سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
مەملەكەت باسشىسى وسىدان ەكى جىل بۇرىن قوستانايعا ساپارى كەزىندە «Kia Sportage» اۆتوكولىگىنىڭ ءوندىرىسى ىسكە قوسىلعانىن ەسكە سالدى. ەندى مىنە «Kia Motors» كورپوراتسياسىمەن جاسالعان كەلىسىمگە سايكەس زاۋىت اشىلدى.
قاسىم-جومارت توقاەۆ «كia Corporation» پرەزيدەنتى حو-سۋنگ سونگقا جانە كومپانياعا شىنايى ريزاشىلىعىن ءبىلدىرىپ, اۋقىمدى جۇمىس اتقارىلعانىن, ناتيجەسىندە ءوزارا ءتيىمدى جانە جەمىستى بايلانىس نىعايا تۇسكەنىن اتاپ ءوتتى.
– جالپى, بۇگىنگى ايتۋلى وقيعا قازاقستان مەن كورەيا اراسىنداعى ستراتەگيالىق سەرىكتەستىك پەن تابىستى قارىم-قاتىناستىڭ جارقىن كورىنىسى ەكەنى انىق. كورەيا رەسپۋبليكاسى – قازاقستاننىڭ ازياداعى سەنىمدى ارىپتەسى. ءبىز ىنتىماقتاستىعىمىزدى كۇشەيتە تۇسۋگە مۇددەلىمىز. قازىر قازاقستاندا كورەيانىڭ 800-دەن اسا كومپانياسى تابىستى جۇمىس ىستەپ جاتىر. سونىڭ ىشىندە اۆتوكولىك جاساۋ سالاسىن ءوزارا ءتيىمدى ىقپالداستىق كوزى دەپ ايتۋعا تولىق نەگىز بار. بۇگىن اشىلىپ جاتقان بىرەگەي زاۋىت – سونىڭ ايقىن دالەلى. «كia» كورپوراتسياسى اۆتوموبيل شىعاراتىن الەمدەگى 10 ءىرى كومپانيانىڭ قاتارىنا كىرەدى. سونداي-اق «كia» – قازاقستان ازاماتتارى ەڭ كوپ ساتىپ الاتىن ءۇش كولىك ماركاسىنىڭ ءبىرى. «كia» برەندىنىڭ اتاۋى «كوتەرىلىپ كەلە جاتقان» جانە «ازيا» دەگەن ەكى يەروگليفتەن قۇرالۋىنىڭ سيمۆولدىق ءمانى بار. شىن مانىندە, كومپانيا ازيانىڭ جاڭا ەكونوميكالىق ورلەۋى مەن گۇلدەنۋىنىڭ جارقىن كورىنىسىنە اينالدى. «كia» – كەلەشەكتىڭ كورپوراتسياسى. كاسىپورىن شىعاراتىن اۆتوكولىكتەردە وزىق تەحنولوگيا, تارتىمدى ديزاين جانە جوعارى دەڭگەيدەگى سەنىمدىلىك ۇيلەسىم تاپقان, – دەدى پرەزيدەنت.
قاسىم-جومارت توقاەۆ «Kia» كومپانياسى الەۋمەتتىك جاۋاپكەرشىلىك اياسىندا ادام كاپيتالىن دامىتۋعا بەلسەندى تۇردە ينۆەستيتسيا سالىپ كەلە جاتقانىنا توقتالدى.
– الەمدىك اۆتوالپاۋىت ەلىمىزدەگى زاۋىتتى ىسكە قوسپاي تۇرىپ, قازاقستان جانە كورەيا ۋنيۆەرسيتەتتەرىمەن, كوللەدجدەرىمەن ۇزاقمەرزىمدى ىنتىماقتاستىقتى جولعا قويا باستادى. بۇدان بولەك, بىلىكتى كادرلاردى دايارلاۋ ءۇشىن كومپانيا كورپوراتيۆتىك وقۋ ورتالىعىن اشۋدى جوسپارلاپ وتىر. «Kia» وسى ارقىلى قىزمەتكەرلەرگە قامقورلىق – ۇيىم مادەنيەتىنىڭ ماڭىزدى بولشەگى ەكەنىن كورسەتەدى. بۇل شىنايى قۇرمەت پەن نيەتتەستىك ورتاسىن قالىپتاستىرادى. جۇمىسشى ماماندارعا ءدال وسىنداي قارىم-قاتىناس قوعامدا ەڭبەكقورلىق پەن الەۋمەتتىك ادىلدىك قۇندىلىقتارىنىڭ ورنىعۋىنا سەپتىگىن تيگىزەدى. زاۋىتتا ءوندىرىس لوكاليزاتسياسىنا ەكپىن قويىلىپ وتىر. بۇل شىعارىلاتىن ونىمدەگى قازاقستاندىق ۇلەستى ەداۋىر ارتتىرۋعا مۇمكىندىك بەرەدى. ساراپشىلاردىڭ ەسەبىنشە, اۆتوزاۋىتتاعى ءاربىر جۇمىس ورنى لوگيستيكا, سەرۆيس, ينفراقۇرىلىم سالالارىندا جاناما تۇردە بەس-التى ادامدى جۇمىسپەن قامتۋعا ىقپال ەتەدى. بۇل – جاي عانا ءوندىرىس جەلىسىنىڭ كەڭەيۋى ەمەس, تولىق ونەركاسىپ كلاستەرىن قالىپتاستىرۋ ءۇشىن جاسالعان زور قادام. مۇنداي جۇيەدە شاعىن جانە ورتا بيزنەس تۇراقتى دامۋعا مۇمكىندىك الادى. ءوندىرىستى ۇيىمداستىرۋدىڭ وسىنداي كەشەندى ءتاسىلى قوستاناي وبلىسىنىڭ عانا ەمەس, تۇتاس ەلىمىزدىڭ يندۋستريالىق الەۋەتىن كۇشەيتەدى. «Kia» زاۋىتى قازاقستاندىق اۆتوونەركاسىپتىڭ وركەندەۋىنە تىڭ سەرپىن بەرەتىنىنە سەنىمدىمىن. جاڭا كاسىپورىننىڭ جۇمىسى وتاندىق اۆتوپاركتىڭ جاڭارۋىنا سەپتىگىن تيگىزەدى. ول قالالار مەن كۇرە جولدارداعى جول قوزعالىسى قاۋىپسىزدىگىنە وڭ اسەر ەتەدى, – دەدى مەملەكەت باسشىسى.
