كونتسەرتتى گازەتتەردە ءار جىلدارى باسشىلىق ەتكەن رەداكتورلار, قالامگەرلەر, باسىلىمنىڭ تۇراقتى اۆتورلارى, زيالى قاۋىم وكىلدەرى, وقىرمان قاۋىم مەن قالا تۇرعىندارى تاماشالادى. ونەر جۇلدىزدارىنىڭ كونتسەرتى باستالماس بۇرىن پرەزيدەنت اكىمشىلىگى مەملەكەتتىك كەڭەسشىسى حاتشىلىعىنىڭ كونسۋلتانتى قالقامان سارين ءسوز الىپ, مەملەكەتتىك كەڭەسشى ەرلان قاريننىڭ قۇتتىقتاۋ حاتىن وقىپ بەردى.
«قۇرمەتتى «استانا اقشامى» جانە «ۆەچەرنيايا استانا» گازەتتەرىنىڭ ۇجىمى! سىزدەردى قوس باسىلىمنىڭ 35 جىلدىق مەرەيتويىمەن شىن جۇرەكتەن قۇتتىقتايمىن. وتكەن 35جىل – تاۋەلسىزدىك جىلدارىمەن تۇسپا-تۇس كەلگەن استانانىڭ قالىپتاسۋى مەن ءوسىپ-وركەندەۋىنىڭ ايناسىنا اينالعان كەزەڭ. وسى جىلدار ىشىندە گازەتتەردىڭ ءار سانىندا ەلوردانىڭ تىنىس-تىرشىلىگى, قوعام ومىرىندەگى ماڭىزدى وقيعالار مەن ەلدىك ىستەر كەڭىنەن قامتىلىپ كەلەدى. «استانا اقشامى» گازەتىندە جاريالانعان ەل تاريحىنداعى تاعدىرلى شەشىمدەردىڭ جاڭعىرىعى تاۋەلسىزدىك جىلناماسىنداعى ايشىقتى وقيعالار ويلى وقىرماننىڭ جۇرەگىنە جول تاۋىپ, ىستىق ىقىلاسىنا بولەندى. ال «ۆەچەرنيايا استانا» گازەتى ءوز وقىرمانىن ساپالى ءارى شىنايى اقپاراتپەن قامتاماسىز ەتىپ, قالا ءومىرىنىڭ وزەكتى ماسەلەلەرىن كوتەرىپ, مازمۇندى دا بەدەلدى باسىلىمعا اينالدى», - دەلىنگەن قر مەملەكەتتىك كەڭەسشى ەرلان قاريننىڭ قۇتتىقتاۋ حاتىندا.
سونىمەن قاتار قر پرەزيدەنتى ءباسپاسوز حاتشىسىنىڭ ورىنباسارى ەرجان بايتىلەس پرەزيدەنت كومەكشىسى – ءباسپاسوز حاتشىسى رۋسلان جەلدىبايدىڭ قۇتتىقتاۋ حاتىن وقىدى.
«قۇرمەتتى «Elorda aqparat» ۇجىمى! سىزدەردى «استانا اقشامى», «ۆەچەرنيايا استانا» گازەتتەرىنىڭ 35 جىلدىعىمەن قۇتتىقتايمىن. باسىلىمدار ەلوردامىزدىڭ تىنىس-تىرشىلىگىن, قالانىڭ ءوسىپ-وركەندەۋ كەزەڭدەرىن گازەت بەتتەرىندە كەڭىنەن دارىپتەپ كەلەدى. قوس گازەتتە جارىق كورگەن كوپتەگەن ماقالا استانا تۇرعىندارىنىڭ مۇڭ-مۇقتاجىنا نازار اۋدارىپ, تۇيتكىلدى ماسەلەلەردىڭ شەشىلۋىنە وڭ ىقپال ەتتى. باسىلىمداردىڭ وقىرمانى ءاردايىم كوپ بولۋىنا تىلەكتەسپىن», - دەلىنگەن پرەزيدەنت كومەكشىسى – ءباسپاسوز حاتشىسى رۋسلان جەلدىبايدىڭ قۇتتىقتاۋ حاتىندا.
«Elorda aqparat» مەدياحولدينگىنىڭ ءبىر توپ قىزمەتكەرى ماراپاتقا يە بولدى. باسىلىمداردىڭ ۇجىمىن 35 جىلدىق مەرەيتويىمەن قۇتتىقتاپ, ماراپاتتى تابىستاعان قر مادەنيەت جانە اقپارات ۆيتسە-ءمينيسترى ايزادا قۇرمانوۆا ءمينيستردىڭ قۇتتىقتاۋ حاتىن وقىپ بەردى.
ءوز كەزەگىندە استانا قالاسى اكىمىنىڭ ورىنباسارى ەسەت بايكەن استانا ءۇشىن, ەلوردا تۇرعىندارى ءۇشىن بۇگىنگى مەرەيتويدىڭ ورنى ەرەكشە ەكەنىن اتاپ ءوتىپ, ەلوردا اكىمى جەڭىس قاسىمبەكتىڭ قۇتتىقتاۋ حاتىن وقىپ بەردى.
كەش بارىسىندا «تاربيە» ءسان ءۇيى شاپاندار شەرۋى ەتنو ءسان كورسەتىلىمىن ۇيىمداستىردى.
كونتسەرتتە قايرات باەكەنوۆ, قۇرماش ماحان, وزگەرىس شەرىكباي, مارجان اراپباەۆا, ايگۇل قوسان, گۇلسىم مىرزابەك, رۋحيا بايدۇكەنوۆا سىندى ونەر مايتالماندارى, سونىمەن قاتار «قورقىت» ەتنو فولكلورلىق ءانسامبلى, «جاستار تەاترىنىڭ» ارتيستەرى, «اينالايىن» بالالار حورى ونەر كورسەتتى.
ايتا كەتسەك, 1990 جىلى 13 قازان كۇنى تۇڭعىش سانى جارىققا شىققان ايماقتاعى العاشقى قازاق ءتىلدى باسىلىمداردىڭ ءبىرى «اقمولا اقيقاتى» 1998 جىلى «اقمولا اقشامى», كەيىننەن رەسپۋبليكالىق قوعامدىق ساياسي مارتەبەسى بار «استانا اقشامى» اتاندى.
2002 جىلى «استانا اقشامى» گازەتى قازاقستان جۋرناليستيكا اكادەمياسىنىڭ «التىن جۇلدىز» سىيلىعىنىڭ لاۋرەاتى اتانسا, 2018 جىلى قر پرەزيدەنتىنىڭ العىس حاتى جانە «نۇر-سۇڭقار» سىيلىعىمەن ماراپاتتالعان.
