فوتو: اشىق دەرەككوز
2025 جىلدىڭ العاشقى سەگىز ايىندا قازاقستان اۋماعى ارقىلى وتكەن ترانزيتتىك جۇك كولەمى 25,81 ميلليون تونناعا جەتكەن. بۇل وتكەن جىلدىڭ سايكەس كەزەڭىمەن سالىستىرعاندا 3,2 پايىزعا جوعارى كورسەتكىش. مۇنداي ءوسىم ەلدىڭ ترانزيتتىك الەۋەتىن ارتتىرۋ جانە حالىقارالىق كولىك دالىزدەرىن دامىتۋ باعىتىندا قابىلدانعان شارالاردىڭ ناتيجەلى ەكەنىن دالەلدەيدى.
«2025 جىلى قۇرىلىس جانە جوندەۋ جۇمىستارىمەن بارلىق ساناتتاعى 13 مىڭ شاقىرىمعا جۋىق اۆتوجولدار قامتىلدى. ونىڭ ىشىندە 2,2 مىڭ شاقىرىم رەسپۋبليكالىق ماڭىزى بار جولداردى سالۋ جانە رەكونسترۋكتسيالاۋ, 6,6 مىڭ شاقىرىم رەسپۋبليكالىق جەلىنى كۇردەلى جانە ورتاشا جوندەۋ جانە 4,1 مىڭ شاقىرىم جەرگىلىكتى جولداردى جاڭارتۋ جۇمىستارى بار», دەپ حابارلادى ۇكىمەتتىڭ ءباسپاسوز قىزمەتى.
سونىمەن قاتار جىل سوڭىنا دەيىن 6,1 مىڭ شاقىرىمدىق جول جۇمىستارىن اياقتاۋ جوسپارلانعان. سونىڭ ىشىندە 847 شاقىرىمىندا جاڭا قۇرىلىس جانە رەكونسترۋكتسيالاۋ, 2,2 مىڭ شاقىرىمىندا كۇردەلى جانە ورتاشا جوندەۋ, ال 3,1 مىڭ شاقىرىمىندا جەرگىلىكتى ماڭىزى بار جولداردى جوندەۋ جۇمىستارى جالعاسادى.
ايتا كەتەيىك, بيۋدجەت قاراجاتىن ءتيىمدى پايدالانۋ ماقساتىندا ۇزىندىعى 2 مىڭ شاقىرىم بولاتىن 10 جاڭا جول ۋچاسكەسىندە اقىلى جۇيە ەنگىزىلدى. ناتيجەسىندە ەلىمىزدەگى اقىلى كۇرە جولداردىڭ جالپى ۇزىندىعى 3,2 مىڭنان 5,2 مىڭ شاقىرىمعا دەيىن ارتقان.
