- سۇلتان مىرزا, ءسىزدىڭ ويىڭىزشا, قازاقستاننىڭ قازىرگى الەمدەگى گەوساياسي ءرولى قانداي؟
- قازاقستاننىڭ الەمدەگى گەوساياسي ءرولى ەرەكشە. قازاقستان الەم كارتاسىندا ويىپ تۇرىپ ورىن الادى. دۇنيەنىڭ قاق ورتاسىندا ورنالاسقان زايىرلى مەملەكەت. سول سەبەپتى مەن قازاقستاندى «جەردىڭ دىڭگەگى», الەمنىڭ «التىن كوپىرى» دەپ سيپاتتاي الامىن. قازاقستاننىڭ ميسسياسى – وراسان زور. كەيىنگى 5–10 جىلدا بۇل ەل حالىقارالىق دەڭگەيدەگى ماڭىزدى شارالار مەن فورۋمدار, الەمنىڭ وزەكتى ماسەلەلەرىن تالقىلايتىن كەزدەسۋلەر ءجيى ۇيىمداستىردى. دەمەك, قازاقستان الەمدى بىرىكتىرەتىن ورتالىققا اينالدى.
ودان وزگە قازاقستان ساياسات پەن ەكونوميكا سالاسىندا دا ماڭىزدى رولگە يە. ەلدىڭ سارابدال سىرتقى ساياساتى, جۇرگىزىلىپ جاتقان ەكونوميكالىق رەفورمالارى جانە ەلدەردى بىرىكتىرۋ يدەياسى كوپتەگەن مەملەكەتتەرگە ۇلگى. تمد مەملەكەتتەرى مەن تۇركى ەلدەرىن بىرىكتىرۋ يدەياسىنىڭ باستاماشىلارىنىڭ ءبىرى دە قازاقستان بولدى. سول ارقىلى قازاقستان الەمدى بىرلىككە شاقىرىپ, ىنتىماقتاستىققا ۇندەيدى.
مىسالى, جاقىندا استانادا وتكەن دىندەر كوشباسشىلارىنىڭ الەمدىك فورۋمى – ءدال وسى ويىمىزدىڭ ايقىن كورىنىسى. قازاقستان ەشبىر ەلدە بىرىگە الماعان دىندەردى ءبىر ارناعا توعىستىرىپ, گەوساياسي قيىن جاعدايلاردا وزەكتى ماسەلەلەردىڭ شەشىمىن كورسەتتى. بۇل – ەلدىڭ بەيبىتشىلىك پەن كەلىسىمگە دەگەن شىنايى ۇمتىلىسىنىڭ دالەلى.
- تۇركى مەملەكەتتەرى اراسىنداعى ىنتىماقتاستىقتا قازاقستاننىڭ ءرولى قانداي دەپ سانايسىز؟
- تۇركى مەملەكەتتەرى اراسىندا قازاقستاننىڭ ءرولى ەرەكشە. ەل تۇركى الەمىن بىرىكتىرۋ يدەياسىنىڭ باستاماشىسى بولدى. قازاقستاننىڭ ۇسىنعان ماڭىزدى باستامالارى ارقاسىندا باسقا ەلدەر قولداۋ كورسەتىپ, ءىرى جوبالار جۇزەگە استى.
ونىڭ ىشىندە تۇركسوي – تۇركى الەمىنىڭ «التىن كوپىرى». ءبىز ءوز مادەنيەتىمىز, ءتىلىمىز, ءداستۇرىمىز بەن قۇندىلىقتارىمىز ارقىلى بىرىككەن باۋىرلاس ەلدەرمىز. تۇركى ەلدەرى ءبىر الىپ بايتەرەك بولسا, ونىڭ تامىرى قازاقستاننان باستاۋ الادى. ويتكەنى تۇركسوي ۇيىمىن قۇرۋ يدەياسى دا قازاقستاننىڭ ەنشىسىندە. قازاق ەلىنىڭ باستاماشىلىعىمەن 1993 جىلى الماتىدا تۇركسوي ۇيىمىنىڭ, تۇركى مەملەكەتتەرى اراسىنداعى ىنتىماقتاستىقتىڭ نەگىزى قالاندى. بۇل – قازاقستاننىڭ مىزعىماس يدەياسى مەن باستاماسىنىڭ جەمىسى.
- قازاقستان 25 قازان – رەسپۋبليكا كۇنىن اتاپ وتەدى. ەل ءۇشىن بۇل ايتۋلى داتا. ەگەمەندىگىمىزدىڭ, ەلدىگىمىزدىڭ نىشانى. قازاقستان حالقىنا ايتار تىلەگىڭىز بار ما؟
- قۇرمەتتى باۋىرلار! مەن قازاق ەلىن, قازاق حالقىن رەسپۋبليكا كۇنىمەن شىن جۇرەكتەن قۇتتىقتايمىن. بۇل مەرەكە – حالىقتىڭ مەرەكەسى, دەموكراتيا مەن شىنايىلىقتىڭ توعىسقان كۇنى. قازاقستان رەسپۋبليكاسىنىڭ كوك تۋى كوگىمىزدە جەلبىرەي بەرسىن! قازاقستان جاساي بەرسىن!
