فورۋمنىڭ اشىلۋ سالتاناتىندا شىمكەنت قالاسى اكىمىنىڭ ورىنباسارى سارسەن قۇرانبەك ءسوز سويلەپ, ءىس-شارانىڭ ءمان-ماڭىزى, ايەلدەردىڭ قوعامداعى ورنى تۋرالى ايتتى.
«جالپى, ەلىمىزدەگى ايەل, قىز-كەلىنشەكتەر قاشان دا ءوزىنىڭ نازىك قالپىمەن وتباسىنىڭ شىراقشىسى بولىپ كەلەدى. جارىنا سۇيەۋ بولاتىن دا, بالا تاربيەلەپ, انا بولاتىن دا ايەلدەر. سونىمەن قاتار بۇگىندە ايەلدەر وتباسى, وشاق قاسىندا قالا بەرمەي, مەملەكەت ىسىنە ارالاسىپ, ەكونوميكانىڭ دامۋىنا ءوز ۇلەستەرىن قوسىپ جاتىر. قازىردىڭ وزىندە كاسىپكەرلىك سالاسىندا ايەلدەردى كوپ كەزدەستىرۋگە بولادى. شاعىن جانە ورتا كاسىپكەرلىك نىساندارىنا جەتەكشىلىك ەتەتىن, ءتىپتى ءىرى كاسىپورىنداردى باسقاراتىن ايەلدەر بار. ولاردىڭ ءبىلىمى مەن بىلىكتىلىگى ەر ازاماتتاردان ءبىر مىسقال دا كەم ەمەس. ايەل باسقارعان ۇجىمدا انالىق مەيىرىم سەزىلىپ تۇرادى. دالا دەموكراتياسىنا سۇيەنگەن قازاق قوعامىندا ايەلدىڭ وزىندىك قۇقىعى مەن ەركىندىگى بولدى. سونىڭ ءبىر دالەلى قازاق حالقى قىز بالاسىن قاتتى قۇرمەتتەگەن. بۇل سالت بۇگىنگى زامانعا جەتىپ ءالى كۇنگە دەيىن ساقتالىپ كەلەدى. ەلىمىزدە كاسىپكەرلىك, ەكونوميكا سالاسىنان بولەك, ساياساتتا جۇرگەن ايەلدەردىڭ دە قاتارى كەيىنگى ۋاقىتتا ارتىپ كەلە جاتقانى بەلگىلى. باسقارۋشىلىق تىزگىن كىمنىڭ قولىنا تيسە دە, ەڭ باستىسى ادالدىق پەن ادىلەتتىلىكتىڭ اق جولىنان اداسىپ كەتپەۋ ماڭىزدى. تەڭدىك پەن ەركىندىك سالتانات قۇرعان قوعامدا دەموكراتيا قاعيداسىمەن بىرگە ەرەجەلەر مەن زاڭدار قاتاڭ ساقتالاتىن قۇقىقتىق تالاپتار مىندەتتى تۇردە ورىندالۋعا ءتيىس. بۇل – ازاماتتاردىڭ تەگىنە, جىنىسىنا قاراماستان ءاربىر قوعام مۇشەسىنە قويىلاتىن مىندەتتەر», دەدى س.قۇرانبەك.
