بۇعان دەيىن دارىندى كۇيشىنىڭ مۇنداي جەكە كەشى وتپەگەن ەكەن. قاسيەتتى دومبىرانىڭ ءۇنى كۇمبىرلەگەن كۇي كەشىنە جۇرتشىلىق كوپ جينالدى.
قايرات ايتباەۆ – ارقا كۇيشىلىك مەكتەبىنىڭ وكىلى. شەرتپە كۇيدىڭ شەبەرى. سونداي-اق ول – ىزدەنىمپاز زەرتتەۋشى. تاتتىمبەت مۇراسىن زەرتتەپ, ايتۋلى تۇلعانىڭ ءبىراز شىعارماسىن نوتاعا تۇسىرگەن. سوندىقتان بۇگىنگى كەشىن ۇلى كۇيشىنىڭ مەرەيتويىنا تەگىن ارناپ وتىرعان جوق.
تالانتتى ونەرپاز جيىلعان قاۋىمعا ەڭ الدىمەن تاتتىمبەتتىڭ تۋىندىلارىن ۇسىندى. ونىڭ «سارىجايلاۋ», «قىرمىزى قوسباسار», «سىلقىلداق» كۇيلەرىن ناقىشىنا كەلتىرىپ ورىندادى. ۇلى كۇيشىنىڭ شىعارمالارى – نازىك سىرعا تولى. ادامدى بىردەن ەلىتىپ اكەتەدى. جان-دۇنيەڭىز بىرەسە ويعا, بىرەسە مۇڭعا باتادى. كەيدە كوز الدىڭىزعا كوك شالعىنى جايقالعان جايلاۋ كەلەدى. ءتىپتى كەشكى ىمىرتتاعى دالانىڭ اۋەزدى اۋەنىن تىڭداعاندايسىز. الىستان تۇلپارلار تۇياعىنىڭ ءدۇبىرى ەستىلگەندەي بولادى. كەش يەسى ابىكەن حاسەنوۆتىڭ «قوڭىرى» مەن تولەگەن مومبەكوۆتىڭ «سالتاناتىن» تارتقاندا دا وسىنداي سەزىمدى باستان كەشتىك. سونىمەن قاتار نۇرعيسا تىلەنديەۆتىڭ سيرەك ورىندالاتىن «كوكشەتاۋ» شىعارماسىن كۇمبىرلەتتى. بۇعان قوسا, باسقا دا كورنەكتى كۇيشىلەردىڭ تۋىندىلارىن تارتۋ ەتتى. جالپى, قايرات كۇيدى بابىنا كەلتىرىپ تارتادى. تىڭدارماندى كۇي سازىنا ءجىپسىز بايلاپ قويادى.
كەش بارىسىندا كۇيمەن بىرگە اسەم ءان ايتىلىپ, جىر وقىلدى. ايتالىق, بەلگىلى كۇيشى جانعالي ءجۇزباي, ءداستۇرلى ءانشى سەرجان مۇسايىن, تەرمەشى كۇنسۇلۋ تۇرىكپەن, كۇيشى نۇرمۇحامەت جاقانوۆ جانە حالىقارالىق, رەسپۋبليكالىق بايقاۋلاردىڭ لاۋرەاتتارى ۆەنەرا تابىس, ايدوس سانيازبەك ۇلى, مۇرات سۇلتانباي, ءاليحان مولدابەك ۇلى, ايتولقىن توقتاعان ونەر كورسەتىپ, كورەرمەن ريزاشىلىعىنا بولەندى. جاس اقىندار تولەگەن مەللات پەن تىلەۋبەك باتىس دۇركىرەتىپ جىر وقىدى. كەشتى اقىن, جازۋشىلار وداعىنىڭ مۇشەسى ۇمتىل زارىققان اياققا قۇيعان استاي جيناقى جۇرگىزىپ, كەش يەسىنىڭ بولمىسىن كەستەلى جىرمەن ورنەكتەپ وتىردى.
مادەني شارا سوڭىندا بەلگىلى مەملەكەت جانە قوعام قايراتكەرى دۇيسەن قاسەيىنوۆ ءسوز الىپ, وسىدان ەكى جىل بۇرىن تۇركيادا تاتتىمبەت اتامىزعا ەسكەرتكىش قويىلعانىن ايتىپ, ۇلى تۇلعاعا ارناپ كەرەمەت كۇي كەشىن ارناعان قايرات ايتباەۆقا جىلى لەبىزىن ءبىلدىردى.
