فوتو: الماتى قالاسىنىڭ اكىمدىگى
بەيبىت شاحانوۆتىڭ ايتۋىنشا, الماتىدا مادەنيەت سالاسىنىڭ ءۇش ماڭىزدى نىسانىنا جوندەۋ جانە جاڭعىرتۋ جۇمىستارى جۇرگىزىلىپ جاتىر. سولاردىڭ ءبىرى – «رايىمبەك باتىر» مەموريالدىق كەشەنى.
«بۇل جۇمىس مەموريالدى قالانىڭ جانە ەلدىڭ رۋحاني, تاريحي جانە مادەني ومىرىندە ستراتەگيالىق ماڭىزى بار قازىرگى زامانعى مادەني-تاريحي جانە اعارتۋشىلىق ورتالىققا اينالدىرۋ ماقساتىندا جۇرگىزىلۋدە. جوندەۋ اياقتالعان سوڭ مەموريال قوعامدىق جانە رۋحاني شارالار وتكىزۋگە ارنالعان اشىق ءارى فۋنكتسيونالدى الاڭعا اينالادى», دەدى بەيبىت شاحانوۆ.
سونىمەن قاتار بيىل ناۋرىز ايىندا ن.ساتس اتىنداعى بالالار مەن جاسوسپىرىمدەر تەاترىنىڭ كەشەندى جاڭعىرتۋ جۇمىستارى باستالعان. تەاتردىڭ تاريحي كەلبەتى ساقتالىپ, عيماراتقا زاماناۋي ينجەنەرلىك شەشىمدەر ەنگىزىلمەك. جاڭارعان تەاتردا 226 كورەرمەنگە ارنالعان ورىن بولادى, بۇل ونىڭ سىيىمدىلىعىن ەداۋىر ارتتىرادى.
سونداي-اق قازاقستان جازۋشىلار وداعى عيماراتىنىڭ جوندەۋ جۇمىستارى اياقتالۋعا جاقىن. جوبانى 2026 جىلدىڭ باسىندا اياقتاۋ جوسپارلانعان. جاڭارتىلعان كەڭىستىك ۇلتتىق ادەبيەتتى دامىتۋعا, مادەني بىرەگەيلىكتى نىعايتۋعا جانە ادەبي-اعارتۋشىلىق باستامالاردى قولداۋعا ارنالعان ورتاعا اينالادى.
قالادا ءۇش جاڭا مادەني نىساننىڭ – جاستار تەاترى, تسيرك جانە زووباقتىڭ جوبالىق جۇمىستارى جۇرگىزىلىپ جاتىر. جاستار تەاترىنىڭ قۇرىلىسى 2026 جىلدىڭ ناۋرىز ايىندا باستالماق.
مادەنيەتپەن قاتار, سپورت ينفراقۇرىلىمىن دامىتۋ دا باسىم باعىتتاردىڭ ءبىرى. اكىم ورىنباسارىنىڭ سوزىنشە, الماتى ەلىمىزدىڭ سپورت كادرلارىن دايارلايتىن باستى ورتالىقتاردىڭ ءبىرى سانالادى.
«بيىل ناۋرىزباي جانە تۇركسىب اۋداندارىندا وليمپيادالىق باسسەيندەرى بار ەكى جاڭا دەنە شىنىقتىرۋ-ساۋىقتىرۋ كەشەنىنىڭ قۇرىلىسىن باستاۋدى جوسپارلاپ وتىرمىز. كەلەسى جىلى تاعى ءتورت سپورت كەشەنىنىڭ قۇرىلىسى سايالى, اقجار, قاراسۋ جانە شۇعىلا شاعىناۋداندارىندا باستالادى», دەدى ول.
قالانىڭ سپورتتىق ومىرىندەگى ماڭىزدى جوبالاردىڭ ءبىرى – 35 مىڭ كورەرمەنگە ارنالعان جاڭا فۋتبول ستاديونىنىڭ قۇرىلىسى. نىسان UEFA-نىڭ 4-سانات ستاندارتىنا تولىق ساي بولماق.
بۇدان بولەك, الماتىنىڭ باستى سپورتتىق نىساندارىنىڭ ءبىرى – «مەدەۋ» مۇز ايدىنى كەشەنى دە جاڭارتىلىپ جاتىر. ەكى جىلعا جوسپارلانعان بۇل جوبا اياسىندا كەشەن ءوزىنىڭ حالىقارالىق سپورتتىق-تۋريستىك مارتەبەسىن ساقتاپ, كەلۋشىلەر ءۇشىن ودان ءارى تارتىمدى بولماق.
