اقمولا وبلىسىنىڭ اكىمى جىلدىق ەسەپ بەردى

كوكشەتاۋ. 19 اقپان. اقمولا وبلىسىنىڭ اكىمى سەرگەي كۋلاگين جۇرتشىلىق الدىندا «وبلىستىڭ 2014 جىلعى الەۋمەتتىك-ەكونوميكالىق دامۋ قورىتىندىلارى جانە 2015 جىلعا ارنالعان مىندەتتەر تۋرالى» ەسەپ بەردى. بۇل تۋرالى egemen.kz ءتىلشىسى حابارلادى. ەسەپ بەرۋ جيىنىندا بەلگىل بولعانداي, وبلىستا وتكەن جىلى كوزدەلگەن شارالاردى ىسكە اسىرۋ ەسەبىنەن ەكونوميكانىڭ ناقتى ءوسىمى 105,5 پايىزدى قۇراپ, تۇڭعىش رەت 1 تريلليون تەڭگەدەن استى. ونەركاسىپ ءوندىرىسىنىڭ كولەمى 5,6, جالپى اۋىل شارۋاشىلىعى ءونىمى 2,2, قۇرىلىس جۇمىستارى 16,1 جانە تۇرعىن ۇيلەردى پايدالانۋعا بەرۋ 3,4 پايىزعا ارتتى. ەكونوميكاعا ينۆەستيتسيالار تارتۋ 122,3 پايىزعا (181 ميلليراد تەڭگە) تەڭ بولدى. ءىس جۇزىندە بارلىق قىزمەت تۇرلەرىندە جانە الەۋمەتتىك ساياساتتا قول جەتكەن ەكونوميكالىق سەرپىلىس ورتاشا ايلىق جالاقىنىڭ 7 پايىزعا جۋىق وسۋىنە جاعداي تۋعىزدى. جاڭادان 11 مىڭنان استام جۇمىس ورنىنىڭ قۇرىلۋى مۇنداي ساناتتاعىلاردىڭ سانىن 6 پايىزعا ازايتىپ وتىر. جەرگىلىكتى بيۋدجەتكە سالىق اۋدارىمدارى 16,4 پايىزعا ۇلعايدى. تۇتىنۋ باعالارىنىڭ يندەكسى 100,4 پايىز دەڭگەيىندە بولدى. وبلىستا مەملەكەتتىك ۇدەمەلى يندۋستريالدى-يننوۆاتسيالىق دامۋ باعدارلاماسىنىڭ العاشقى بەسجىلدىعى ويداعىداي جۇزەگە اسىرىلدى,-دەدى ودان ءارى ءوڭىر باسشىسى. اتاپ ايتقاندا, يندۋستريالاندىرۋ كارتاسىنىڭ شەڭبەرىندە 119,6 ميلليارد تەڭگەنىڭ 49 جوباسى ىسكە قوسىلدى. بۇل بەس مىڭنان استام تۇراقتى جۇمىس ورنىنىڭ اشىلۋىنا مۇمكىندىك بەردى. 2014 جىلى  ونەركاسىپتىڭ ءوندىرىس كولەمى 295,2 ميلليارد تەڭگەگە جەتتى. وسىنىڭ ناتيجەسىندە ونەركاسىپ ونىمدەرىنىڭ  يندەكسى 105,6 پايىزدى قۇرادى. بۇل – رەسپۋبليكاداعى ەكىنشى كورسەتكىش. بيىلعى جىلى يندۋستريالاندىرۋ ۇدەرىسىنىڭ ەكىنشى بەسجىلدىعى شەڭبەرىندە 644,8 ميلليارد تەڭگەنىڭ 36 ينۆەستيتسيالىق جوباسى جۇزەگە اسىرىلۋدا. بۇل شامامەن 27 مىڭ تۇراقتى جۇمىس ورنىن قۇرۋعا مۇمكىندىك بەرەدى. ال اعىمداعى جىلى 121 ميلليارد تەڭگەنىڭ 25 جوباسىن اياقتاۋ جوسپارلانىپتى. ياعني, تاعى دا 2 مىڭ ادام تۇراقتى ناپاقا كوزىن تابادى دەگەن ءسوز. بۇگىنگى كۇنى وبلىستىڭ 350 گەكتار اۋماعىندا 4 يندۋستريالىق ايماق قۇرۋ ماسەلەسى پىسىقتالعانى بەلگىلى بولدى. ناقتىلاي تۇسسەك, كوكشەتاۋ جانە ستەپنوگور قالالارى نەگىزگى يندۋستريالىق ايماقتىڭ, ال شورتاندى مەن تسەلينوگراد اۋداندارى كولىك-لوگيستيكالىق كەشەننىڭ نەگىزىن قالاماق. بۇل استانا اينالاسىنداعى اگلومەراتسيالىق ەرەكشەلىكتەرگە نەگىزدەلىپ جاسالعان جوبا. اقمولا ديقاندارى اۋا رايىنىڭ قولايسىزدىقتارىمەن الىسىپ ءجۇرىپ قۇت قامباعا 4,5 ميلليون توننا استىق قۇيدى. گەكتار تۇسىمدىلىگى 11 تسەنتنەردەن اينالعان. اكىم بيىل ەگىستىك كولەمى 4 ميلليون گەكتاردان كەمىمەيتىنىن, سوندىقتان دايىندىق جۇمىستارى قاتاڭ باقىلاۋدا ۇستالاتىندىعىن ەسكەرتتى. سونداي-اق, ەلىمىزدى ازىق-ت ۇلىكپەن قامتاماسىز ەتۋ جانە ەكسپورتتىق الەۋەتتى كۇشەيتۋ ماقساتىندا مال شارۋاشىلىعىن دامىتۋعا ايرىقشا كوڭىل بولىنەتىندەگى اتاپ كورسەتىلدى. وبلىستا ەتتىك باعىتتاعى 23 رەپرودۋكتور-شارۋاشىلىقتار قۇرىلعان. جىل ىشىندە بۇلار 3600 اسىل تۇقىمدى ءىرى قارانى اۋكتسيون ارقىلى ساۋداعا شىعارۋىن, ەسەپتى كەزدەسۋگە قاتىسۋشىلار, قوسىمشا تابىس كوزى رەتىندە باعالادى. بۇعان قوسىمشا, جاڭا ءوندىرىس وشاقتارى اشىلۋى ناتيجەسىندە اۋىل ششارۋاشىلىعى ونىمدەرىن قايتا وڭدەۋ كۇرت وسكەندىگى تىلگە تيەك ەتىلدى. ەلباسىنىڭ تاپسىرماسىنا سايكەس, استانا قالاسىنىڭ ماڭايىنداعى ازىق-ت ۇلىك بەلدەۋىن قۇرۋ بويىنشا ماقساتتى جۇمىستار اتقارىلۋدا. بايانداماشى بۇل ورايدا, وتكەن جىلدىڭ وزىندە 12 ميلليارد تەڭگەنىڭ 18 جوباسى يگىلىك توككەنىن ايتتى. جالپى, اۋىل شارۋاشىلىعى ونىمدەرىن قايتا وڭدەۋ ەسەبىنەن استانا تۇرعىندارىن سۇتپەن قامتاماسىز ەتۋ 40, ەت – 46 پايىزعا وسسە, ۇن جانە جۇمىرتقا بويىنشا 100 پايىز وتەلىپ وتىر. مۇندا شاعىن جانە ورتا بيزنەس نىساندارىنىڭ ۇلەسى دە سالماقتى. ەسەپتى كەزەڭدە تۇرعىن ءۇي قۇرىلىسىنا 22 ميلليارد تەڭگە ينۆەستيتسيا باعىتتالىپ, 268 مىڭ شارشى مەتر تۇرعىن الاڭى پايدالانۋعا بەرىلگەنى كوڭىل كونشىتەدى. وسىنىڭ ارقاسىندا 2500 وتباسى باسپانالى بولدى. بيىل ونىڭ كولەمى 285 مىڭ شارشى مەترگە جەتپەك. سونداي-اق, الەۋمەتتىك جالدامالى ۇيلەر قۇرىلىسى 4 ەسەگە ۇلعايتىلىپ 15 مىڭ شارشى مەتردى قۇرايتىنى, تۇرعىن ءۇي-كوممۋنالدىق كەشەندى قۋاتتاندىرۋ, «اق بۇلاق» باعدارلاماسىنىڭ جوسپارلى جۇرگىزىلۋى ەل تىرشىلىگىن جاقسارتا تۇسەتىنى انىق. وبلىستا «جۇمىسپەن قامتۋدىڭ جول كارتاسى-2020» باعدارلاماسىنىڭ بارلىق جوسپارلانعان ءىس-شارالارى جۇزەگە اسىرىلعانىنا قانىقتىق. ايتكەنمەن, ەلدى-مەكەندەردە جۇمىس كۇشىنىڭ جەتىسپەۋشىلىگى بار. ماسەلەن, 22 اۋىلدىق وكرۋگتە مال دارىگەرلەرى جوق ەكەن. وسىعان بايلانىستى وبلىس اكىمىنىڭ شاكىرتاقىسى تاعايىندالعان. بىلتىر «ديپلوممەن اۋىلعا» جوباسى اياسىندا 439 جاس مامانعا جولداما بەرىلىپتى. ەسەپتى كەزدەسۋگە قازاقستان رەسپۋبليكاسىنىڭ ادىلەت ءمينيسترى بەرىك يماشەۆ پەن پارلامەنت سەناتىنىڭ دەپۋتاتى جابال ەرعاليەۆ جانە پرەزيدەنت اكىمشىلىگىنىڭ باس ينسپەكتورى قالدىبەك بايىمبەتوۆ قاتىستى. باقبەرگەن امالبەك. دەرەك, سۋرەت: egemen.kz.