پەتروپاۆلدا «سولتۇستىك قازاقستان» گازەتىنىڭ 95 جىلدىعى اتاپ ءوتىلدى

پەتروپاۆل. 19 اقپان. العاشقى ءنومىرى ومبى قالاسىندا 1920 جىلى اقپاندا «كەدەي ءسوزى» دەگەن اتپەن شىققان بۇگىنگى «سولتۇستىك قازاقستان» گازەتىنىڭ 95 جىلدىعى وبلىستىڭ مادەني-رۋحاني ومىرىندەگى ايتۋلى وقيعا رەتىندە قاراستىرىلىپ, ارنايى جاريالانعان   اپتالىق شەڭبەرىندە اتاپ وتىلۋدە. بۇل تۋرالى egemen.kz ءتىلشىسى حابارلادى. ون توعىزىنشى اقپانداعى تۇتاس سانىندا ەلىمىزدىڭ, ءوڭىردىڭ قوعامدىق-ساياسي ومىرىندەگى ماڭىزدى وزگەرىستەر مەن جان سۇيسىنەرتەر جاقسى ىستەردى, قالىپتاسقان ءىس-تاجىريبەلەردى تالماي ناسيحاتتاپ كەلە جاتقان قازاقستانداعى بايىرعى باسىلىمنىڭ دامۋ تاريحى, ۇلتتىق مىنبەرگە قالاي اينالعانى, قانداي ۇلت تۇلعالارى باسشىلىق جاساعانى, قىزمەت ەتكەنى, قازىرگى شىعارماشىلىق الەۋەتى جايلى كەڭىنەن باياندالعان. «كەدەي ءسوزى, «بوستاندىق تۋى», «كەڭەس اۋىلى», «لەنين تۋى» دەگەن اتاۋلارمەن جارىق كورىپ, ءتىل, ءدىل ماسەلەلەرىن وتكىر كوتەرىپ وتىرعان. ونىڭ قابىرعاسىندا ءار كەزدەرى ماعجان جۇماباەۆ, سماعۇل سادۋاقاسوۆ, قوشكە كەمەڭگەروۆ, ءسابيت مۇقانوۆ, ءماجيت داۋلەتباەۆ, ەلجاس بەكەنوۆ, شاحمەت قۇسايىنوۆ, ءالجاپپار ابىشەۆ, ءابدىلدا تاجىباەۆ, جاقان سىزدىقوۆ, جۇماعالي ساين, ديقان ابىلەۆ, سافۋان شايمەردەنوۆ, تاعى باسقا ەسىمدەرى ەلىمىزگە كەنىنەن تانىس قالامگەرلەر ەڭبەك ەتكەن. مەرەكەلىك نومىردە وبلىس اكىمى ەرىك سۇلتانوۆتىڭ, سولتۇستىك قازاقستان وبلىسىنىڭ قۇرمەتتى ازاماتى, اكادەميك زەينوللا مولدامەتوۆتىڭ, «ەگەمەن قازاقستان» گازەتىنىڭ ۆيتسە پرەزيدەنتى-باس رەداكتورى جانبولات اۋپباەۆتىڭ, ءتىل جاناشىرلارى مەن وقىرمانداردىڭ جۇرەكجاردى قۇتتىقتاۋ-لەبىزدەرى بەرىلگەن. «قىزىلجار-اقپارات» مەدياحولدينگىنىڭ ديرەكتورى, گازەتتىڭ باسشىسى كارىباي مۇسىرمان ارناۋ ماقالاسىندا قىزىلجار جۇرتشىلىعىنىڭ رۋحاني شاڭىراعىنىڭ ەل تاۋەلسىزدىگىنە قالتقىسىز قىزمەتى جونىندە پايىمدى مىسالدار كەلتىرگەن. اپتالىق اياسىندا وبلىستىق اكىمدىكتە رەداكتسيا ۇجىمىن قابىلداۋ, تاڭداۋلى قالام يەلەرىن ماراپاتتاۋ, جەر-جەرلەردە وقىرماندار كونفەرەنتسيالارىن وتكىزۋ, كەزدەسۋلەر ۇيىمداستىرۋ شارالارى كوزدەلگەن. ءومىر ەسقالي. دەرەك, سۋرەت: egemen.kz.