فوتو: ەرلان ومار
بۇل – قازاقستاندى لايىقتى ەڭبەك پەن ءادىل ەڭبەكاقىعا قاتىستى حالىقارالىق ستاندارتتارعا جاقىنداتاتىن تاريحي شەشىم.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ ءتيىستى زاڭعا قول قويۋى – ەلدەگى ەڭبەككەرلەردىڭ لايىقتى ءومىر ءسۇرۋ دەڭگەيىن قامتاماسىز ەتۋ مەن الەۋمەتتىك ادىلەتتىلىكتى نىعايتۋ جولىنداعى ماڭىزدى قادامداردىڭ ءبىرى.
№131 كونۆەنتسيانى راتيفيكاتسيالاۋ – جاي عانا رەسمي اكت ەمەس, ول قازاقستاننىڭ الەۋمەتتىك ساياساتىنىڭ دامۋىنداعى ماڭىزدى بەلەس, ەڭبەككە جانە ەڭبەك ادامىن قۇرمەتتەۋدىڭ كورىنىسى.
حالىقارالىق ەڭبەك ۇيىمى №131 كونۆەنتسيانى لايىقتى ەڭبەكتىڭ ءتورت تىرەگىنىڭ ءبىرى رەتىندە قاراستىرادى (ەڭبەك قۇقىقتارى, قاۋىپسىزدىك جانە الەۋمەتتىك قورعاۋدى قوسا العاندا). بۇل قۇجات SDG 8: «لايىقتى ەڭبەك جانە ەكونوميكالىق ءوسۋ» اتتى تۇراقتى دامۋ ماقساتىنا , سونىڭ ىشىندە 8.5-مىندەتكە – 2030 جىلعا دەيىن بارلىق ايەلدەر مەن ەرلەر ءۇشىن تولىق جانە ءونىمدى جۇمىسپەن قامتىلۋ مەن لايىقتى ەڭبەكاقىنى قامتاماسىز ەتۋگە باعىتتالعان.
كونۆەنتسيادا ەڭ تومەنگى جالاقىنى انىقتاۋ كەزىندە تەك ەكونوميكالىق فاكتورلار عانا ەمەس, سونىمەن قاتار جۇمىسشىلار مەن ولاردىڭ وتباسىلارىنىڭ قاجەتتىلىكتەرى, باعا دەڭگەيى, جاردەماقىلار, الەۋمەتتىك قورعاۋ جانە كاسىپوداقتاردىڭ شەشىم قابىلداۋ ۇدەرىسىنە قاتىسۋى ەسكەرىلۋى ءتيىس ەكەنى جازىلعان.
كاسىپوداقتار فەدەراتسياسى وسى كونۆەنتسيانىڭ راتيفيكاتسيالانۋى ءۇشىن كوپ جىلدان بەرى ەڭبەك ەتىپ كەلەدى. ءبىز بۇل وقيعانى بۇكىل ەڭبەك قاۋىمداستىعىنىڭ جەڭىسى جانە ۇلتتىق بايلىقتى جاسايتىن ادامدارعا دەگەن قۇرمەت بەلگىسى دەپ باعالايمىز.
كاسىپوداقتار فەدەراتسياسىنىڭ پىكىرىنشە, №131 كونۆەنتسيانىڭ ەرەجەلەرىن ىسكە اسىرۋ قازاقستانعا ەڭ تومەنگى جالاقىنى بەلگىلەۋدىڭ نەعۇرلىم ءادىل جانە اشىق جۇيەسىنە كوشۋگە مۇمكىندىك بەرەدى. بۇل جۇيە ماكروەكونوميكالىق كورسەتكىشتەرگە عانا ەمەس, ەڭ الدىمەن ەڭبەك ادامدارىنىڭ ناقتى ومىرلىك قاجەتتىلىكتەرىنە سۇيەنۋى كەرەك.
كاسىپوداقتار فەدەراتسياسى كونۆەنتسيانى ءىس جۇزىندە جۇزەگە اسىرۋ بارىسىندا مىناداي قاعيداتتاردىڭ قامتىلۋىنا قول جەتكىزۋدى كوزدەيدى:
- ەڭبەككەرلەردىڭ لايىقتى ەڭبەكاقى الۋىنا كەپىلدىكتەردى كۇشەيتۋگە ىقپال ەتەدى;
- الەۋمەتتىك-ەكونوميكالىق فاكتورلاردى ەسكەرە وتىرىپ, ەڭ تومەنگى جالاقىنى رەتتەۋ جۇيەسىنىڭ تيىمدىلىگىن ارتتىرۋدى قامتاماسىز ەتەدى;
- قازاقستاننىڭ الەۋمەتتىك ادىلدىك قاعيداتتارىنا جانە حالىقارالىق ەڭبەك ستاندارتتارىنا بەرىك مەملەكەت رەتىندەگى حالىقارالىق ءيميدجىن نىعايتادى;
- حالىقارالىق ەڭبەك ۇيىمىمەن جانە بۇۇ-نىڭ تۇراقتى دامۋ ماقساتتارىمەن كەلىسىلگەن لايىقتى ەڭبەك كۇن ءتارتىبىن ىسكە اسىرۋ جولىنداعى ماڭىزدى قادام بولادى.
كاسىپوداقتار فەدەراتسياسى كونۆەنتسيا ەرەجەلەرىن ۇلتتىق زاڭناما مەن ۇجىمدىق-شارتتىق قاتىناستاردا ءتيىمدى ىسكە اسىرۋ ءۇشىن ۇشجاقتى ارىپتەستىك اياسىندا بەلسەندى جۇمىس ىستەۋگە دايىن.
