دارىندى وقۋشىلارىمىز الەمدەگى ەڭ بەدەلدى 7 وليمپيادادا 27 جۇلدەنى ەنشىلەگەن. ولار 4 التىن, 13 كۇمىس, 10 قولا مەدالعا قول جەتكىزىپ, ەل ابىرويىن اسقاقتاتتى. بۇل – وتكەن جىلعى ناتيجەلەرگە قاراعاندا الدەقايدا جوعارى كورسەتكىش.
وقۋ-اعارتۋ مينيسترلىگى ورتا ءبىلىم كوميتەتىنىڭ توراعاسى قانىبەك جۇماشەۆتىڭ ايتۋىنشا, ۇلتتىق قۇراما حالىقارالىق عىلىمي فيزيكا وليمپياداسىندا (ISPhO) – ءابسوليۋتتى چەمپيون اتانسا, حالىقارالىق گەوگرافيا وليمپياداسىندا (IGeO) كوماندالىق ەسەپتە 2-ورىنعا شىقتى. وعان قوسا, بالقان ماتەماتيكالىق وليمپياداسىندا ۇزدىك ۇشتىكتەن كورىنىپ, First Global Challenge الەمدىك روبوتوتەحنيكا چەمپيوناتىندا ءۇش مارتە جەڭىمپاز اتاندى.
«حالىقارالىق ارەناداعى وقۋشىلارىمىزدىڭ جەتىستىكتەرى دە ماقتان تۇتارلىق. ماسەلەن, استانا قالاسىنىڭ 10-سىنىپ وقۋشىسى نۇرگۇل ەگەنبەرگەنوۆا ازيا فيزيكا وليمپياداسىندا «ەڭ ۇزدىك قاتىسۋشى» اتاندى. ماڭعىستاۋ وبلىسىنىڭ 10-سىنىپ وقۋشىسى رامازان بۋتانتاەۆ ازيا-تىنىق مۇحيتى ايماعىنىڭ «ۇزدىك لينگۆيسى» دەپ تانىلدى. ال شىعىس قازاقستان وبلىسىنىڭ وقۋشىسى الديار امانگەلدى ورتالىق ازيانىڭ «ۇزدىك ينفورماتيگى» اتاعىنا يە بولدى. وسىنىڭ ءبارى وقۋشىلارىمىزدىڭ الەمدىك ارەناداعى بيىك زياتكەرلىك الەۋەتىن كورسەتەدى», دەدى ول.
دارىندى بالالاردى قولداۋعا قاتىستى تاعى ءبىر ايرىقشا ماڭىزدى جاڭالىق – تامىز ايىندا مەملەكەت باسشىسى قاسىم-جومارت توقاەۆ حالىقارالىق وليمپيادا جەڭىمپازدارىمەن اقوردادا كەزدەستى. پرەزيدەنت 7 بەدەلدى حالىقارالىق سايىستا وزا شاپقان 27 جۇيرىكتى ارنايى شاقىرىپ, قابىلدادى. پرەزيدەنت ءاربىر جەڭىمپازدىڭ ارتىندا تۇرعان ۇستازدار مەن اتا-انالاردىڭ ەڭبەگىن ەرەكشە اتاپ ءوتتى. بۇل جۇزدەسۋ جاس تالانتتارعا ۇلكەن شابىت سىيلاعانى راس.
«مەملەكەت باسشىسىنىڭ قولداۋىمەن 2022 جىلدان باستاپ حالىقارالىق وليمپيادا جۇلدەگەرلەرىنە قارجىلاي سىياقى تاعايىندالىپ كەلەدى. اتاپ ايتقاندا, التىن مەدال يەگەرلەرىنە – 1500 اەك-كە دەيىن (5 898 000 تگ); كۇمىس مەدال يەگەرلەرىنە – 1000 اەك-كە دەيىن (3 932 000 تگ); قولا مەدال يەگەرلەرىنە – 500 اەك-كە دەيىن (1 966 000 تگ) سىياقى بەرىلەدى. 2025 جىلى وليمپيادا جەڭىمپازدارى مەن ولاردىڭ تالىمگەرلەرىنە جالپى سوماسى 100 ميلليون تەڭگەدەن استام بىرجولعى سىياقى بەرىلدى. مەملەكەتتىك قولداۋ تەك وقۋشىلارعا عانا ەمەس, ولاردىڭ جەتەكشىلەرىنە دە باعىتتالعان. ەلوردادا وتكەن ء«بىلىم كەلەشەگى: ادال ازامات, كاسىبي مامان» اتتى رەسپۋبليكالىق تامىز كونفەرەنتسياسىندا پرەزيدەنت العاش رەت حالىقارالىق جەڭىمپازداردى دايىنداعان ۇستازدارعا مەملەكەتتىك ناگرادالار تابىس ەتكەنىن دە اتاپ ءوتۋ قاجەت», دەدى قانىبەك جۇماشەۆ.
