سۋرەت: zakon.kz
بۇگىننەن باستاپ كوپتەن كۇتكەن جاپپاي ءوندىرىس تارتىبىنە كوشتىك. مەن «كia Qazaqstan» زاۋىتىنىڭ دانەكەرلەۋ تسەحىن باسقارامىن. تسەحتىڭ جالپى اۋدانى 14 مىڭ شارشى مەتر بولادى. مۇندا ءبىر اۋىسىمنىڭ ىشىندە 125 دانەكەرلەۋشى جۇمىس ىستەيدى.
ەكى اۋىسىمدىق جۇمىس رەجىمىندە جىلىنا 50 مىڭ شاناق قۇراستىرامىز. ياعني ساعاتىنا شامامەن 16 شاناق جاساپ شىعارامىز. ال كاسىپورىن تولىق وندىرىستىك قۋاتىنا كوشكەن سوڭ, بۇل مەجە 70 مىڭعا دەيىن ارتادى. تسەحتاعى وندىرىستىك جەلىلەردىڭ 58%-ى اۆتوماتتاندىرىلعان. 41 دانەكەرلەۋ روبوتى جۇمىس ىستەپ تۇر. جالپى, نەگىزگى جەلىلەردىڭ 96%-ى اۆتوماتتى رەجىمدە جۇمىس ىستەيدى. روبوتتار شاناقتىڭ قاڭقاسى مەن نەگىزگى سۇيەكتەرىن دانەكەرلەيدى. قول جۇمىسىن قاجەت ەتەتىن جەلىلەردە ءبىزدىڭ ماماندار شاناقتىڭ ورتالىق, ارتقى بولىگىن, الدىڭعى, ارتقى ەدەنىن, سول جاق جانە وڭ جاق دوڭعالاق بەلدەمەسى سياقتى قوسالقى توراپتاردى دانەكەرلەيدى. دانەكەرلەۋشىلەردىڭ جۇمىسىنان كەيىن شاناق بوياۋ تسەحىنا كىرەدى.
بىرىنشىدەن, قوستانايدا «Kia» برەندتەرىن جاساپ شىعاراتىن جاڭا زاۋىتتىڭ اشىلۋى – جالعىز وسى ءوڭىر نەمەسە ەلىمىز ءۇشىن عانا ەمەس, بۇتىندەي ورتالىق ازيا مەملەكەتتەرى مەن تمد كەڭىستىگىندەگى ەلدەر ءۇشىن دە اسا ماڭىزدى وقيعا. ياعني ءبىزدىڭ زاۋىت ەلىمىزدىڭ ەكسپورتتىق الەۋەتىنىڭ ارتا تۇسۋىنە ايتارلىقتاي ىقپال ەتەدى.
ەكىنشىدەن, «كia Qazaqstan» زاۋىتىندا كوبىنە جاستار جۇمىس ىستەيدى. دەمەك, جاستارعا شەتەلگە شىقپاي-اق, وسى ءوزىمىزدىڭ كاسىپورىننىڭ ىشىندە ءجۇرىپ اۆتوونەركاسىپ سالاسىنداعى وزىق تەحنولوگيانى مەڭگەرىپ, «اقىلدى» جەلىلەردە جۇمىس ىستەۋ مۇمكىندىگى تۋىپ وتىر. مۇنىڭ سىرتىندا, كوپتەگەن جاس مامان شەتەلدىك ينجەنەرلەردىڭ جەتەكشىلىگىمەن ارنايى بىلىكتىلىك ارتتىرۋ كۋرستارىندا وقىپ, ءبىلىم الىپ, ونى تاجىريبەدە كورسەتىپ, وزدەرىنىڭ وسىنداي زاماناۋي كاسىپورىندا ەڭبەك ەتۋگە لايىقتى مامان ەكەنىن دالەلدەدى. وسى ارقىلى ساپالى ءارى جاڭا قۇزىرەتكە يە جۇمىسشىلاردىڭ جاڭا بۋىنى قالىپتاستى. ارينە, الداعى ۋاقىتتا دا ءبىلىم-بىلىگىمىزدى ارتتىرىپ, ءوندىرىستىڭ جاڭا بەلەستەرىن باعىندىرامىز دەگەن ويدامىن. ۇيرەنەرىمىز ءالى دە كوپ.
ۇشىنشىدەن, «Kia» باسشىلارى كەلەشەكتە لوكاليزاتسيانى مىقتاپ قولعا الۋدى جوسپارلاپ وتىر. كوپ كەشىكپەي «Kia» اۆتوكولىكتەرىنە قاجەت بولشەكتەر دە وزىمىزدەن شىعا باستايدى. بۇل ەكى ەل ءۇشىن دە ءتيىمدى بولماق.
دميتري پارفەنوۆ,
«كia Qazaqstan» زاۋىتى دانەكەرلەۋ تسەحىنىڭ باستىعى
