القالى جيىندا ءماجىلىس سپيكەرى وسىدان 35 جىل بۇرىن بارشا قازاقستاندىقتار ءۇشىن تاعدىرشەشتى مانگە يە «ەگەمەندىك تۋرالى» دەكلاراتسيا قابىلدانعانىن اتاپ ءوتتى. سودان بەرگى ارالىقتا ەلىمىز ۇزاق جولدان ءوتتى, بارلىق سالادا زور جەتىستىككە جەتىپ, حالىقارالىق ارەناداعى بەدەلدى مەملەكەتتەردىڭ بىرىنە اينالدى.
– پرەزيدەنت باستاماسىمەن رەسپۋبليكا كۇنىنە جاڭاشا لەپ بەرىلىپ, تاريحي ماڭىزى ايشىقتالا ءتۇستى. بۇل مەرەكە جاڭا قازاقستاننىڭ باستى سيمۆولىنا اينالدى. بۇگىندە ەلىمىز ءوز تاريحىنداعى ماڭىزدى كەزەڭدى وتكەرۋدە. ءبىز اۋقىمدى وزگەرىستەردىڭ كۋاگەرى بولىپ, وعان بەلسەنە اتسالىسىپ ءجۇرمىز. بارلىق ساياسي ينستيتۋت جاڭاردى, قوعام مەن مەملەكەت اراسىنداعى سىندارلى ديالوگ نىعايا ءتۇستى. اشىقتىق پەن سەنىمگە نەگىزدەلگەن وسى وزگەرىستەردىڭ ارقاسىندا وڭ ناتيجەلەرگە قول جەتكىزىپ وتىرمىز,– دەدى ە.قوشانوۆ.
سپيكەر ەل ومىرىندەگى ماڭىزدى ماسەلەلەردى شەشۋدە حالىقتىڭ ازاماتتىق جاۋاپكەرشىلىگى مەن بەلسەندىلىگى ارتقانىن, «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسى ورنىققانىن اتاپ ءوتتى. كوپپارتيالى پارلامەنتتىڭ ءرولى مەن بەدەلى كۇشەيىپ, سىندارلى پىكىرتالاس الاڭىنا اينالعانىن, مەملەكەت باسشىسىنىڭ ساياسي باعدارىن زاڭنامالىق تۇرعىدا قولداۋعا جان-جاقتى اتسالىسىپ جۇرگەنىن جەتكىزدى.
جۋىردا پرەزيدەنت جولداۋىندا كوتەرىلگەن پارلامەنتتىك رەفورماعا توقتالعان ەرلان قوشانوۆ بۇل وزگەرىستەردىڭ ەل بولاشاعىنداعى ءرولى زور ەكەنىن, الداعى تاريحي وزگەرىستەرگە دەپۋتاتتىق كورپۋس بەلسەنە اتسالىسۋى كەرەكتىگىن باسا ايتتى. سونداي-اق كەلەر جىلى ەل پارلامەنتىنە 30 جىل تولاتىنىن, وسى تاريحي كۇن مەملەكەتتىك دەڭگەيدە اتاپ وتىلەتىنىن جەتكىزدى. ءماجىلىس توراعاسى ايتقانداي, بۇل – وتكەنىمىزدى سارالاپ, بۇگىنىمىزدى باعامدايتىن جانە بولاشاق ماڭىزدى بەلەستەردى ايقىندايتىن كەزەڭ.
ءماجىلىس سپيكەرى رەسپۋبليكا كۇنىنە وراي اقوردادا وتكەن سالتاناتتى جيىندا مەملەكەت باسشىسىنىڭ قولىنان «پاراسات» وردەنىن العان ءماجىلىستىڭ قارجى جانە بيۋدجەت كوميتەتىنىڭ ءتورايىمى تاتيانا ساۆەلەۆانى ماراپاتىمەن قۇتتىقتادى.
جيىن سوڭىندا پالاتا توراعاسى بىرقاتار دەپۋتاتتار مەن ءماجىلىس اپپاراتىنىڭ قىزمەتكەرلەرىن مەملەكەتتىك ناگرادالارمەن ماراپاتتادى.
دەپۋتاتتار گۇلدارا نۇرىم, امانجول ءالتاي, مۇرات ەرگەشباەۆ «پاراسات» وردەنىمەن ماراپاتتالدى. قازىبەك الىشەۆ, ۆەرا كيم, ەرلان ستامبەكوۆ, ءماجىلىس اپپاراتى ءبولىم مەڭگەرۋشىسىنىڭ ورىنباسارى مارات ءادىلباي «قۇرمەت» وردەنىن يەلەندى. ءماجىلىس دەپۋتاتتارى تەمىر قىرىقباەۆ, ايتۋار قوشمامبەتوۆ, ناۋرىز سايلاۋباي, يسلام سۇڭقار, ەكس-دەپۋتات ەرجان بەيسەنباەۆ, ءماجىلىس اپپاراتى ءبولىم مەڭگەرۋشىلەرىنىڭ ورىنباسارلارى قارلىعا جۇماتاەۆا, جانات قۋانىشباەۆا جانە سالتانات ستانباەۆا «ەرەن ەڭبەگى ءۇشىن» مەدالىن يەلەندى.
دەپۋتاتتار سنەجاننا يماشەۆا مەن ەرلان بارلىباەۆ – تمد پارلامەنتارالىق اسسامبلەياسىنىڭ مەدالىمەن, سەرگەي پونومارەۆ – «درەۆو درۋجبى» مەدالىمەن ماراپاتتالدى. ءماجىلىس دەپۋتاتتارى ەركىن ءابىل, سەرىك ەگىزباەۆ, ءۇنزيلا شاپاق, ءماجىلىس اپپاراتى ءبولىمىنىڭ مەڭگەرۋشىسى باتىربولات قابوش تمد پارلامەنتارالىق اسسامبلەياسىنىڭ قۇرمەت گراموتالارىن يەلەندى. تمد پارلامەنتارالىق اسسامبلەياسىنىڭ قۇرمەت بەلگىسى دەپۋتات ايان زەينۋللينگە, ۇقشۇ پارلامەنتتىك اسسامبلەياسىنىڭ مەدالى – ءماجىلىس اپپاراتى باسشىسىنىڭ ورىنباسارى بولات كاليانبەكوۆكە, ۇقشۇ پارلامەنتتىك اسسامبلەياسىنىڭ قۇرمەت گراموتاسى – دەپۋتات كونستانتين اۆەرشينگە جانە ءماجىلىس اپپاراتى ءبولىمى مەڭگەرۋشىسىنىڭ ورىنباسارى جانتاس تاسبولاتوۆقا تابىستالدى.
سونىمەن قاتار ءماجىلىس اپپاراتىنىڭ 16 قىزمەتكەرى, ماتەريالدىق-تەحنيكالىق قامتاماسىز ەتۋ باسقارماسىنىڭ 6 قىزمەتكەرى ءماجىلىس توراعاسىنىڭ العىسحاتىنا يە بولدى.