جيىن بارىسىندا قالا اكىمىنىڭ ورىنباسارى بىرقاتار كاسىپكەر ايەلدى ماراپاتتاپ, العىسحات تابىستادى. ولاردىڭ قاتارىندا الما ارحاباەۆا, فاريدا باكيباەۆا, جاننا بايتەليەۆا, نيلۋفار سايدۋللاەۆا, مەرۋەرت ارحاباەۆا, ديليافرۋز ماديەۆا, اننا زارۋبينا, جانات كەنجەقۇلوۆا, تايسيا ديگاي, ديانا كارامانوۆالار بار. ولار – كاسىپ باستاپ, شاعىن جانە ورتا بيزنەس سالاسىنىڭ وركەندەۋىنە ءبىر كىسىدەي اتسالىسقان جاندار. بۇگىندە كاسىپكەر ايەلدەر قۇرعان كومپانيا ەلگە پايدالى ءونىم ءوندىرىپ, وتاندىق ءوندىرىستىڭ وركەندەۋىنە جول اشتى. ودان بولەك جاڭا كاسىپورىنداردا قانشاما ادام ەڭبەك ەتىپ, ەلدىڭ الەۋمەتتىك ماسەلەسىنىڭ شەشىم تابۋىنا وڭ اسەرىن تيگىزىپ كەلەدى. ىسكەر ايەلدەر تاجىريبەدەن بولەك وپتيميستىك ياكي حالىققا بولسىن دەگەن جاناشىرلىق كوزقاراسىمەن دە دارالانادى. وسى قاسيەتىنىڭ ارقاسىندا بيزنەستەگى قىز-كەلىنشەكتەر بۇگىندە ابىرويدىڭ بيىگىنە شىعىپ, ەلدىڭ العىسىن ارقالاپ ءجۇر.
شىمكەنت قالالىق كاسىپكەرلەر پالاتاسىنىڭ ديرەكتورى سابيرا ادامبەكوۆا ىسكەر ازاماتتارعا, ونىڭ ىشىندە قىز-كەلىنشەكتەرگە كورسەتىلىپ جاتقان قىزمەت, قولداۋ تۋرالى ايتىپ بەردى.
«كاسىپكەرلەر پالاتاسى قالاداعى كاسىپكەرلىكتى دامىتۋ جولىندا بەلسەندى جۇمىس اتقارىپ كەلەدى. «ازاماتتارعا ارنالعان ۇكىمەتپەن» بىرگە پالاتادا كاسىپكەرلەرگە كوپسالالى قىزمەت كورسەتۋ ورتالىعى اشىلدى. وندا زاڭدى تۇلعالارعا قاتىستى 800-گە جۋىق مەملەكەتتىك قىزمەت ء«بىر تەرەزە» قاعيداسى بويىنشا ىسكە اسىرىلادى. ستاتيستيكاعا جۇگىنسەك, جىل باسىنان بەرى كاسىپكەرلەرگە 9960 قىزمەت ۇسىنىلدى. ونىڭ ىشىندە بۋحگالتەرلىك ەسەپ جۇرگىزۋ, ستاتيستيكالىق ەسەپكە الۋ سياقتى قىزمەت تۇرلەرى باسىم. سونىمەن قاتار بيزنەس-جوسپار ءتۇزۋ, جىلجىمايتىن م ۇلىكتى مەملەكەتتىك تىركەۋ, تەحنيكالىق پاسپورت بەرۋ سەكىلدى قىزمەتتەر دە كوبىرەك سۇرانىسقا يە. بيزنەس-جوسپار ازىرلەۋ مەن سۇيەمەلدەۋ جۇمىستارىنىڭ ناتيجەسىندە كاسىپكەرلىك سۋبەكتىلەرى جالپى سوماسى 1 ملرد 308 ملن تەڭگەگە قارجىلاندىرىلدى. سونداي-اق جاڭا جوبالار ىسكە اسۋىنىڭ ارقاسىندا 50-دەن استام جاڭا جۇمىس ورنى قۇرىلدى. ودان بولەك كاسىپكەرلەر پالاتاسى بىرنەشە جىلدان بەرى ء«بىر اۋىل – ءبىر ءونىم» جوباسىن ءساتتى جۇزەگە اسىرىپ وتىر. شىمكەنتتىك شەبەرلەردىڭ ءىسىن دامىتىپ, جەرگىلىكتى ونىمدەردىڭ ساپاسىن ارتتىرۋعا, ىلگەرىلەتۋگە باعىتتالعان بۇل جوباعا قاتىسۋشىلار اراسىندا ىسكەر ايەلدەر كوپ. ولاردىڭ باستامالارى تىڭ جوبالاردى قولعا الۋمەن ەرەكشە. وسىلايشا, ايەل ازاماتتاردىڭ ۇلەسىنىڭ ناتيجەسىندە مەگاپوليستە شاعىن جانە ورتا كاسىپكەرلىك قانات جايىپ كەلەدى. ول وتە جاقسى ءۇردىس. سەبەبى ەكونوميكانى العا سۇيرەيتىن تاپ وسى شاعىن جانە ورتا بيزنەستىڭ وكىلدەرى. شەتەلدە ونىڭ ۇلەسى جالپى وڭىرلىك ءونىم كولەمىندە وتە جوعارى. ءبىز دە وسىنداي كورسەتكىشكە قول جەتكىزۋىمىز كەرەك. سوندىقتان ىسكەر ايەلدەردەن دە كۇتەر ءۇمىتىمىز مول», دەدى س.ادامبەكوۆا.
