رەسپۋبليكا كۇنىنە ورايلاستىرىلعان قۋانىشقا ارنايى كەلىپ قاتىسقان ايماق باسشىسى تۇرعىنداردى قۇتتىقتاپ, جاڭا شاعىن اۋداندا ءجۇرىپ جاتقان قۇرىلىس بارىسىمەن تانىستى.
«استانا» شاعىن اۋدانىندا 154 تۇرعىن ءۇي سالۋ جوسپارلانعان. مۇنداعى الاسا ءۇيدىڭ ءوزى – 5 قاباتتى, ال ەڭ بيىك ءۇي 24 قاباتتى بولادى. تۇرعىن ۇيلەردىڭ جالپى كولەمى 1 ملن شارشى مەترگە جەتەدى. بۇل شامامەن 60 مىڭ ادامدى باسپانامەن قامتاماسىز ەتۋگە مۇمكىندىك بەرەدى. بۇگىنگە دەيىن 10 ءۇيدىڭ قۇرىلىسى اياقتالدى. ەندى بەس قاباتتى 13 ءۇيدىڭ قۇرىلىسى ءجۇرىپ جاتىر.
«پرەزيدەنتتىڭ تاپسىرماسىنا سايكەس, ءار وتباسى قولجەتىمدى ءارى ساپالى باسپاناعا يە بولۋى ءتيىس. باستى مىندەت – ۇيلەردى سالىپ قانا قويماي, حالىققا جايلى ءومىر سۇرۋگە مۇمكىندىك بەرەتىن ورتا قالىپتاستىرۋ. «استانا» جوباسىنىڭ جۇزەگە اسۋى – قوستاناي وبلىسى تۇرعىندارىنىڭ ءومىر ساپاسىن ارتتىرىپ, ولارعا تەك باسپانا عانا ەمەس, سونىمەن بىرگە قاۋىپسىز ءارى زاماناۋي ءومىر ءسۇرۋ ورتاسىن ۇسىنۋعا باعىتتالعان. جالپى, وبلىستاعى تۇرعىن ءۇي قۇرىلىسى جىلما-جىل قارقىن الىپ كەلەدى. مىسالى, 2025 جىلدىڭ باسىنان بەرى 391 مىڭ شارشى مەتر تۇرعىن ءۇي, ياعني 4145 پاتەر سالىندى. جىل سوڭىنا دەيىن 500 مىڭ شارشى مەتر نەمەسە 6,5 مىڭ پاتەر تاپسىرۋ جوسپارلانعان. بۇل كورسەتكىشتەر وڭىردەگى تۇرعىن ءۇي قۇرىلىسىنىڭ جۇيەلى دامىپ كەلە جاتقانىن ايقىن كورسەتەدى», دەدى قۇمار اقساقالوۆ.
«استانا» شاعىن اۋدانىندا زاماناۋي بالاباقشالار, مەكتەپتەر, اۋرۋحانالار, سپورت نىساندارى, ساۋدا جانە ويىن-ساۋىق ورتالىقتارى, دەمالىس ساياباقتارى دا سالىنىپ جاتىر. سونىمەن قاتار, تۇرعىندار ءۇشىن سمارت ايالدامالار, بەينەباقىلاۋ جۇيەسى, كەڭ جولدار, ۆەلوسيپەد جولدارى, اسەم ساياباقتار سالۋ كوزدەلگەن.
قوستاناي وبلىسى
