسى ءدال وسىنداي قۋاتتاعى تاعى ءبىر جوبانى ىسكە اسىرۋدى قولعا العان. نىسان 2029 جىلى پايدالانۋعا بەرىلمەك. مۇنداي ءىرى جوبالار ىسكە قوسىلعان سوڭ وبلىستىڭ جالپى جاڭارتىلاتىن ەنەرگيا قۋاتى ەكى جارىم گيگاۆاتتقا دەيىن جەتەدى. بۇل ءوڭىردىڭ ەنەرگەتيكالىق الەۋەتىن ەسەلەپ ارتتىرىپ, قازاقستاننىڭ «جاسىل ەكونوميكا» باعىتىنا ناقتى ۇلەس قوسادى.
2028 جىلعا قاراي وبلىستاعى جەك سانى 24 نىسانعا جەتىپ, جالپى قۋاتى 2,5 گيگاۆاتت بولادى دەپ جوسپارلانىپ وتىر. مۇنداي كورسەتكىش ايماقتى ەنەرگيا قۋاتىمەن قامتاماسىز ەتىپ قانا قويماي, ەكولوگيالىق تۇراقتىلىقتى دا قالىپتاستىرۋعا ۇلەس قوسادى. وبلىستىق ەنەرگەتيكا باسقارماسىنىڭ باسشىسى عالىم يساقوۆتىڭ ايتۋىنشا, بۇل جوبالار ءوڭىردىڭ الەۋمەتتىك دامۋىنا دا وڭ اسەر ەتەدى. جاڭا نىساندار اشىلعان سايىن جەرگىلىكتى حالىققا جۇمىس ورىندارى كوبەيەدى, اۋىل ينفراقۇرىلىمى جاقسارادى, ال تابيعاتقا زيان مەيلىنشە ازايادى.
جامبىل وبلىسى
