ۇكىمەت باسشىسى بۇقارالىق سپورتتى دامىتۋ باعىتىندا اتقارىلىپ جاتقان جۇمىستارعا توقتالدى.
«مەملەكەت باسشىسى قاسىم-جومارت توقاەۆ بۇقارالىق سپورتتى دامىتۋعا ەرەكشە كوڭىل بولەدى. ۇستەل تەننيسى بۇقارالىق سپورت قوزعالىسىن قالىپتاستىرۋعا جانە سالاماتتى ءومىر سالتىن ناسيحاتتاۋعا ەلەۋلى ۇلەس قوسادى», دەپ اتاپ ءوتتى و.بەكتەنوۆ.
ەلىمىزدە بۇگىندە 260 مىڭنان استام ادام ۇستەل تەننيسىمەن تۇراقتى تۇردە اينالىسادى. ال سالادا 10 مىڭنان استام كاسىبي سپورتشى مەن 400-گە جۋىق جاتتىقتىرۋشى جۇمىس ىستەيدى.
ەل كولەمىندە 20 وڭىرلىك فەدەراتسيا بار, 12 زاماناۋي ۇستەل تەننيسى ورتالىعى, 30 جاڭا بولىمشە جانە 35 مامانداندىرىلعان زال اشىلعان.
سپورتشىلارىمىز حالىقارالىق ارەنالاردا تابىستى ونەر كورسەتىپ ءجۇر. كەيىنگى ەكى جىلدا ولار 85 مەدال جەڭىپ الدى, ونىڭ 31-ءى – التىن. ولاردىڭ اراسىنان وليمپيادا ويىندارىنىڭ قاتىسۋشىسى كيريلل گەراسيمەنكونى, جاستار اراسىنداعى الەم چەمپيونى الان قۇرمانعاليەۆتى, حالىقارالىق تۋرنيرلەردىڭ جەڭىمپازدارى زاۋرەش اكاشەۆا جانە سارۆينوز ميركاديروۆالاردى ەرەكشە اتاپ ءوتۋ كەرەك.
2023 جىلى استانادا العاش رەت ۇستەل تەننيسىنەن ازيا چەمپيوناتى وتكەن ەدى. ەندى 2027 جىلى قازاقستاندا الەم چەمپيوناتىن وتكىزۋ جوسپارلانىپ وتىر.
پرەمەر-مينيستر پرەزيدەنت كۋبوگىنە ارناپ تۋرنير وتكىزۋ وتاندىق سپورتتى الەمدىك دەڭگەيگە كوتەرۋ ماقساتىنداعى ماڭىزدى قادام ەكەنىن جانە مۇندا قازاقستان مەن شەتەلدەردىڭ مىقتى تەننيسشىلەرى باس قوساتىنىن اتاپ ءوتتى.
اشىلۋ سالتاناتىندا حالىقارالىق ۇستەل تەننيسى فەدەراتسياسىنىڭ باس حاتشىسى راۋل كالين دە ءسوز سويلەدى. ول قازاقستاننىڭ تاۋەلسىزدىك جىلدارىنداعى دامۋىنا, ەلدىڭ سپورتتى دامىتۋعا قوسقان ۇلەسىنە وڭ باعا بەردى, سونداي-اق پرەزيدەنت قاسىم-جومارت توقاەۆقا ۇستەل تەننيسىنە قولداۋ كورسەتىپ كەلە جاتقانى ءۇشىن العىسىن ءبىلدىردى.
