مەگاپوليستەگى ماراپاتتاۋ راسىمىنە قر مادەنيەت جانە اقپارات ءمينيسترى ايدا بالاەۆا قاتىسىپ, مەملەكەتتىك ماراپاتقا يە بولعان تۇلعالاردى مەرەكەلەرىمەن قۇتتىقتادى.
مينيستر الماتىدا مەديا, ونەر, ارحيۆ جانە كىتاپحانا سالاسىنداعى 61 قىزمەتكەرگە مەملەكەتتىك ناگرادالار تابىستادى.
«مەملەكەت باسشىسى مادەنيەت سالاسىن دامىتۋعا, شىعارماشىلىق ادامدارىن قولداۋعا ەرەكشە كوڭىل بولەدى. كەشە ەلوردادا ءبىر توپ مادەنيەت جانە اقپارات سالاسى مايتالماندارى ماراپاتتالدى. ونىڭ ىشىندە مەرۋەرت وتەكەشوۆا, ايتقالي جايىموۆ, تامارا اسار سىندى ونەر قايراتكەرلەرى «حالىق ءارتىسى» اتاعىمەن ماراپاتتالدى. سونىمەن قاتار, ەلىمىزدى الەمدىك ارەنالاردا تانىتىپ جۇرگەن, بولاشاعىنا ءۇمىت ارتار جاستارىمىزعا دا مەملەكەتتىك ماراپاتتار تابىستالىپ وتىر», – دەدى مينيستر.
بۇگىن ماراپات يەلەرىنىڭ قاتارىندا اباي اتىنداعى قازاق ۇلتتىق وپەرا جانە بالەت تەاترى, م.اۋەزوۆ اتىنداعى قازاق ۇلتتىق دراما تەاترىنىڭ, رەسپۋبليكالىق اكادەميالىق نەمىس دراما تەاترى جانە جامبىل اتىنداعى قازاق مەملەكەتتىك اكادەميالىق فيلارمونياسىنىڭ اكتەرلەرى, رەجيسسەرلەرى, اكىمشىلىك قىزمەتكەرلەرى مەن ساحنا ساڭلاقتارى بار.
ورتالىق مەملەكەتتىك ارحيۆ جانە ءا.قاستەەۆ اتىنداعى مەملەكەتتىك ونەر مۋزەيى ماماندارىنىڭ ەڭبەگى جوعارى باعالاندى. ەل ءباسپاسوزىنىڭ دامۋىنا زور ۇلەس قوسقان «ەگەمەن قازاقستان» گازەتىنىڭ اعا ءتىلشىسى عالىم سۇلەيمەن, «كازاحستانسكايا پراۆدا» گازەتىنىڭ ارداگەر ءجۋرناليسى ەلەنا برۋسيلوۆسكايا, سونىمەن قاتار تەلە جانە راديو سالاسىنىڭ وكىلدەرى دە ەلەۋسىز قالعان جوق.
ماراپاتتاۋ ءراسىمىنىڭ سوڭىندا اباي اتىنداعى قازاق ۇلتتىق وپەرا جانە بالەت تەاترى سوليستەرىنىڭ مەرەكەلىك كونتسەرت بەردى.
سالتاناتتى وقيعا كەزەكتى ءىس-شاراعا ۇلاسىپ, ايدا بالاەۆا «تەاتر جانە سۋرەتشى» سيمپوزيۋمىنىڭ قاتىسۋشىلارىمەن كەزدەستى. وعان قازاقستاننىڭ بەلگىلى سۋرەتشىلەرى, سونداي-اق وزبەكستان, قىرعىزستان, ازەربايجان جانە رەسەيدىڭ ونەر سالاسىنىڭ وكىلدەرى قاتىستى.
