فوتو: ەڭبەك جانە حالىقتى الەۋمەتتىك قورعاۋ مينيسترلىگى
بىرجولعى جاردەماقى: 28,5 مىڭ وتباسى قامتىلدى
جىل باسىنان بەرى بالا تۋىنا بايلانىستى بەرىلەتىن بىرجولعى جاردەماقىنى 28,5 مىڭ ادام الدى. بۇل ماقساتقا رەسپۋبليكالىق بيۋدجەتتەن 5,6 ملرد تەڭگە باعىتتالدى.
اتالعان تولەمگە بالا تۋعان, اسىراپ العان نەمەسە قامقورلىققا العان قازاقستان ازاماتتارى, قانداستار جانە ەلىمىزدە تۇراقتى تۇراتىن شەتەلدىكتەر ۇمىتكەر بولا الادى.
2026 جىلدان باستاپ مەملەكەتتىك جاردەماقىلاردىڭ مولشەرى 10 %-عا يندەكستەلدى. بالا تۋىنا بايلانىستى تولەم كولەمى ايلىق ەسەپتىك كورسەتكىشكە (اەك) بايلانىستى بەلگىلەنەدى. قازىرگى مولشەرى مىناداي:
ءبىرىنشى, ەكىنشى, ءۇشىنشى بالاعا – 38 اەك نەمەسە 164 350 تەڭگە;
ءتورتىنشى جانە ودان كەيىنگى بالاعا – 63 اەك نەمەسە 272 475 تەڭگە.
بالا كۇتىمى بويىنشا تولەمدەر
بالا ءبىر جارىم جاسقا تولعانعا دەيىن ونىڭ كۇتىمىنە بايلانىستى اي سايىنعى جاردەماقى الۋعا 2026 جىلعى قاڭتاردا 130,2 مىڭ ادام يە بولدى. بۇل باعىتتا 4,2 ملرد تەڭگە تولەندى.
ەگەر بالا كۇتىمىن جۇزەگە اسىراتىن ادام مىندەتتى الەۋمەتتىك ساقتاندىرۋ جۇيەسىنە قاتىسپاعان بولسا, سونداي-اق اسىراپ العان, قورعانشىلىققا العان نەمەسە وگەي بالالارى بار وتباسىلار دا (ەگەر بالا باسقا اتا-انانىڭ وتباسىندا ەسەپكە الىنباسا) وسى جاردەماقىنى الا الادى.
اي سايىنعى تولەم مولشەرى:
ءبىرىنشى بالاعا – 5,76 اەك نەمەسە 24 912 تەڭگە;
ەكىنشى بالاعا – 6,81 اەك نەمەسە 29 454 تەڭگە;
ءۇشىنشى بالاعا – 7,85 اەك نەمەسە 33 952 تەڭگە;
ءتورتىنشى جانە ودان كەيىنگى بالاعا – 8,90 اەك نەمەسە 38 493 تەڭگە.
جۇمىس ىستەيتىن ازاماتتارعا الەۋمەتتىك تولەم
جۇمىس ىستەيتىن ازاماتتارعا جۇكتىلىككە جانە بوسانۋعا, سونداي-اق جاڭا تۋعان بالانى اسىراپ الۋعا بايلانىستى تابىسىنان ايىرىلعان جاعدايدا ماسق-تان الەۋمەتتىك تولەم قاراستىرىلعان. بۇل تولەم جۇكتىلىك جانە بوسانۋ بويىنشا بەرىلگەن دەمالىستىڭ بارلىق كۇندەرىنە ەسەپتەلەدى. ونىڭ مولشەرى سوڭعى 12 ايداعى ورتاشا ايلىق كىرىسكە جانە ەڭبەككە جارامسىزدىق پاراعىندا كورسەتىلگەن كۇن سانىنا بايلانىستى انىقتالادى.
2026 جىلدىڭ قاڭتار ايىندا اتالعان بىرجولعى الەۋمەتتىك تولەمدى 17,4 مىڭ ادام الدى. جالپى تولەنگەن قاراجات كولەمى 16,8 ملرد تەڭگەنى قۇرادى. ورتاشا تولەم مولشەرى – 1 160 626 تەڭگە.
سونىمەن قاتار بالا ءبىر جارىم جاسقا تولعانعا دەيىن ونىڭ كۇتىمىنە بايلانىستى تابىسىنان ايىرىلعان جاعدايدا ماسق-تان اي سايىنعى الەۋمەتتىك تولەم تاعايىندالادى. بۇل تولەم بالانىڭ تۋعان كۇنىنەن باستاپ ەسەپتەلەدى جانە سوڭعى ەكى جىلدا الەۋمەتتىك اۋدارىمدار جۇرگىزىلگەن ورتاشا ايلىق تابىستىڭ 40 %-ى مولشەرىندە تولەنەدى. ەگىز نەمەسە ودان دا كوپ بالا تۋعان جاعدايدا تولەم ءار بالاعا جەكە-جەكە بەلگىلەنەدى.
«زەينەتاقى, جاردەماقى, ايىپپۇل»: 2026 جىل ەل تۇرعىندارىنا قانداي وزگەرىس اكەلەدى؟
قاڭتار ايىندا بۇل تولەم 16,5 مىڭ ادامعا تاعايىندالىپ, 32,6 ملرد تەڭگە كولەمىندە قارجى تولەندى. اي سايىنعى ورتاشا تولەم 78 294 تەڭگەنى قۇرادى.
مەملەكەتتىك قولداۋدىڭ مۇنداي تەتىكتەرى انا مەن بالانى الەۋمەتتىك قورعاۋدى كۇشەيتىپ, دەموگرافيالىق ءوسىمدى ىنتالاندىرۋعا باعىتتالعان.
