سەنات توراعاسى ماۋلەن اشىمباەۆ بيىل تاۋەلسىزدىككە جول اشقان جانە مەملەكەتتىك قۇرىلىمنىڭ ماڭىزدى قاعيداتتارىن بەكىتكەن تاريحي قۇجات – ەگەمەندىك تۋرالى دەكلاراتسيانىڭ قابىلدانعانىنا 35 جىل تولىپ وتىرعانىن ايتىپ, رەسپۋبليكا كۇنىنىڭ ماڭىزىنا نازار اۋداردى.
«بيىل ەگەمەندىك تۋرالى دەكلاراتسيانىڭ قابىلدانعانىنا 35 جىل تولىپ وتىر. بۇل قۇجات ەلىمىزدىڭ دەربەس مەملەكەت رەتىندەگى ساياسي جانە قۇقىقتىق نەگىزىن بەكىتتى. قازاقستان ءوزىن تەرريتورياسى بولىنبەيتىن ءبىرتۇتاس مەملەكەت رەتىندە جاريالادى. سوندىقتان رەسپۋبليكا كۇنى ايرىقشا تاريحي ماڭىزعا يە. ۇلتتىق مەرەكەمىز – ەگەمەندىگىمىزدىڭ نىشانى جانە عاسىرلارمەن ولشەنەتىن مەملەكەتتىلىگىمىزدىڭ قايتا جاندانۋىنىڭ جارقىن كورىنىسى. بۇگىندە بۇل كۇن جاڭا مازمۇنمەن تولىعىپ, ۇلتتىق بىرەگەيلىكتى نىعايتا تۇسەتىن مەرەكەگە اينالدى», دەدى م.اشىمباەۆ.
سونىمەن قاتار سەنات توراعاسى مەملەكەت باسشىسى جولداۋدا بەلگىلەپ بەرگەن رەفورمالاردى ساپالى ىسكە اسىرۋدىڭ ماڭىزدى ەكەنىن ايتىپ, پالاتانىڭ وسى باعىتتاعى جۇمىس باعدارىنا توقتالىپ ءوتتى.
«پرەزيدەنت قاسىم-جومارت توقاەۆ بيىلعى جولداۋىندا تسيفرلىق كۇن ءتارتىبىن ىلگەرىلەتۋگە جانە جاساندى ينتەللەكتىنى كەڭىنەن قولدانۋعا باسا ءمان بەردى. باستى ماقسات – جاڭا تەحنولوگيالار ارقىلى ازاماتتاردىڭ ءال-اۋقاتىن ارتتىرۋ, ولاردىڭ ءومىر ءسۇرۋ ساپاسىن جاقسارتۋ جانە ەلدىڭ باسەكەگە قابىلەتتىلىگىن نىعايتۋ. بۇل ادىلەتتى قازاقستان قۇرۋ جولىنداعى ستراتەگيالىق باعداردىڭ لوگيكالىق جالعاسى ەكەنى ءسوزسىز. ولاردىڭ ساپالى ءارى ۋاقتىلى ورىندالۋىن زاڭنامالىق تۇرعىدان قامتاماسىز ەتۋ جولىندا پارلامەنت سەناتى بەلسەندى قىزمەتىن ءارى قاراي دا جالعاستىرا بەرەدى», دەپ م.اشىمباەۆ ارىپتەستەرىن رەسپۋبليكا كۇنىمەن قۇتتىقتادى.
سونداي-اق سەنات توراعاسى مەملەكەت باسشىسىنىڭ تاپسىرماسىمەن بىرقاتار سەناتور مەن اپپارات قىزمەتكەرلەرىنە مەملەكەتتىك ناگرادالاردى سالتاناتتى تۇردە تاپسىردى. ناقتى ايتقاندا, مەملەكەت باسشىسىنىڭ جارلىعىمەن سەناتورلار سۇيىندىك الداشەۆ, جاننا اسانوۆا جانە التىنبەك نۋح ۇلى «پاراسات» وردەنىمەن ماراپاتتالدى. سەنات دەپۋتاتى نۇرلان بەكەنوۆ پەن سەنات اپپاراتىنىڭ باس كونسۋلتانتى سەرىك قاراجان «قۇرمەت» وردەنىمەن, سەنات اپپاراتىنىڭ ءبولىم باسشىلارى الماس دانياروۆ پەن ەلدوس سايلاۋحان جانە سەنات اپپاراتىنىڭ سەكتور مەڭگەرۋشىلەرى زاۋرە ۋاشوۆا مەن راۋشان بازاروۆا «ەرەن ەڭبەگى ءۇشىن» مەدالىمەن ناگرادتالدى. سونىمەن قاتار بىرنەشە دەپۋتاتقا حالىقارالىق پارلامەنتارالىق ۇيىمداردىڭ ماراپاتتارى تابىستالدى.
