سۋرەتتى تۇسىرگەن – ەرلان ومار, «EQ»
تاۋەلسىزدىك تاڭى اتار الدىندا جارىق كورگەن قوس باسىلىم كوپ كەشىكپەي-اق ەلىمىزدىڭ اقپارات كەڭىستىگىنەن ويىپ وتىرىپ ءوز ورىندارىن الدى. كەڭەستىك سولاقاي ساياساتتىڭ كەسىرىنەن ۇلت ۇپايى تۇگەندەلمەي تۇرعان تسەلينوگراد قالاسىندا قازاقتىڭ قالعىپ كەتكەن ساناسىن قايتا وياتۋ, ارينە وڭاي ەمەس ەدى. «اقمولا اقيقاتىنىڭ» (گازەت ءاۋ باستا وسىلاي اتالعان) ەلىن سۇيگەن ەلگەزەك جۋرناليستەرى بۇل مىندەتتى ويداعىداي ورىندادى.
ال قازاقستان ەگەمەندىككە قول جەتكىزىپ, اقمولا استاناعا اينالعان شالقىمالى-تولقىمالى شاقتاردا ەگىز قوزىداي ەكى ءۇنجاريا ەڭسەسىن تۇزەپ, ەلدىك ماسەلەلەردى ەكشەي ءبىلدى. الاشتىڭ التىن القاسىنداي ارۋ استانانىڭ مەرەيىن ءوسىرىپ, مارتەبەسىن بيىكتەتۋگە قوماقتى ۇلەس قوستى. باعانالى باستى وردامىزدىڭ قالىپتاسۋ, دامۋ, وركەندەۋ كەزەڭدەرى تۋرالى دەرەكتەر مەن دايەكتەردى استانالىق ارىپتەستەرىمىزدىڭ ءار جىلدارى جازعان مايەكتى ماقالالارىنان مولىنان تابۋعا بولادى. ەلوردا ەپوپەياسى ءالى جازىلىپ جاتىر...
مەرەيتويلىق سالتاناتتا مەملەكەتتىك كەڭەسشى ەرلان قاريننىڭ, پرەزيدەنت كومەكشىسى-ءباسپاسوز حاتشىسى رۋسلان جەلدىبايدىڭ, مادەنيەت جانە اقپارات ءمينيسترى ايدا بالاەۆانىڭ, استانا اكىمى جەڭىس قاسىمبەكتىڭ قۇتتىقتاۋ حاتتارى وقىلدى.
مادەنيەت جانە اقپارات ۆيتسە-ءمينيسترى ايزادا قۇرمانوۆا تورقالى تويدىڭ جورالعىسىن جاساپ, «استانا اقشامى» مەن «ۆەچەرنيايا استانانىڭ» عالىم قوجابەك, ايگۇل ۋايسوۆا, شىنار جاقىپوۆا, ۆاسيلي كراس, يۋليا مەندەتسكايا, ماكسيم ۋدود سەكىلدى ماڭدايالدى قىزمەتكەرلەرىنە ءتۇرلى ماراپات بەلگىلەرىن تاپسىردى.
اسەرلى كەش قازاقستاننىڭ حالىق ءارتىسى ايگۇل قوسانوۆا باستاعان, قايرات باەكەنوۆ, مارجان اراپباەۆا, قۇرماش ماحانوۆ, وزگەرىس شەرىكباي, رۋحيا بايدۇكەنوۆا جانە باسقا ساحنا ساڭلاقتارى قوستاعان ادەمى ءان-بيمەن ادىپتەلىپ, كوپشىلىك كوڭىلىن كونشىتتى.
ەڭ باستىسى, ەكى گازەتتىڭ ەلوردا ەندىكتەرى مەن بويلىقتارىنداعى ەڭكۋ-ەڭكۋ جولدارى ەرەكشە دەكوراتسيالارمەن ايشىقتالىپ, كوركەم بەينەكورىنىستەر ارقىلى بەرىلگەنىن اتاپ وتكەنىمىز ءجون.
مەرەيتويلىق كەشتە سونداي-اق ەلوردالىق فوتوتىلشىلەر سۇلتان سەيىت, ۆاسيلي كراس, وڭالحان ونەرحاننىڭ سۋرەتتەرىنەن قۇراستىرىلعان «وبەكتيۆتە – استانا ايشىقتارى» اتتى كورمە ۇيىمداستىرىلدى. كورمەنىڭ اشىلۋىندا ءسوز سويلەگەن سەنات دەپۋتاتى (گازەتتىڭ 2006–2008 جىلدارداعى باس رەداكتورى) نۇرتورە ءجۇسىپ پەن استانا قالالىق ءماسليحاتىنىڭ توراعاسى تابيعات زەينۇلقابدەن قاراسى قالىڭ وقىرمان قاۋىم مەن قۋانىش قۇشاعىنداعى ۇجىم مۇشەلەرىنە جىلى لەبىزىن ايتىپ, تولاعاي تابىس تىلەدى.
مەرەيتويلىق ءىس-شاراعا قوس باسىلىمنىڭ ءار جىلدارداعى باس رەداكتورلارى مەن ارداگەرلەرى, زيالى قاۋىم وكىلدەرى قاتىستى.
P.S. كوزىقاراقتى كوپشىلىك «استانا اقشامى» ەلوردالىق مارتەبە العان تۇستا بەلگىلى جۋرناليست, باق سالاسى بويىنشا پرەزيدەنت گرانتىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى جۇماگۇل بەردەنقىزى ساۋحات باسقارعانىن بىلەدى. ول سونداي-اق, ەلوردالىق «استانا» جۋرنالىنىڭ نەگىزىن قالاعان ەدى. باسىلىمنىڭ مەرەيتويلىق باعدارلاماسى اياسىندا مارقۇمنىڭ تۇرعان ۇيىنە مەموريالدىق تاقتا قويىلسا, استانانىڭ ەكى بىردەي باسىلىمىنا باس رەداكتورلىق ەتكەن اياۋلى اپامىزدىڭ رۋحىنا باعىشتالعان ساۋاپتى ءىستىڭ ءبىرى بولارى تالاس تۋدىرماسا كەرەك.
