ءىس-شاراعا ەلدىڭ مادەنيەت پەن ادەبيەت سالاسىنىڭ كورنەكتى وكىلدەرى قاتىستى. سونىمەن قاتار «مۇحتار اۋەزوۆتىڭ قازاقستان مادەنيەتى مەن ادەبيەتىنىڭ دامۋىنا قوسقان ۇلەسى» تاقىرىبىنداعى دوڭگەلەك ۇستەل ۇيىمداستىرىلدى. قاتىسۋشىلارعا جازۋشىنىڭ نەمەرەسى زيفا-ءالۋا اۋەزوۆا بەينەجولداۋ ارقىلى قۇتتىقتاۋ ءبىلدىردى. سونىمەن قاتار كورنەكتى عالىم الكەي مارعۇلاننىڭ بۇرىن جارىق كورمەگەن «مۇحتار اۋەزوۆ تۋرالى ەستەلىكتەر» اتتى ەڭبەگىنىڭ تۇساۋى كەسىلدى.
«بۇل اۋەزوۆ ءتارىزدى ءسوز الىبىنىڭ رۋحىنا ماڭگىلىك تاعىم ەتە بەرۋگە ءتيىس ەكەنىمىزدى كورسەتەدى. اۋەزوۆتىڭ اتى جۇرگەن جەردىڭ ءبارى كيەلى دەپ تاعزىم ەتە بەرۋ ءلازىم دەپ ويلايمىن. بۇگىنگى ءىس-شارا قۇتتى بولسىن, اعايىن!» دەدى قازاقستاننىڭ حالىق جازۋشىسى سماعۇل ەلۋباي.
№4 كىتاپحانا-بولىمشەسى – الماتى قالاسىنداعى ەڭ ءىرى جانە جەتەكشى كىتاپحانالاردىڭ ءبىرى. كىتاپ قورى 34 000 دانانى قۇرايتىن, ال جىلدىق كەلۋشىلەر سانى 350 000-نان اساتىن كىتاپحاناعا مۇحتار ومارحان ۇلى اۋەزوۆتىڭ ەسىمىن بەرۋ – رۋحانيات جاناشىرلارى ءۇشىن ۇلكەن قۋانىش. قازاقستان جازۋشىلار وداعىنىڭ توراعاسى مەرەكە قۇلكەنوۆ الماتىنىڭ كۇرەتامىرى ىسپەتتى اباي داڭعىلىنىڭ بويىندا ورنالاسقان وسىناۋ پاراسات ورداسىنا ۇلى قالامگەرىمىزدىڭ ەسىمى بەرىلۋى تەكتەن-تەك ەمەس ەمەس ەكەنىن ايتتى.
«بۇل ورىن ۇلى جازۋشىنىڭ مۇراسىن ۇلىقتاپ قانا قويماي, ۇلتتىق ادەبيەت پەن مادەنيەتتى جاڭا دەڭگەيگە كوتەرەتىن رۋحاني ورتالىققا اينالادى. مۇحتار اۋەزوۆتىڭ مۇراسى — حالقىمىزدىڭ رۋحاني بايلىعىنىڭ التىن تىرەگى. وسىنداي ورتالىقتار بۇل بايلىقتى كەلەر ۇرپاققا جەتكىزەتىن سەنىمدى كوپىر بولماق», دەدى مەرەكە قۇلكەنوۆ.
سالتاناتتى شارادان سوڭ اتالعان كىتاپحانا عيماراتىندا «مۇحتار اۋەزوۆتىڭ قازاقستان مادەنيەتى مەن ادەبيەتىنىڭ دامۋىنا قوسقان ۇلەسى» اتتى دوڭگەلەك ۇستەل ءوتتى. دوڭگەلەك ۇستەلدى مۇحتار اۋەزوۆ اتىنداعى ادەبيەت جانە ونەرتانۋ ينستيتۋتىنىڭ ديرەكتورى كەنجەحان ماتىجانوۆ جۇرگىزدى. جيىن بارىسىندا م.اۋەزوۆتىڭ نەمەرەسى, شىعىستانۋشى جانە تۇركىتانۋشى زيفا-الۋا اۋەزوۆانىڭ ونلاين-قۇتتىقتاۋى تىڭدالىپ, اقىن ءارى ديپلومات ولجاس سۇلەيمەنوۆتىڭ اتىنان قىزى ءمادينا سۇلەيمەنوۆا سويلەدى. سونىمەن قاتار كىتاپحاناعا مۇرات مۇحتار ۇلى اۋەزوۆتىڭ جەكە كىتاپحاناسىنان كىتاپتاردى سىيعا تارتۋ ءراسىمى ءوتتى.
مۇحتار اۋەزوۆ اتىنداعى كىتاپحانانىڭ اشىلۋى الماتىنىڭ مادەني ومىرىندەگى ەلەۋلى وقيعا بولماق, ول بىرنەشە بۋىندى – وقىرمانداردى, جانە ۇلى جازۋشى شىعارماشىلىعىن قادىرلەيتىن جانداردى بىرىكتىرىپ, جاڭا مادەني كەڭىستىككە اينالماق.
الماتى
