«قازاگروقارجى» اكتسيونەرلىك قوعامى اباي وبلىسىندا باق وكىلدەرىنە ارنالعان ءباسپاسوز تۋر ۇيىمداستىردى. جۋرناليستەر ءوڭىردىڭ جەتەكشى شارۋاشىلىقتارى – بورودۋليحا اۋدانىنداعى «لادا» شارۋا قوجالىعى مەن «زەنكوۆسكوە» جشس-ءنىڭ جۇمىسىمەن تانىستى. ساپار بارىسىندا اۋىل شارۋاشىلىعى تەحنيكاسىن جەڭىلدەتىلگەن ليزينگ ارقىلى جاڭارتۋ اگروبيزنەستىڭ تيىمدىلىگىنە قالاي اسەر ەتەتىنى كورسەتىلدى.
الدىمەن تىلشىلەر «لادا» شارۋا قوجالىعىنا باردى. 4 مىڭ گەكتار القاپتا بيداي, قاراقۇمىق, كۇنباعىس جانە مال ازىعى داقىلدارىن وسىرەتىن شارۋاشىلىق كۇنباعىس مايىن دا وڭدەيدى. قوجالىقتىڭ باسشىسى الەكساندر رومانوۆ بۇل كاسىپتى اكەسىنەن جالعاپ, وتباسىلىق ءىستى دامىتىپ وتىر. «قازاگروقارجى» كومپانياسىمەن سەرىكتەستىك 23 جىلعا جالعاسىپ كەلەدى. وسى ۋاقىت ىشىندە شارۋاشىلىق 368 ميلليون تەڭگەگە 20-دان استام تەحنيكا العان. ونىڭ ىشىندە متز, Buhler تراكتورلارى, Essil جانە Vector كومبايندارى بار.
«بۇگىندە جاڭا تەحنيكا – باستى قاجەتتىلىك. مىسالى, Gaspardo Chrono 916 سەبۋ ماشيناسى ارقىلى بۇرىن ءۇش ادام اتقاراتىن جۇمىستى ەندى ءبىر وپەراتور ورىندايدى», – دەيدى فەرمەر.
كەلەسى ايالداما – زەنكوۆكا اۋىلىنداعى «زەنكوۆسكوە» جشس. 5 مىڭ گەكتاردان استام جەرى بار شارۋاشىلىق ءداندى جانە مايلى داقىلداردى وسىرەدى. 45 ادام تۇراقتى جۇمىسپەن قامتىلعان. كاسىپورىن باسشىسى ءماديجان قۇرامىسوۆ – اگرارلار اۋلەتىنىڭ وكىلى. ول وندىرىستە عىلىم مەن تاجىريبەنى ۇشتاستىرىپ كەلەدى. بيىل شارۋاشىلىق HORSCH Leeb بۇرىككىشى, Bourgault سەبۋ كەشەنى, John Deere تراكتورى مەن Claas Trion كومباينىن العان. سوڭعىسى – جىلدىق 5% مولشەرلەمەمەن ليزينگكە الىنعان تەحنيكا.
«ەگەر جەڭىلدەتىلگەن ليزينگ بولماسا, الەمدىك برەندتەردىڭ تەحنيكاسىن پايدالانۋ قيىن بولار ەدى. ال بۇگىن ءبىزدىڭ القاپتاردا Claas Trion سياقتى زاماناۋي ماشينالار جۇمىس ىستەپ ءجۇر», – دەيدى شارۋاشىلىق باسشىسى.
2018 جىلدان بەرى «زەنكوۆسكوە» جشس «قازاگروقارجى» ارقىلى جالپى قۇنى 992 ملن تەڭگە بولاتىن 10-نان استام تەحنيكا العان. «قازاگروقارجى» اق اباي وبلىستىق فيليالىنىڭ ديرەكتورى رەنات بەكوۆتىڭ ايتۋىنشا, ءوڭىر اگراريلەرى تەحنيكا ليزينگىنە بەلسەندى قاتىسىپ كەلەدى.
«2023 جىلدان 2025 جىلعى 1 قازانعا دەيىن ءبىز 32 ملرد تەڭگەگە 1719 تەحنيكا قارجىلاندىردىق. بيىلدىڭ وزىندە وبلىس شارۋالارى 12 ملرد تەڭگەگە 452 تەحنيكا الدى», دەدى ول.
بۇگىندە فيليالدىڭ 1 090 تۇراقتى كليەنتى بار. بۇل – وڭىردە زاماناۋي تەحنيكانى ەنگىزۋ مەن اۋىل شارۋاشىلىعىن جاڭعىرتۋدىڭ ناقتى كورسەتكىشى.
اباي وبلىسى