جيىن بارىسىندا كوميتەت توراعاسى حالىقارالىق زياتكەرلىك كونكۋرستاردا باق سىنايتىن وقۋشىلاردى دايىنداۋعا زەرتتەۋ جانە وقىتۋشىلىق تاجىريبەسى بار عىلىم دوكتورلارى مەن كانديداتتارى, PhD دوكتورلار شاقىرىلاتىنىن اتاپ ءوتتى.
«سونداي-اق, قازىرگى بۋىندى دايارلاۋدا بۇرىن رەسپۋبليكالىق جانە حالىقارالىق وليمپيادالاردا كوك بايراعىمىزدى جەلبىرەتكەن جاس دارىندارىمىزدىڭ ەڭبەگى زور. ولار وقۋشىلارعا وقۋ-جاتتىقتىرۋ جيىندارىن وتكىزىپ, وليمپيادالىق تاپسىرمالاردى شەشۋدى ۇيرەتەدى, ەموتسيونالدى ينتەللەكت, سترەسكە توزىمدىلىك بويىنشا پسيحولوگيالىق ترەنينگتەر وتكىزەدى. مەملەكەت باسشىسى جاستارعا جاعداي جاساۋ مەملەكەتتىڭ باستى مىندەتتەرىنىڭ ءبىرى ەكەنىن اتاپ ءوتىپ, حالىقارالىق وليمپيادا جەڭىمپازدارىن «بولاشاق» باعدارلاماسى بويىنشا وقۋعا جىبەرۋ تۋرالى شەشىم قابىلدادى. وسىلايشا, دارىندى دا تالاپتى جاستارعا قولداۋ ارتا ءتۇستى», دەدى ورتا ءبىلىم كوميتەتىنىڭ توراعاسى قانىبەك جۇماشەۆ.
«دارىن» رەسپۋبليكالىق عىلىمي-پراكتيكالىق ورتالىعى ديرەكتورى عاجدەمبەك تۇرسىنوۆ ءوز بايانداماسىندا مينيسترلىكتىڭ ءبىلىم الۋشىلارعا باستاۋىش سىنىپتان باستاپ جان-جاقتى قولداۋ كورسەتىپ كەلەتىندىگىنە توقتالدى.
«اۋىل وقۋشىلارىنا ارنالعان رەسپۋبليكالىق وليمپياداعا بيىل 125 مىڭنان استام بالا تىركەلدى, بۇل كورسەتكىش وتكەن جىلمەن سالىستىرعاندا 12 مىڭعا ارتىق. اۋىلدىق جەرلەردەگى دارىندى وقۋشىلاردىڭ رەسپۋبليكالىق وليمپيادالار مەن بايقاۋلارعا قاتىسۋى سوڭعى ءۇش جىلدا ون ەسە ءوستى. 2025-2026 وقۋ جىلىندا پرەزيدەنت جولداۋىنا سايكەس ءبىلىم بەرۋ جۇيەسىنە جاساندى ينتەللەكتىنى ەنگىزۋ اياسىندا AEROO Space AI Competition اتتى ينجەنەرلىك جارىس وتكىزىلەدى. بۇل جوبا جاس ۇرپاقتىڭ عىلىمي-شىعارماشىلىق الەۋەتىن ارتتىرۋعا تىڭ سەرپىن بەرەدى. حابار اگەنتتىگىمەن بىرلەسە جۇزەگە اسىرىلعان «XXI عاسىر كوشباسشىسى» ينتەللەكتۋالدىق ويىنى وقۋشىلاردىڭ ەرەكشە قىزىعۋشىلىعىن تۋدىرىپ, بيىل ءوز جالعاسىن تابادى. وسى سايىستىڭ قورىتىندىسى بويىنشا 2025 جىلى ءۇش جەڭىمپاز جوعارى وقۋ ورىندارىنىڭ ءبىلىم گرانتتارىنا يە بولىپ, اقشالاي سىيلىقتارمەن ماراپاتتالدى. سونىمەن قاتار, 2025 جىلدىڭ تىڭ باستامالارىنىڭ ءبىرى - «كەلەشەك مەكتەپتەرى» وقۋشىلارى ءۇشىن روبوتوتەحنيكادان وليمپيادا ۇيىمداستىرۋ. بۇل جوبا ينجەنەرلىك ءبىلىمدى دامىتۋعا جانە وقۋشىلاردىڭ زاماناۋي تەحنولوگيالارعا قىزىعۋشىلىعىن ارتتىرۋعا ىقپال ەتپەك», دەدى ع.تۇرسىنوۆ.
