اقتاۋداعى «اق نەك» زاۋىتى جاڭا سۋسىن وندىرمەكشى

اقتاۋ. 7 تامىز. اقتاۋداعى «اق نەك» زاۋىتى جاڭا سۋسىن وندىرمەكشى. بۇل تۋرالى egemen.kz ءتىلشىسى حابارلادى. 1997 جىلدان بەرى ماڭعىستاۋ وڭىرىندە ازىق-ت ۇلىك, ءسۇت ونىمدەرىن وندىرۋمەن جانە ءتۇرلى مەكەمەلەرگە سەرۆيستىك قىزمەت كورسەتۋمەن اينالىسىپ كەلە جاتقان «بەرەكەت-ف» جشس-نە قاراستى «اق نەك» زاۋىتىنىڭ وندىرىستىك قۋاتى مەن تاۋار كولەمى جىلدان-جىلعا ارتىپ كەلەدى. بۇدان 2 جىل بۇرىن تاۋاردىڭ 15 ءتۇرىن وندىرەتىن زاۋىتتا قازىر 40 ءتۇرلى تاۋار دايىندالادى. ولاردىڭ اراسىندا پاستەرلەنگەن ءسۇت, قۇرت, ايران, سۇزبە, قاتىق, ىرىمشىك, مايلىلىق دەڭگەيى ءارتۇرلى قايماقتار تۇتىنۋشىلاردىڭ تالعامىنا تاتىپ, سۇرانىسىنا يە بولعان. ەندى «اق نەك» زاۋىتى ءوز تۇتىنۋشىلارىن «تاڭ» اتتى سۋسىنىمەن قۋانتپاقشى. تاۋلىگىنە 15 توننا قۋاتتىلىقپەن جۇمىس جاسايتىن زاۋىت اتالعان ءونىمدى بەلارۋس ەلىنەن اكەلىنگەن قۇرعاق ءسۇتتى قالپىنا كەلتىرۋ, ءسۇت ونىمدەرىن اشىتۋ ارقىلى دايىندايدى. وڭدەۋ ونەركاسىبىندەگى شاعىن جانە ورتا كاسىپكەرلىك نىساندارىن قولداۋ باعدارلاماسىنىڭ قاتىسۋشىسى بولىپ تابىلاتىن «اق نەك» زاۋىتىنىڭ بۇل جوباسى «قازاقستاننىڭ حالىق بانكى» اق تاراپىنان قارجىلاندىرىلعان. باعدارلاما 10 جىلعا دەيىنگى ۇزاق مەرزىمگە نەسيەنى 6%-بەن الۋعا مۇمكىندىك بەرسە, ول ءوز كەزەگىندە كاسىپكەردىڭ زاۋىت قىزمەتىنىڭ نەگىزگى ارتىقشىلىعى بولىپ تابىلاتىن تاۋار ءونىمىنىڭ باعاسىن تومەن قويۋعا جول اشادى. «بيزنەستىڭ جول كارتاسى-2020» باعدارلاماسى مەن «دامۋ» كاسىپكەرلىكتى قولداۋ ورتالىعىنىڭ دەمەۋىمەن ءوز جۇمىسىن نىعايتا تۇسكەن زاۋىت وتكەن جىلى قايماق, ايران تۇرلەرىن ىدىسقا قۇيىپ, قاپتاۋدى اۆتوماتتى تۇردە ورىنداۋعا قول جەتكىزگەن. ساپالى ءونىم شىعارۋدى ماقسات ەتكەن زاۋىتتىڭ ءىس-تاجىريبەسى مەن قۇپياسىن بىلۋگە قىزىعۋشىلار كوپ. زاۋىت الداعى ۋاقىتتا كورشى ەلدەردىڭ نارىعىنا شىعۋدى جوسپارلاپ وتىر. گۇلايىم شىنتەمىرقىزى. دەرەك: egemen.kz. سۋرەت: tumba.kz.