ايبەك سەرىكبول ۇلى 1987 جىلى 3 ماۋسىم كۇنى اباي اۋدانى, قۇندىزدى اۋىلىندا دۇنيەگە كەلگەن.
ول سەمەي پوليتەحنيكالىق كوللەدجىن «زاڭگەر» ماماندىعى بويىنشا, سەمەي مەملەكەتتىك پەداگوگيكالىق ينستيتۋتىن «دەنە شىنىقتىرۋ» ماماندىعى بويىنشا, قازاق يننوۆاتسيالىق گۋمانيتارلىق – زاڭ ۋنيۆەرسيتەتىن «زاڭگەر» ماماندىعى بويىنشا تامامداعان. قۇقىقتانۋ ماگيسترى (ەۋرازيا ۇلتتىق ۋنيۆەرسيتەتى).
ەڭبەك جولىن 2010 جىلى «سەمەي قالاسى بويىنشا شىعىس قازاقستان وبلىستىق وليمپيادالىق رەزەرۆتەگى № 1 بالالار – جاسوسپىرىمدەر سپورت مەكتەبىندە» جاتتىقتىرۋشى – وقىتۋشى بولىپ باستاعان. 2013-2019 جىلدارى «شقو دشس جانە سپورت باسقارماسىنىڭ بۇقارالىق سپورت تۇرلەرىنەن جوعارعى سپورت شەبەرلىگى مەكتەبى» كمم اعا نۇسقاۋشى – ادىسكەر رەتىندە قىزمەت اتقاردى.
2019 جىلدان باستاپ سەمەي قالاسىنداعى كولىك كوللەدجىنىڭ ديرەكتورى قىزمەتىنە تاعايىندالدى.
سونداي-اق, قازاق كۇرەسىنەن قر ەڭبەك سىڭىرگەن سپورت شەبەرى, «دزيۋدو» بويىنشا سپورت شەبەرى, «سامبو» بويىنشا سپورت شەبەرى. قازاق كۇرەسىنەن ون دۇركىن قازاقستان چەمپيونى, ءتورت دۇركىن ازيا چەمپيونى, «الەم كۋبوگىنىڭ» ءۇش دۇركىن يەگەرى, قازاق كۇرەسىنەن الەمنىڭ ءتورت دۇركىن چەمپيونى, «ەۋرازيا بارىسى» حالىقارالىق ءتۋرنيرىنىڭ ءتورت دۇركىن چەمپيونى, «الەم بارىسى» حالىقارالىق ءتۋرنيرىنىڭ ءۇش دۇركىن چەمپيونى, «قازاقستان بارىسى» ءتۋرنيرىنىڭ ەكى دۇركىن چەمپيونى.
رەسپۋبليكالىق ساياسي كەڭەستىڭ مۇشەسى, «AMANAT» پارتياسى ساياسي كەڭەسىنىڭ مۇشەسى, VII, VIII شاقىرىلعان اباي وبلىستىق ءماسليحات دەپۋتاتى بولعان.
بىرقاتار مەملەكەتتىك ناگرادا مەن جوعارى دارەجەلى ماراپاتتارى بار.
اباي وبلىسى
