فوتو: اقوردا
«زاڭعار ويشىل ءابىش كەكىلباەۆ «وتكەننەن تاعىلىم, ەرتەڭنەن ءۇمىت ىزدەگەندەر عانا ىلگەرى باسا الادى» دەگەن. ءبىز ءار كەزەڭدە ۇلت تاريحىندا وشپەس ءىز قالدىرعان بارلىق مەملەكەت جانە قوعام قايراتكەرلەرىنە قۇرمەت كورسەتەمىز, ولاردى ەشقاشان ۇمىتپايمىز.
سونىمەن بىرگە كەلەشەككە ۇلكەن ۇمىتپەن, زور سەنىممەن قارايمىز, بيىك ماقساتتارعا ۇمتىلامىز. وسى جىلداردا ەلىمىزدىڭ باعىندىرعان بەلەستەرى از ەمەس. ءبىز جەر جۇزىنە ەگەمەن مەملەكەت رەتىندە تانىلدىق. شەكارامىزدى شەگەندەپ, ىرگەمىزدى بەكىتىپ, قاۋىپسىزدىگىمىزدى قامتاماسىز ەتتىك. بىرلىگىمىزدى بەكەمدەپ, تاتۋلىق پەن تۇراقتىلىقتىڭ ارقاسىندا ءتۇرلى سىناقتاردان سۇرىنبەي وتتىك. بۇگىندە جاھان جۇرتى ەلىمىزدىڭ ءوسىپ-وركەندەپ كەلە جاتقانىنا كۋا بولىپ, ءوز قۇرمەتىن كورسەتىپ جاتىر.
الايدا كەمشىلىكسىز, ءمىنسىز جۇمىس بولمايتىنى انىق. ءبىز وتكەننەن ساباق الىپ, ەشكىمگە جالتاقتاماي, ءوز جولىمىزبەن ءجۇرىپ كەلەمىز», دەدى پرەزيدەنت.
مەملەكەت باسشىسى سوڭعى جىلدارداعى ماڭىزدى قادامدارعا توقتالدى.
«سوڭعى جىلدارى حالىقتىڭ ءال-اۋقاتىن ارتتىرۋ ءۇشىن اسا ماڭىزدى قادامدار جاسالدى. 2019 جىلى اۋقىمدى رەفورمالار قولعا الىندى. قازاقستان جاڭا تۇرپاتتى ەل بولۋ جولىنا ءتۇستى.
جالپىحالىقتىق رەفەرەندۋم ارقىلى اتا زاڭىمىزعا تۇزەتۋلەر ەنگىزىلدى. پارلامەنتتىڭ قۇزىرەتى كەڭەيدى, ۇكىمەتتىڭ جاۋاپكەرشىلىگى ارتتى. كونستيتۋتسيالىق سوت قۇرىلدى. ادام قۇقىقتارى جونىندەگى ۋاكىل ينستيتۋتى كونستيتۋتسيالىق مارتەبەگە يە بولدى. بيىل شىلدە ايىنان باستاپ كاسساتسيالىق سوت جۇيەسى ىسكە قوسىلدى, بۇل قوعامىمىزدا ادىلەتتىلىكتى كۇشەيتۋگە جاعداي جاسادى», دەدى مەملەكەت باسشىسى.
«ادىلەتتى قازاقستاندى قۇرۋ جولىندا باسقا دا ناقتى شارالار قولعا الىندى. ازاماتتارىمىز مەملەكەتتىك ماڭىزى بار شەشىمدەر قابىلداۋعا بەلسەندى تۇردە ارالاسا باستادى.
اۋىل, اۋدان جانە وبلىستىق ماڭىزى بار قالا اكىمدەرى تىكەلەي سايلاناتىن بولدى. اۋىل اكىمدەرىنىڭ بارلىعى, ال اۋدان اكىمدەرىنىڭ 25 پايىزى جاڭاردى. وسىلايشا, بيلىك جۇيەسى ايتارلىقتاي وزگەردى.
ەلىمىزدە «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتى ورنىعا ءتۇستى. اشىعىن ايتساق, وسى ايماقتاعى بيلىك جۇيەسىندە مۇنداي اۋقىمدى وزگەرىس ەشقاشان بولماعان.
ءبىز ءبىر ەل بولىپ ساياسي رەفورمانى تابىستى ىسكە اسىرىپ جاتىرمىز, سونىڭ ناتيجەسى رەتىندە قوعامدا تۇبەگەيلى جاڭعىرۋ ۇدەرىسى باستالدى. رەفورمالارىمىزدى جۇزەگە اسىرۋعا بارشا ادامزات ءۇشىن اسا قيىن, كۇردەلى كەزەڭدە كىرىستىك.
پاندەميا, الپاۋىت ەلدەردىڭ سانكتسيالىق تەكەتىرەسى, قالىپتاسقان ساۋدا جولدارىنىڭ بۇزىلۋى, ءتۇرلى قاقتىعىستار مەن سوعىستار الەم ەلدەرىنىڭ دامۋىنا وراسان زور شىعىن كەلتىردى. بۇل جاعدايلار قازاقستانعا دا سالقىنىن تيگىزدى. دەگەنمەن ءبىز قاجەتتى شارالاردى دەر كەزىندە قابىلدادىق. ەكونوميكامىزدىڭ الەۋەتىن ساقتاي وتىرىپ, ونى تىڭ سەرپىنمەن دامىتا تۇستىك.
2019 جىلدان بەرى ەكونوميكامىز 16 پايىزعا ءوستى, بيىل وسى كورسەتكىش شامامەن 137 تريلليون تەڭگە, ياعني 291 ميلليارد دوللار بولادى دەپ كۇتىلۋدە, بۇدان دا اسۋى مۇمكىن. بۇل قازاقستاننىڭ ءبىزدىڭ ايماقتاعى ەڭ ۇلكەن ەكونوميكا ەكەنىن كورسەتەدى. جان باسىنا شاققاندا ىشكى جالپى ءونىم 47 پايىزعا ارتىپ, 14 400 دوللارعا جەتتى. بۇل – تاۋەلسىز مەملەكەتتەر دوستاستىعى ەلدەرى اراسىنداعى ەڭ جوعارى كورسەتكىشتىڭ ءبىرى.
قازاقستاننىڭ التىن-ۆاليۋتا رەزەرۆىنىڭ كولەمى 58 ميلليارد دوللارعا جەتتى. جەتى جىلدا سىرتقى ساۋدا اينالىمى 83 پايىزعا ارتىپ, بۇگىندە 142 ميلليارد دوللار بولدى», دەدى مەملەكەت باسشىسى.
