ەسكە سالا كەتەيىك, جاڭا 2025-2026 وقۋ جىلىندا 83 وقۋ ورداسى جاڭادان اشىلدى, ونىڭ 57-ءسى «كەلەشەك مەكتەپتەرى» ۇلتتىق جوباسى اياسىندا سالىنعان مەكتەپتەر. وسى وقۋ وردالارىنىڭ اربىرىندە نەگىزگى ماقساتتى جۇزەگە اسىرۋعا اتسالىساتىن مىقتى ماماندار جۇمىس ىستەۋى قاجەت. سوندىقتان «كەلەشەك مەكتەپتەرىنىڭ» ماماندارىنا دا كوپتەپ ءمان بەرىلىپ جاتىر.
قر وقۋ-اعارتۋ مينيسترلىگىنىڭ «ورلەۋ» بىلىكتىلىكتى ارتتىرۋ ۇلتتىق ورتالىعى «كەلەشەك مەكتەپتەرى» ۇلتتىق جوباسى اياسىندا مۇعالىمدەردىڭ كاسىبي قۇزىرەتتىلىگىن ارتتىرۋ بويىنشا جۇيەلى جۇمىس جۇرگىزدى. قازىرگى تاڭدا «كەلەشەك مەكتەپتەرىنىڭ» 7 مىڭنان استام مۇعالىمى LMS پلاتفورماسى ارقىلى بىلىكتىلىكتى ارتتىرۋ كۋرستارىنان وتۋدە. وندا بازالىق دەڭگەيدەگى 11 ءپان قامتىلعان: باستاۋىش سىنىپ, قازاق, ورىس جانە اعىلشىن تىلدەرى, ماتەماتيكا, ينفورماتيكا, فيزيكا, حيميا, بيولوگيا, گەوگرافيا جانە تاريح.
باعدارلاما پاندىك ءبىلىمدى نەگىزگى جۇمىسىنان قول ۇزبەي جاڭارتۋ, كاسىبي قۇزىرەتتىلىكتى ارتتىرۋ جانە مۇعالىمدەرگە ادىستەمەلىك قولداۋ كورسەتۋگە باعىتتالعان. سونىڭ ىشىندە, پاندىك ءبىلىمدى تەرەڭدەتۋ, وقىتۋ ساپاسىن ارتتىرۋ, وقۋشىلارمەن ءتيىمدى قارىم-قاتىناس ورناتۋ سىندى باعىتتارعا نازار اۋدارىلدى. الداعى ۋاقىتتا دا پەداگوگتەر باسىم باعىتتار بويىنشا وقىتۋمەن قامتىلاتىن بولادى.
«كەلەشەك مەكتەپتەرىن» باسقارۋ دا تيىمدىلىك پرينتسىپتەرى بويىنشا ۇيىمداستىرىلادى. ديرەكتورلاردى تاعايىنداۋ كەزىندە باسىمدىق ء«بىلىم بەرۋ سالاسىنداعى 1000 وزگەرىس كوشباسشىسى» جوباسىنا قاتىسقان ۇمىتكەرلەرگە بەرىلەتىن بولادى. بۇل جوبا پرەزيدەنتتىك جاستار كادر رەزەرۆىنىڭ ۇلگىسىندە جاسالعان. وندا بولاشاق باسشىلاردى قىزمەتكە تاعايىندالماي تۇرىپ دايىنداۋدى مىندەتتەيتىن حالىقارالىق تاجىريبە نەگىزگە الىنعان. ۇمىتكەرلەر بەس كەزەڭنەن تۇراتىن ىرىكتەۋدەن ءوتىپ, كەشەندى تۇردە وقىتىلادى. وعان قوسا, تالىمگەرلەرمەن جۇمىس ىستەپ, تاعىلىمدامادان وتەدى. مۇنداي ءتاسىل سىني ويلايتىن ءارى وزگەرىستەرگە دايىن باسقارۋشىلاردى قالىپتاستىرۋعا مۇمكىندىك بەرەدى.
2023-2024 جىلى كادرلىق رەۆەرۆكە ەنگەن 583 پەداگوگتىڭ 70 پايىزدان استامى كونكۋرسسىز باسشىلىق قىزمەتكە تاعايىندالدى. 2025 جىلى تاعى 403 ديرەكتور ورىنباسارى رەزەرۆكە قابىلداندى. سونىڭ ناتيجەسىندە, مەكتەپ ديرەكتورلارىنىڭ تاپشىلىعى ءۇش ەسەگە قىسقاردى. اسىرەسە, جاڭا فورماتتاعى «كەلەشەك مەكتەپتەرىنە» باسا نازار اۋدارىلىپ وتىر. بۇگىندە قازاقستان بويىنشا ۇلتتىق جوبا اياسىندا اشىلعان 151 مەكتەپ جۇمىس ىستەيدى. ونىڭ ىشىندە 40 مەكتەپتى ء«بىلىم بەرۋدەگى وزگەرىستەردىڭ 1000 كوشباسشىسى» جوباسىنىڭ رەزەرۆيستەرى باسقارادى. وسىلايشا, بۇل ءبىلىم وردالارى جاڭا ستاندارتتاردى, تسيفرلىق تەحنولوگيالاردى جانە تاربيەلىك باعىتتاعى تاجىريبەلەردى ەنگىزەتىن الاڭعا اينالۋدا.
زەينەپ ماحسۇتوۆا, قر وام ورتا ءبىلىم بەرۋ كوميتەتى توراعاسىنىڭ ورىنباسارى
