AES كومپانيالار توبى وسكەمەندە بالاباقشا سالادى

وسكەمەن. 19 اقپان. بيزنەستىڭ الەۋمەتتىك جاۋاپكەرشىلىگى اياسىندا وسكەمەن قالاسىندا ءتۇرلى الەۋمەتتىك نىساندار بوي كوتەرۋدە. جەرگىلىكتى كاسىپورىنداردىڭ كۇشىمەن بالاباقشالار, ءتۇرلى سپورتتىق نىساندار اشىلىپ, تۇرعىنداردىڭ يگىلىنە قىزمەت ەتىپ جاتىر. بيزنەستىڭ الەۋمەتتىك جاۋاپكەرشىلىگىنىڭ كەزەكتى جارقىن ۇلگىسى رەتىندە وسكەمەن قالاسىنىڭ اكىمدىگى مەن قازاقستانداعى AES كومپانيالار توبى بالاباقشا قۇرىلىسى تۋرالى مەموراندۋمعا قول قويدى. بۇل تۋرالى egemen.kz ءتىلشىسى حابارلادى. اتالعان مەموراندۋم اياسىندا AES كومپانيالار توبىنا كىرەتىن AES ءشۇلبى گەس-ءى مەن AES وسكەمەن گەس-ءى «ەۋرازيا ورتالىق ازيا قورىنا» بالاباقشا قۇرىلىسىنا ارنالعان قاراجات بولەدى. بۇل قاراجاتقا وسكەمەن ارماتۋرا زاۋىتى ماڭىندا 140 ورىندىق بالاباقشا سالىنىپ, قالا مەنشىگىنە تەگىن بەرىلەتىن بولادى. – قازاقستانداعى AES كومپانيالار توبىنىڭ باسشىلىعىنا قالا تۇرعىندارىنىڭ ريزاشىلىعىن جەتكىزگىم كەلەدى. بۇل – ءبىزدىڭ ءوزارا سەرىكتەستىگىمىزدىڭ باستاۋى دەپ بىلەمىن, – دەدى قالا اكىمى تەمىربەك قاسىمجانوۆ. قازاقستانداعى AES كومپانيالار توبىنىڭ ۆيتسە-پرەزيدەنتى الفيا جۇماەۆا بۇگىندە كومپانيانىڭ الەۋمەتتىك جاۋاپكەرشىلىگى اياسىندا ءتۇرلى جوبالاردىڭ قولعا الىنعانىن جەتكىزدى. – ءبىزدىڭ ەنەرگەتيك رەتىندەگى باستى مىندەتىمىز – تۇتىنۋشىلاردى ساپالى ەلەكتر جانە جىلۋ ەنەرگياسىمەن قامتاماسىز ەتۋ. الايدا, ءبىز وبلىستىڭ ەكونوميكالىق ومىرىنە قاتىسۋمەن عانا شەكتەلگەن ەمەسپىز. كومپانيانىڭ الەۋمەتتىك جوبالارى دا بارشىلىق. بۇگىنگى مەموراندۋم كومپانيانىڭ وسى باعىتتاعى جۇمىسىنىڭ جالعاسى, – دەدى ۆيتسە-پرەزيدەنت. قازىرگى كەزدە وسكەمەندە بيزنەستىڭ الەۋمەتتىك جاۋاپكەرشىلىگى باعىتىندا 20-دان استام مەموراندۋم جۇزەگە اسىرىلۋدا. ماسەلەن, №24 مەكتەپ جانىنداعى حوككەي ءمودۋلى, جەكپە-جەك سارايى, جەڭىل اتلەتيكا كەشەنى پايدالانۋعا بەرىلدى. كاسىپورىنداردىڭ الەمدەگى كۇردەلى ەكونوميكالىق جاعدايعا قاراماستان, الەۋمەتتىك جوبالارعا قاراجات ءبولىپ وتىرعانى قۋانتادى. دۋمان اناش. دەرەك: egemen.kz. سۋرەت: وسكەمەن قالاسى اكىمدىگىنىڭ ءباسپاسوز قىزمەتى.