فوتو: اۋىل شارۋاشىلىعى مينيسترلىگى
جۇك جونەلتۋشى – «قاپشاعاي بيداي ونىمدەرى» جشس, ال قىتايلىق يمپورتتاۋشى – Shandong Hi-speed Qilu International Land Port Development Co. Ltd. جەتكىزۋ – اۋىل شارۋاشىلىعى مينيسترلىگى دەلەگاتسياسىنىڭ بەيجىڭگە ساپارى كەزىندە قول جەتكىزىلگەن ۋاعدالاستىقتاردى ىسكە اسىرۋ اياسىندا جۇزەگە اسىرىلىپ وتىر.
كەلىسىم جانە ناقتى ناتيجە
2025 جىلدىڭ قازان ايىندا ازىق-ت ۇلىك كەلىسىمشارت كورپوراتسياسى مەن Shandong Hi-speed Qilu كومپانياسى قازاقستاننان قىتايعا ءداندى, جەم-ءشوپ جانە مايلى داقىلداردى ەكسپورتتاۋ جونىندە كەلىسىمگە قول قويعان ەدى. قۇجات اياسىندا 35,4 مىڭ توننا جەمدىك ۇن جەتكىزۋ جوسپارلانعان. بۇگىنگە دەيىن سونىڭ 22,9 مىڭ تونناسى قىتايلىق تاپسىرىس بەرۋشىلەرگە جونەلتىلدى.
سوڭعى ەكى جىلدا قىتاي نارىعىندا وتاندىق جەمدىك ۇنعا سۇرانىس تۇراقتى تۇردە ارتىپ كەلەدى. وتاندىق وندىرۋشىلەر دە بۇل ۇردىسكە ساي جەتكىزۋ كولەمىن كوبەيتىپ وتىر. 2025 جىلدىڭ قورىتىندىسى بويىنشا كورشى ەلگە ەكسپورتتالعان جەمدىك ۇن كولەمى 2,6 ملن توننادان اسىپ, الدىڭعى جىلمەن سالىستىرعاندا ەكى ەسەگە ۇلعايدى.
ەكسپورتتى قولداۋدىڭ جاڭا تەتىكتەرى
وتاندىق قايتا وڭدەلگەن اگروونىمدى شەتەل نارىعىنا شىعارۋدا ازىق-ت ۇلىك كەلىسىمشارت كورپوراتسياسى ماڭىزدى ءرول اتقارىپ وتىر. 2024 جىلدان بەرى ۇلتتىق استىق وپەراتورى اۋىل شارۋاشىلىعى ونىمدەرىنىڭ ەكسپورتتىق پارتيالارىن شوعىرلاندىرۋ باعدارلاماسىن جۇزەگە اسىرىپ جاتىر. بۇل باستاما ءىرى كولەمدەگى جەتكىزىلىمدەردى قالىپتاستىرۋعا جانە لوگيستيكانى ءتيىمدى ۇيىمداستىرۋعا مۇمكىندىك بەرەدى.
سوڭعى ەكى جىلدا اتالعان باعدارلاما اياسىندا وتاندىق اگرارشىلار شەتەلدىك ساتىپ الۋشىلارعا شامامەن 58 ملن دوللاردىڭ ءونىمىن ەكسپورتتادى. ونىڭ باسىم بولىگى – ءداندى جانە مايلى داقىلدار, كۇنباعىس مايى مەن جەمدىك ۇن.
ازىق-ت ۇلىك كەلىسىمشارت كورپوراتسياسىنىڭ قولداۋىمەن شىعىس قازاقستانداعى وڭدەۋ زاۋىتى قىتايدىڭ Sinograin مەملەكەتتىك كومپانياسىنا كۇنباعىس مايىن جەتكىزىپ, كەيىن سەرىكتەستىك بايلانىسىن ءوز بەتىنشە جالعاستىردى.
وسىلايشا, ۇلتتىق وپەراتور وتاندىق قايتا وڭدەۋشىلەر ءۇشىن سىرتقى نارىققا جول اشىپ, ەكسپورتتاعى اكىمشىلىك جانە لوگيستيكالىق كەدەرگىلەردى ازايتۋعا ىقپال ەتىپ كەلەدى. بۇل – قوسىلعان قۇنى جوعارى ءونىمنىڭ دەربەس ەكسپورتىنا بەرىك نەگىز قالىپتاستىراتىن ماڭىزدى قادام.
قازاقستان الەمنىڭ 70-تەن اسا ەلىنە اۋىل شارۋاشىلىعى ونىمدەرىن ەكسپورتتايدى