سونىمەن قاتار بريفينگتە «ۇركەر» ءبىلىم بەرۋ ورتالىعى تۋارلى ايتىلدى. زاماناۋي ۇلگىدەگى ورتالىق الماتى قالاسىندا سالىنادى. مۇندا وقۋشىلار حالىقارالىق ستاندارتتارعا سايكەس جاڭا ءبىلىم بەرۋ باعدارلامالارى ارقىلى عىلىمي-زەرتتەۋ جانە شىعارماشىلىق قابىلەتتەرىن شىڭداۋعا مۇمكىندىك الادى. ورتالىقتا ماتەماتيكا, فيزيكا, حيميا, بيولوگيا, ينفورماتيكا سالالارىندا عىلىمي مەكتەپتەر مەن زەرتحانالار, ستارتاپ-ينكۋباتورلار قۇرىلىپ, روبوتوتەحنيكا, جاساندى ينتەللەكت, بيوتەحنولوگيا سياقتى سالالار بويىنشا ءىرى حالىقارالىق كومپانيالارمەن سەرىكتەستىك جوبالار جۇزەگە اسادى. ودان بولەك, مۋزىكا, بەينەلەۋ ونەرى, كينو, تەاتر جانە ۇلتتىق ونەردى دامىتۋعا جاعداي جاسالادى.
«وقۋ-اعارتۋ مينيسترلىگى دارىندى وقۋشىلار مەن پەداگوگتاردى قولداۋعا باعىتتالعان SMART Daryn ۇلتتىق تسيفرلىق پلاتفورماسىن ىسكە قوستى. SMART Daryn بىرىڭعاي تەستىلەۋ جۇيەسىن قالىپتاستىرىپ, وليمپيادالار مەن كونكۋرستاردى تىركەۋدەن باستاپ قورىتىندى ناتيجەلەرگە دەيىنگى بارلىق پروتسەستى اۆتوماتتاندىرادى. جاڭا جوبا وقۋشىلاردىڭ شىعارماشىلىق جانە زياتكەرلىك الەۋەتىن دامىتۋعا, پەداگوگتەردىڭ كاسىبي بىلىكتىلىگىن ارتتىرۋعا, سونداي-اق ءبىلىم بەرۋ پروتسەسىنە زاماناۋي تسيفرلىق تەحنولوگيالاردى ەنگىزۋگە ارنالعان ماڭىزدى قادام. پلاتفورمانىڭ باستى ەرەكشەلىگى – پروكتورينگ جۇيەسىن پايدالانا وتىرىپ وليمپيادالار مەن كونكۋرستاردى ونلاين فورماتتا ۇيىمداستىرۋ. بۇل ءادىس زياتكەرلىك سايىستاردىڭ ءادىل جانە اشىق ءوتۋىن قامتاماسىز ەتەدى. سونىمەن قاتار, SMART Daryn قاتىسۋشىلارعا تاجىريبەلى ترەنەرلەردەن كەڭەس الۋ, ونلاين-وقىتۋ ارقىلى ءبىلىم مەن داعدىلاردى جەتىلدىرۋ, ينتەللەكتۋالدىق جارىستارعا ساپالى دايىندالۋ مۇمكىندىكتەرىن ۇسىنادى», دەدى ورتا ءبىلىم كوميتەتىنىڭ توراعاسى قانىبەك جۇماشەۆ.
