پالاتا وتىرىسىندا سەناتورلار «جاساندى ينتەللەكت تۋرالى» زاڭدى جانە وعان ىلەسپە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جاساندى ينتەللەكت جانە تسيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى, سونداي-اق ەكى وقىلىمدا «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭدى قارادى. زاڭداردىڭ نورمالارى جاساندى ينتەللەكت سالاسىنداعى رەتتەۋدىڭ نەگىزگى ۇعىمدارىن, پرينتسيپتەرى مەن تەتىكتەرىن انىقتاۋدى, جاساندى ينتەللەكت جۇيەلەرىنىڭ جىكتەلۋى مەن ولاردى قاۋىپسىز قولدانۋعا قويىلاتىن تالاپتاردى بەلگىلەۋدى جانە جاساندى ينتەللەكتىنىڭ ۇلتتىق پلاتفورماسىنىڭ جۇمىس ىستەۋىنىڭ قۇقىقتىق نەگىزدەرىن قۇرۋدى كوزدەيدى.
سونىمەن قاتار قۇجاتتاردا جالعان اقپاراتتىڭ تارالۋىن بولدىرماۋ ءۇشىن جاساندى ينتەللەكت قىزمەتىنىڭ ناتيجەلەرىن ماشينا وقيتىن نىساندا مىندەتتى تاڭبالاۋ تەتىگىن بەكىتۋ نورماسى قاراستىرىلعان. وعان قوسا ەلىمىزدىڭ اۋماعىندا جاساندى ينتەللەكت جۇيەلەرىن قۇرۋ مەن پايدالانۋ كەزىندە تىيىم سالىنعان فۋنكتسيونالدىق مۇمكىندىكتەردىڭ تىزبەسى نازارعا الىندى.
«پرەزيدەنت قاسىم-جومارت توقاەۆ بيىلعى جولداۋىندا جاساندى ينتەللەكت تەحنولوگيالارىن ەكونوميكانىڭ بارلىق سالاسىنا ەنگىزۋدى تاپسىردى. بۇگىن قارالعان زاڭدار وسى ماقساتپەن ازىرلەندى. بۇل نورمالار جاساندى ينتەللەكت سالاسىنداعى قوعامدىق قاتىناستاردى رەتتەيتىن قۇقىقتىق نەگىز قالىپتاستىرادى. سوعان سايكەس «جاساندى ينتەللەكت», «دەرەكناما» جانە باسقا دا بىرقاتار نەگىزگى ۇعىمدار زاڭ جۇزىندە انىقتالدى. زاڭداردى قاراۋ بارىسىندا سەناتورلار بىرقاتار ۇسىنىس بەردى. الداعى ۋاقىتتا بۇل زاڭدار تسيفرلاندىرۋ سالاسىندا مەملەكەت باسشىسى جۇكتەگەن ناقتى مىندەتتەردى ورىنداۋعا ءوز ۇلەسىن قوسادى دەپ سەنەمىز», دەپ م.اشىمباەۆ زاڭدارعا باستاماشى بولعان دەپۋتاتتارعا ريزاشىلىق ءبىلدىردى.
سونداي-اق وسى زاڭدار ارقىلى دەربەس دەرەكتەردى قورعاۋ جانە دەربەس دەرەكتەر سالاسىنداعى اقپاراتتىق قاۋىپسىزدىكتى كۇشەيتۋ ءۇشىن جالپىعا قولجەتىمدى كوزدەردەن دەرەكتەردى ماقساتسىز جيناۋعا تىيىم سالىناتىنىن اتاپ وتكەن ءجون. سۋبەكتىنىڭ كەلىسىمىنسىز بيومەتريالىق دەرەكتەردى پايدالانۋ شەكتەلەدى جانە جەكە تۇلعالاردىڭ قۇقىقتارى مەن بوستاندىقتارىن قورعاۋ ءۇشىن دەرەكتەردى مىندەتتى تۇردە يەسىزدەندىرۋ كوزدەلگەن. جاساندى ينتەللەكت سالاسىنداعى زاڭنامانى بۇزعانى ءۇشىن جاۋاپتىلىق تا قاراستىرىلىپ وتىر. سونىمەن قاتار «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ ارقىلى ەنەرگەتيكالىق سۋسىنداردى ساتۋعا تىيىمدى بۇزعانى, سونداي-اق كوممەرتسيالىق ەمەس ۇيىمدارعا سانكتسيا قولدانعانى ءۇشىن جاۋاپتىلىق ەنگىزىلەدى.
تالقىلاۋ ناتيجەسىندە سەناتورلار زاڭداردى قولداپ, ولارعا بىرقاتار تۇزەتۋ ەنگىزۋدى ۇسىندى. ناقتى ايتقاندا, ون سەگىز جاسقا تولماعان ادامدارعا تەمەكى ونىمدەرىن ساتقانى ءۇشىن كوممەرتسيالىق ەمەس ۇيىمداردى اكىمشىلىك جاۋاپكەرشىلىككە تارتۋ ۇسىنىلدى. سونداي-اق جاساندى ينتەللەكت جۇيەلەرىن پايدالانا وتىرىپ جاسالعان تۋىندىلار ادامنىڭ ولاردى جاساۋعا شىعارماشىلىق ۇلەسى بولعان جاعدايدا عانا اۆتورلىق قۇقىقپەن قورعالادى دەگەن تۇزەتۋ ەنگىزۋ ماسەلەسى ءسوز بولدى.
سەنات دەپۋتاتتارى جاساندى ينتەللەكت جۇيەلەرىن پايدالانۋ كەزىندەگى تاۋەكەلدەرگە قاتىستى وزگەرىستەر بويىنشا دا ۇسىنىستار بەردى. وسىعان بايلانىستى نورمالاردىڭ بىركەلكى قولدانىلۋىن قامتاماسىز ەتۋگە باعىتتالعان جۇيەلى ءارى ناقتىلاۋدى كوزدەيتىن تۇزەتۋلەرگە سۇيەنە وتىرىپ, زاڭداردى ماجىلىسكە قايتاردى.
