ءىس-شارانىڭ اشىلۋ سالتاناتىنا قالا اكىمىنىڭ ورىنباسارى سارسەن قۇرانبەك قاتىسىپ, بارشا قاتىسۋشىنى ۇلىق مەرەكەمەن قۇتتىقتادى.
«بارشاڭىزدى رەسپۋبليكا كۇنىمەن قۇتتىقتايمىن! بۇل مەرەكە – ەگەمەندىك دەكلاراتسياسىنىڭ قابىلدانعان كۇنى. وسى قۇجاتپەن تاۋەلسىز ەلىمىزدىڭ جاڭا تاريحى باستالدى. الدىڭعى تولقىن اعالار ازات ەلدىڭ ىرگەسىن بەرىك ەتۋ جولىندا ايانباي ەڭبەك ەتتى. ەندىگى ءۇمىت بۇگىنگى جاستاردا. قازاقستاننىڭ بولاشاعى دا سولاردىڭ قولىندا. «بىلىكتى ءبىردى جىعار, ءبىلىمدى مىڭدى جىعار» دەمەكشى, الەمدىك باسەكەدە مەملەكەتتەر ءبىر-بىرىنەن تەك بىلىممەن عانا جارىسقا ءتۇسىپ وزا الادى. جاستار ءبىلىمدى بولسا ەلىمىزدىڭ كەلەشەگى جارقىن. مەملەكەت باسشىسى قازاقستاندى دامىعان الدىڭعى ەلدەردىڭ قاتارىنا قوسۋ ءۇشىن ۇلكەن مىندەت قويىپ وتىر. ولاردى ورىنداۋ, ءبىر جاعىنان جاستارعا دا جاۋاپكەرشىلىك جۇكتەيدى. جاستار بەلسەندى, كوزى اشىق, سانالى دا تاربيەلى بولسا, ونداي قوعام ىزگىلىككە جول باستايدى», دەدى س.قۇرانبەك.
زياتكەرلىك دودانىڭ العاشقى كۇنى ەلىمىزدىڭ 9 وڭىرىنەن – استانا, الماتى قالالارى مەن تۇركىستان, قىزىلوردا, اقتوبە, قاراعاندى, جامبىل جانە باتىس قازاقستان وبلىستارىنان كەلگەن 200-دەن استام پىكىرسايىسشى باس قوستى. تۋرنيرگە ەلىمىزدەگى جەتەكشى جوعارى وقۋ ورىندارىنىڭ ستۋدەنتتەرى مەن پىكىرسايىس قوزعالىسىنىڭ بەلسەندى وكىلدەرى ءوز بىلىمدەرى مەن شەشەندىك شەبەرلىكتەرىن ورتاعا سالدى.
ال ءتۋرنيردىڭ تورەشىلىك قۇرامىندا شىمكەنت قالاسىنداعى ءۇش جوعارى وقۋ ورنىنىڭ تاجىريبەلى پىكىرسايىسشىلارى مەن پىكىرسايىس قوزعالىسىنىڭ اعا بۋىن وكىلدەرى بولدى. بارلىعى 50-گە جۋىق كاسىبي تورەشى پىكىرسايىسشىلاردىڭ ونەرىنە قازىلىق ەتتى.
پىكىرسايىس تۋرنيرىندە جاستار قوعامداعى وزەكتى تاقىرىپتاردى ورتاعا سالدى. ونىڭ ىشىندە تەحنولوگيا, دەموكراتيا, قۇقىقتىق مادەنيەت, ءبىلىم جانە جاستار ساياساتى سەكىلدى تاقىرىپتار بار. وسى تاقىرىپتار بويىنشا قاتىسۋشىلار ءوز كوزقاراستارىن دالەلدەپ, ۇتىمدى ويلارىن ورتاعا سالىپ, شەشەندىك ونەرىمەن جۇرتتى ءسۇيسىندىردى.
ءتۋرنيردىڭ ەكىنشى كۇنى فينالدىق كەزەڭ جالعاسىن تاۋىپ, «تەرەڭ تاريحتان – جارقىن بولاشاققا!» اتتى رەسپۋبليكالىق پىكىرسايىس ويىندارىنىڭ جەڭىمپازدارى انىقتالدى. ايتا كەتۋ كەرەك, ەكى كۇنگە سوزىلعان ينتەللەكتۋالدى دودادا ەلىمىزدىڭ تۇكپىر-تۇكپىرىنەن كەلگەن 123 فراكتسيا اپف جانە لد فورماتىندا ءوزارا باق سىناستى. سوڭعى سىندا الماتى قالاسى مەن تۇركىستان وبلىسىنىڭ ۇزدىك كوماندالارى پىكىرسايىس الاڭىندا جولىعىپ, ناتيجەسىندە, الماتى كومانداسى بايقاۋدىڭ باس جۇلدەسىن يەلەندى. ءوز كەزەگىندە شىمكەنت قالاسى ىشكى ساياسات جانە جاستار ىستەرى جونىندەگى باسقارماسىنىڭ مىندەتىن ۋاقىتشا اتقارۋشىسى زاڭعاربەك ۇسىپاحمەتوۆ پەن «جاستار رەسۋرستىق ورتالىعى» مەكەمەسىنىڭ باسشىسى جانسەرىك جۇمان ۇزدىك فراكتسيالار مەن سپيكەرلەردى قالا اكىمىنىڭ ديپلومىمەن, ەستەلىك سىيلىقتارمەن ماراپاتتالدى.
