سۋرەت: kolesa.kz
زاۋىت قۇرىلىسى بارىسىندا ينجەنەر قۇرىلىسشىلارىمىز مول تاجىريبە الدى. جالپى, قوستاناي وبلىسىن ماشينا جاساۋ ءوندىرىسىنىڭ ورتالىعىنا اينالدىرعىمىز كەلگەن. بۇگىن سول ماقساتىمىزعا جەتتىك دەپ نىق سەنىممەن ايتۋعا بولادى.
بيىلعى شىلدەدەن باستاپ زاۋىتتا اۆتوموبيلدەر قۇراستىرىلا باستادى, ال بۇگىن ءبىز سەريالىق وندىرىسكە كوشىپ وتىرمىز. جىل سوڭىنا دەيىن كەمىندە 3 مىڭ, ال كەلەسى جىلى 30 مىڭعا جۋىق كولىك شىعارىلادى, ونىڭ 20 مىڭى ۇساق توراپتى ادىسپەن (CKD) وندىرىلەدى. بۇل زاۋىت – زاماناۋي اۆتوموبيل جاساۋ تەحنولوگيالارىن, اتاپ ايتقاندا, ماكسيمالدى اۆتوماتتاندىرۋ مەن تسيفرلىق باسقارۋدى قولداناتىن الەمدىك دەڭگەيدەگى جوعارى تەحنولوگيالىق ءوندىرىس ورنى سانالادى.
ماشينا جاساۋ سالاسىن دامىتۋ ءوڭىردىڭ دامۋىنا مۋلتيپليكاتيۆتىك تۇرعىدان اسەر ەتەدى. اتاپ ايتقاندا, ماشينا جاساۋ سالاسىندا ءبىر جۇمىس ورنىن قۇرۋ باسقا سالالاردا بەس-التى جۇمىس ورنىنىڭ پايدا بولۋىنا سەپتىگىن تيگىزەدى. وندىرىستەردى لوكاليزاتسيالاۋ دەڭگەيىن ارتتىرۋ ءۇشىن جاڭا زاۋىتتىڭ اينالاسىندا قۇرامداس بولشەك جەتكىزۋشىلەرى رەتىندە شاعىن جانە ورتا بيزنەس بەلدەۋى قۇرىلادى.
«كىا» زاۋىتىن قاجەتتى ماماندارمەن قامتاماسىز ەتۋ ماقساتىندا وڭىرلىك كوللەدجدەر مەن جوعارى وقۋ ورىندارىندا ماشينا جاساۋدىڭ 5 باعىتى بويىنشا جاڭا ماماندىقتار اشىلدى. ولاردىڭ ىشىندە ماشينا جاساۋ تەحنولوگياسى, اۆتوماتتاندىرۋ جانە باسقارۋ, ماشينالار مەن جابدىقتاردى پايدالانۋ جانە تەحنيكالىق قىزمەت كورسەتۋ, قارا مەتالل وڭدەۋ, دانەكەرلەۋ ءتارىزدى ماماندىق تۇرلەرى بار. اتالعان ماماندىقتاردى يگەرەتىن ستۋدەنت-جاستاردىڭ ءبىلىم-تاجىريبەسىن ۇشتاۋ ماقساتىندا وڭىردەگى بىرنەشە وقۋ ورنىنا جان-جاقتى ماتەريالدىق-تەحنيكالىق قولداۋ كورسەتىلدى.
ينۆەستورلار ەڭ الدىمەن, وندىرىسكە قولايلى ينفراقۇرىلىمنىڭ بار-جوعىنا قارايتىنى بەلگىلى. سوندىقتان جوبانى ويداعىداي ىسكە اسىرۋ ماقساتىندا زاۋىتقا بولىنگەن جەر اۋماعىن ينجەنەرلىك-كوممۋنيكاتسيالىق ينفراقۇرىلىممەن قامتاماسىز ەتۋ باعىتىندا دا اۋقىمدى جۇمىس اتقارىلدى. ونىڭ سىرتىندا, جاڭا زاۋىتتى قاجەتتى شيكىزاتپەن قامتاماسىز ەتۋ, دايىن ءونىمدى ۇزدىكسىز تاسىمالداۋ ماقساتىندا ۇزىندىعى 4,2 شاقىرىم كىرەبەرىس تاس جول جانە تەك زاۋىت قاجەتىنە عانا پايدالانىلاتىن 5 شاقىرىمدىق تەمىرجول تورابى سالىندى.
قۇمار اقساقالوۆ,
قوستاناي وبلىسىنىڭ اكىمى
