ۇلىبريتانيانىڭ ەڭ تانىمال حوررور-فەستيۆالىنىڭ ءبىرى سانالاتىن بۇل شاراعا كورەرمەن كوپ جينالادى. وندا فيلم كورسەتىلىمدەرىن, بايقاۋ باعدارلامالارىن, تاقىرىپتىق كورمەلەر مەن تاۋەلسىز كينو پرەمياسىنىڭ (Indie Film Awards) ماراپاتتاۋ ءراسىمىن ۇسىنادى. «جەزتىرناق» ءفيلمى «Best Score» سىيلىعىن «قازاق ەتنوستىق ناقىشىنداعى ەرەكشە مۋزىكاسى ءۇشىن» يەلەندى. قازىلار القاسى ۇلتتىق ينتوناتسيالاردىڭ, فول-كلورلىق اۋەندەردىڭ جانە زاماناۋي كينومۋزىكانىڭ ەرەكشە ۇيلەسىمىن اتاپ ءوتتى. ساۋندترەكتىڭ اۆتورى – كومپوزيتور اباي اقباەۆ.
«بۇل جەڭىس – ءفيلمنىڭ عانا ەمەس, ۇلتتىق مۋزىكانىڭ جەڭىسى. ءبىزدىڭ مادەني بىرەگەيلىگىمىزدىڭ حالىقارالىق دەڭگەيدە باعالانۋى زور ماقتانىش. اتاۋلى ماراپات قازاق مۋزىكاسىنىڭ, فولكلورىمىزدىڭ رۋحىن, مىنەزىن جانە ميستيكالىق قۋاتىن جەتكىزە الاتىن زاماناۋي ءتىل بولا الاتىنىن دالەلدەيدى», دەدى «Clover Street Production» ستۋدياسىنىڭ باس ديرەكتورى ۆالەريا كارابان.
ونىڭ ايتۋىنشا, سوڭعى جىلدارى قازاق مۋزىكاسى مەن كينوسى ۇلتتىق ءداستۇر مەن زاماناۋي ءۇندى ۇيلەستىرە وتىرىپ, حالىقارالىق دەڭگەيگە كوتەرىلدى. حالىقتىق اۋەندەردى جاڭا ەستەتيكادا قايتا ۇسىنۋدان باستاپ, تۇپنۇسقاداعى كينومۋزىكالىق كومپوزيتسيالارعا دەيىن الەمدىك مادەني كەڭىستىكتىڭ ءبىر بولىگىنە اينالىپ كەلەدى.
«جەزتىرناق» – قازاق ميفولوگياسىنىڭ موتيۆتەرىنە نەگىزدەلگەن حوررور-كومەديا. ءفيلمنىڭ وقيعا جەلىسى بلوگەر جىگىت پەن اۋقاتتى بويجەتكەننىڭ تانىستىعى مەن قارىم-قاتىناسىنىڭ دامۋىن سۋرەتتەيدى, الايدا قىز جەزتىرناق بولىپ شىعادى. كارتينانى «Clover Street Production» ستۋدياسى تۇسىرگەن بولاتىن. ستسەناري اۆتورلارى – ءسابيت راقىمباەۆ, اۋەز تۇرماگامبەتوۆ, ءنۇرالي سۇلتانوۆ جانە يلمير ساعيتوۆ. باستى رولدەردى ەسەنتاي نيازباەۆ پەن دينارا ميراسبەك سومداعان.
بۇعان دەيىن فيلم كانادادا وتكەن «The Bloody Horror International Film Festival»-دە «Horror-Mystery Feature Film» اتالىمى بويىنشا باس جۇلدەنى جەڭىپ العان, سونداي-اق جاپونيانىڭ «Karatsu International Film Festival» فەستيۆالىندە كورسەتىلىپ, اكتەر ەسەنتاي نيازباەۆ «ەكىنشى پلانداعى ەڭ ۇزدىك ەر ادام ءرولى» اتالىمىندا ماراپاتتالعان.