پرەزيدەنت مەملەكەتتىڭ ماشينا جاساۋ سالاسىنا باسا ءمان بەرەتىنىن جەتكىزدى.
– بىلتىر وسى سالاعا 290 ملرد تەڭگەدەن اسا ينۆەستيتسيا تارتىلدى. بۇل – الدىڭعى جىلمەن سالىستىرعاندا ەكى جارىم ەسە كوپ. وسى ءۇردىس بيىل دا جالعاسۋدا. جىل باسىنان بەرى وسى سالاعا 178 ملرد تەڭگە قاراجات سالىندى. ينۆەستورلار قازاقستانعا زور قىزىعۋشىلىق تانىتىپ وتىر. اۋقىمدى شارالاردىڭ ناتيجەسىندە بۇل باعىتتا بىرقاتار تابىسقا قول جەتكىزدىك. وتكەن جىلى ەلىمىزدە 145 مىڭنان اسا كولىك شىعارىلدى. استانا, الماتى, سەمەي, ورال, كوكشەتاۋ, قوستاناي جانە ساران قالالارىندا اۆتوكولىك وندىرىسىنە قاتىستى كاسىپورىندار جۇمىس ىستەپ تۇر. 10 مىڭنان اسا ازاماتىمىز وسى سالادا ەڭبەك ەتەدى. ونىڭ جارتىسىنا جۋىعى – جاستار. ال قوستانايداعى زاۋىتتا 1,5 مىڭ ادام جۇمىس ىستەيتىن بولادى. جۇمىسشىلار جاڭا داعدىلاردى يگەرىپ, بىلىكتى مامان رەتىندە قالىپتاسادى. الداعى ۋاقىتتا كاسىپورىن ينجەنەرلەردىڭ ناعىز شەبەرحاناسى بولادى دەپ سەنەمىن, – دەدى قاسىم-جومارت توقاەۆ.
پرەزيدەنت جاقىندا ۇكىمەتكە ەكونوميكالىق احۋالدى تۇراقتاندىرۋ ءۇشىن ناقتى شارالار ازىرلەۋ تۋرالى تاپسىرما بەرىلىپ, وسىعان بايلانىستى بىرقاتار ماڭىزدى شەشىم قابىلدانعانىن ايتتى.
– سوعان سايكەس ەندى ازاماتتارعا اۆتوكولىكتى ليزينگپەن الۋ مۇمكىندىگى ۇسىنىلادى. سونىڭ ارقاسىندا اۆتوكولىكتەر حالىققا مەيلىنشە قولجەتىمدى بولا تۇسپەك. ەلىمىزدە «Kia Qazaqstan» زاۋىتىنىڭ ىسكە قوسىلۋى وسى سالانى تەحنولوگيالىق تۇرعىدان جاڭعىرتۋعا زور سەرپىن بەرەرى ءسوزسىز. كاسىپورىن بولاشاقتا باسقا دا جاڭا كولىك تۇرلەرىن شىعارادى دەپ سەنەمىن. وسىلايشا, الەمدىك وزىق تالاپتارعا ساي كولىكتەرىمىزدى سىرتقى نارىققا, ياعني شەتەلگە شىعارۋعا مۇمكىندىك بولماق. قازاقستان جاھاندىق اۆتوكولىك ونەركاسىبىنىڭ دامۋىنا بار كۇش-جىگەرىن سالۋعا دايىن, – دەدى پرەزيدەنت.
مەملەكەت باسشىسى قاسىم-جومارت توقاەۆ «Kia Corporation» پرەزيدەنتى حو-سۋنگ سونگتى ءىى دارەجەلى «دوستىق» وردەنىمەن ماراپاتتادى.
– ءبىز ءcىزدىڭ قازاق-كورەي ىنتىماقتاستىعىنىڭ دامۋىنا, قوس حالىقتىڭ اراسىنداعى دوستىقتىڭ نىعايۋىنا قوسقان ۇلەسىڭىزدى جوعارى باعالايمىز. شىن مانىندە, ەلىمىزدىڭ اۆتوكولىك سالاسىن دامىتۋعا سىڭىرگەن ەڭبەگىڭىز مول, – دەدى پرەزيدەنت.
«Kia Qazaqstan» زاۋىتىن سالۋ تۋرالى شەشىم 2023 جىلى قابىلداندى. كاسىپورىن قوستاناي قالاسىنىڭ يندۋستريالىق ايماعىنداعى 62,95 گەكتار اۋماقتا ورنالاسقان. زاۋىت جىلىنا 70 مىڭ كولىك وندىرە الادى. ينۆەستيتسيا كولەمى – 131,5 ملرد تەڭگە. كاسىپورىندا 1 500 جۇمىس ورنى اشىلعان. ال ونىڭ ءونىمى قازاقستانعا, ورتالىق ازيا جانە ەاەو ەلدەرىنىڭ نارىقتارىنا شىعارىلادى.