جيىنعا كاسىپكەرلەر پالاتاسىنىڭ شاقىرۋىمەن ارنايى قاتىسقان «دامۋ» كاسىپكەرلىكتى دامىتۋ قورى» اق شىمكەنت قالالىق فيليالى ديرەكتورىنىڭ ورىنباسارى دۋمان باجيكەي جينالعان قاۋىمعا بيزنەسكە قارجىلاي, سەرۆيستىك قولداۋ كورسەتۋ باعدارلامالارى تۋرالى ءتۇسىندىرىپ بەردى. ونىڭ ايتۋىنشا, «دامۋ» قورى كاسىپكەرلەردىڭ ەكىنشى دەڭگەيلى بانكتەردەن العان نەسيەلەرىنىڭ پايىزدىق مولشەرلەمەسىنە سۋبسيديا بولۋمەن قاتار كەپىلدىك قولداۋ كورسەتۋگە دە باسا نازار اۋدارىپ وتىر.
فورۋم بارىسىندا ءارتۇرلى سالا وكىلدەرى ءسوز الىپ, ىسكەر ايەلدەر قاۋىمداستىعىنىڭ قىز-كەلىنشەكتەردىڭ كاسىپكەرلىك باستاماسىن جۇزەگە اسىرۋداعى ماڭىزىن اتاپ ءوتتى. ماسەلەن, «ASMAR» قازاقستان كاسىپكەر ايەلدەرىنىڭ ۇلتتىق قاۋىمداستىعى ءتورايىمى ءلاززات رامازانوۆا قوعامدىق ۇيىمنىڭ قۇرىلۋ تاريحىنا توقتالسا, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەسى بايان جاندوسوۆا وسىنداي اۋقىمدى ءىس-شارالار جاستاردىڭ قىزىعۋشىلىعىن ارتتىرىپ, جوبالاردى قالاي ءساتتى جۇزەگە اسىرۋ تۇرعىسىنان ولارعا ۇلگى-ونەگە بولاتىنىن اتاپ ءوتتى.
جيىن بارىسىندا شىمكەنت قالالىق ىسكەر ايەلدەر كەڭەسىنىڭ ءتورايىمى الما ارحاباەۆا ۇيىمنىڭ دامۋ تاريحى مەن جەتىستىكتەرى جونىندە اڭگىمەلەپ, كاسىپكەرلەر پالاتاسىمەن بىرگە قولعا الىنعان ءساتتى جوبالار تۋرالى ايتىپ بەردى. سونداي-اق فورۋمعا ەلىمىزدىڭ وزگە وڭىرلەرىنەن كەلگەن ىسكەر ايەلدەر قاۋىمداستىعىنىڭ جەتەكشىلەرى دە ءسوز الىپ, ءارتۇرلى كادەسىيلارمەن ماراپاتتالدى. ودان وزگە ءسان ۇلگىلەرىنەن دەفيلە كورسەتىلىپ, جەرگىلىكتى شەبەرلەردىڭ تۋىندىلارى قويىلعان كورمە ۇيىمداستىرىلدى.