م.اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتى جاستار ورتالىعىنىڭ ديرەكتورى ەراسىل انارحان ۇلىنىڭ ايتۋىنشا, زياتكەرلىك بايقاۋعا ەلىمىزدىڭ مىقتى پىكىرسايىسشىلارى جينالدى. تۋرنيرگە 120 كوماندا قاتىستى.
«پىكىرسايىستا جاساندى ينتەللەكەتىنىڭ قوعامعا, سونىڭ ىشىندە جاستارعا اسەرى قالاي بولىپ جاتىر دەگەن ساۋال توڭىرەگىندە سايىسشىلار وي تالاستىردى. زۋمەر بۋىنى – ينتەرنەتكە تەلمىرگەن, عالامتوردان شىقپايتىن بۋىن. ولاردىڭ ورنىن الفا بۋىنى الماستىرىپ جاتىر. جاڭا جاس ۇرپاققا جاساندى ينتەللەكتىنى ەرىك قالاۋىنشا بەرىپ قويعان دۇرىس پا, الدە شەكتەگەن ءجون بە دەگەن پىكىر اينالاسىندا سايىسكەرلەر ءبىر-بىرىمەن ءسوز قاعىستىردى. سونىمەن بىرگە جاستار دروپەر ماسەلەسىنە دە جۇرت نازارىن اۋداردى. راسىندا دا ول قوعامنىڭ بۇگىنگى تاڭداعى وزەكتى پروبلەماسى. قارجىلىق ساۋاتتىلىق جونىندە قانشاما جيىن, ترەنينگتەر وتسە دە دروپەرلىككە بارامىن دەپ وت باسىپ قالىپ جاتقان جاستار كوپ. ناعىز قىزىقتى ويىن فينالدا جالعاستى. سايىسكەرلەر ءبىلىم ميگراتسياسى ماسەلەسىن قوزعادى. ول اسىرەسە شىمكەنت قالاسىندا وزەكتى بولىپ تۇر. وقۋشىلار گرانتقا وقۋعا تۇسكەن سوڭ كوپ جاعدايدا ءبىلىم ىزدەپ باسقا وڭىرگە نەمەسە شەتەلگە كەتىپ قالادى. بۇل مەگاپوليستە ينتەللەكتۋالدىق دەڭگەيى جوعارى جاستاردىڭ ازايۋىنا اكەلىپ سوعادى. وسى ورايدا قاتىسۋشىلار شىمكەنتتىك ستۋدەنتتەردىڭ ءبىلىمىن قالاي كوتەرەمىز, «بولاشاق» باعدارلاماسىمەن وقىعان جاستاردى قالاعا قىزمەتكە قالاي تارتامىز دەگەن ۇسىنىس-پىكىرلەرىن ورتاعا سالدى. سايىستا تۇركىستاندىق كوماندا مۇشەلەرى ءبىلىم ميگراتسياسىن رەتتەۋ ءۇشىن ايماقتا ارنايى حاب قۇرىپ, وقىعان جاستاردى سوعان جيناۋ كەرەكتىگىن مالىمدەدى. الماتى قالاسىنىڭ توپ مۇشەلەرى كەرىسىنشە جەكە ۋنيۆەرسيتەتتى كوبەيتىپ, ولارعا اكادەميالىق ەركىندىك بەرۋ قاجەتتىگىنە توقتالدى. ناعىز ءبىلىمدى ستۋدەنتتەر الماتىدا وقيتىنىن ايتىپ, الىپ شاھاردىڭ بۇگىنگى تاڭدا ەلىمىزدى بىلىكتى كادرلارمەن قامتاماسىز ەتۋشى دونور ەكەنىن جەتكىزدى. الماتىدان كەلگەن كوماندا وسى تۋرنيردە جەڭىمپاز اتاندى. باسقا ويىنشىلار دا وسال بولعان جوق», دەدى اۋەزوۆ ۋنيۆەرسيتەتى جاستار ورتالىعىنىڭ باسشىسى.
سونىمەن قاتار ەراسىل انارحان ۇلى پىكىرسايىس ونەرى تەك ادامنىڭ زەيىنىن اشپاي, شەشەندىك سويلەۋ قابىلەتىن دە كۇشەيتەتىنىن جەتكىزدى. شارشى توپتىڭ الدىندا ءسوز باستاۋ قيىن دەمەكشى, ۇلكەن اۋديتوريادا سويلەگەندە ءسوزدىڭ مايىن تامىزىپ, جۇرتتى ءبىر يدەياعا يلاندىرۋدىڭ ءوزى ۇلكەن ونەر. وندا قانشاما ىزدەنىس, ەڭبەك, ۇيقىسىز وتكەن تۇندەر جاتىر. سونداي-اق پىكىرسايىستى دامىتۋ ارقىلى قوعامدا ەلىنە جاناشىر جاستار پايدا بولادى. ستۋدەنتتەر ومىردە بولىپ جاتقان ءتۇرلى ماسەلەلەرگە نازار اۋدارىپ, ولاردىڭ شەشۋ جولدارىن ىزدەۋمەن وتانعا دەگەن سۇيىسپەنشىلىك سەزىمدەرىن وياتادى. ەلدىڭ بولاشاعىنا قىزمەت ەتۋ كەرەك ەكەنىن ەرتە
تۇسىنەدى.
شىمكەنت
