جيىنعا ماڭعىستاۋ وبلىستىق دەنساۋلىق ساقتاۋ باسقارماسىنىڭ باسشىسى بەكبولات ءىزباساروۆ, تۇركيانىڭ «MLP Care» جانە «UMC Medical @ Mediast Medical Travel» مەديتسينالىق ۇيىمدارىنىڭ باسشىلارى – ۋميت جام مەن مەحمەت شاحين قاتىستى.
تاراپتار بىرلەسكەن عىلىمي جانە ءبىلىم بەرۋ جوبالارىن جۇزەگە اسىرۋ, قازاقستاندىق جانە تۇركيالىق دارىگەرلەر اراسىندا ونلاين كونسۋلتاتسيالار ۇيىمداستىرۋ, كلينيكالىق تاجىريبە الماسۋدىڭ ناقتى مەحانيزمدەرىن ەنگىزۋ جانە اقتاۋ قالاسىنداعى مەديتسينالىق مەكەمەلەردىڭ الەۋەتىن ارتتىرۋ باعىتتارىن قامتيتىن ىنتىماقتاستىق ماسەلەلەرىن تالقىلادى.
قىسقا مەرزىمدى جوسپارلار قاتارىندا بايلانىس تۇلعالارىن بەكىتۋ جانە ماماندار اراسىنداعى تاجىريبە الماسۋدى جۇيەلى جولعا قويۋ تۋرالى ايتىلسا, ۇزاق مەرزىمدى پەرسپەكتيۆادا – مەديتسينالىق مەكەمەلەردىڭ ينفراقۇرىلىمىن حالىقارالىق ستاندارتتارعا ساي جەتىلدىرۋ ماسەلەلەرى قاراستىرىلدى.
اقتاۋ قالاسىنىڭ اكىمى ابىلقايىر بايپاقوۆ ەكى ەل اراسىنداعى دوستىق پەن ءوزارا ىنتىماقتاستىقتىڭ نىعايىپ كەلە جاتقانىن تىلگە تيەك ەتىپ, بۇل باعىتتاعى جاڭا باستامالارعا قولداۋ بىلدىرەتىنىن جەتكىزدى.
«قازاقستان مەن تۇركيا – ەجەلدەن باۋىرلاس ەلدەر. جۋىردا عانا انكارا قالاسىنا جاساعان ساپارىمىزدا سىزدەردىڭ كىشىپەيىلدىگىڭىز بەن قوناقجايلىلىعىڭىزعا تاعى ءبىر مارتە كوز جەتكىزدىك. بۇگىنگى باستاما – مەديتسينالىق ارىپتەستىكتىڭ جاڭا كەزەڭىنە جول اشارى ءسوزسىز. اقتاۋدىڭ اق حالاتتى ابزال جاندارىمەن تاجىريبە ءبولىسىپ, حالىققا ساپالى قىزمەت كورسەتۋدە بىرلەسىپ جۇمىس ىستەيمىز دەگەن سەنىمدەمىن», دەدى ول.
ءوز كەزەگىندە «MLP Care» كومپانياسىنىڭ جەتەكشىسى مەحمەت شاحين اقتاۋعا العاش رەت كەلگەنىن ايتىپ, قالا حالقى مەن مەديتسينا سالاسىنداعى ارىپتەستەرمەن ىنتىماقتاستىق ورناتۋعا نيەتتى ەكەنىن جەتكىزدى.
«اقتاۋعا العاش اياق باسىپ تۇرمىن. بۇل جەر ءوز مادەنيەتى مەن ءداستۇرىن بەرىك ۇستاناتىن ەرەكشە قالا ەكەن. تۇركياداعىداي جىلى قابىلداۋعا ريزاشىلىعىمدى بىلدىرەمىن. ءبىزدىڭ ماقسات – جيناعان تاجىريبەمىز بەن ءبىلىمىمىزدى قازاقستاندىق ارىپتەستەرىمىزبەن ءبولىسۋ», دەدى مەحمەت شاحين.
كەزدەسۋ اياسىندا اقتاۋ قالاسى مەن ماڭعىستاۋ وبلىسىنىڭ دەنساۋلىق ساقتاۋ باسقارماسى جانە تۇركيانىڭ «MLP Care» جانە «UMC Medical @ Mediast Medical Travel» كومپانيالارى اتىنان ءوزارا ىنتىماقتاستىق تۋرالى مەموراندۋمعا قول قويىلدى. بۇل قۇجات مەديتسينالىق ءتۋريزمدى دامىتۋ, مامانداردىڭ كاسىبي بىلىكتىلىگىن ارتتىرۋ جانە حالىقارالىق ستاندارتتارعا ساي مەديتسينالىق قىزمەت كورسەتۋدى جولعا قويۋعا باعىتتالعان.
ايتا كەتەيىك, «MLP Care Group» – تۇركياداعى ەڭ ءىرى جەكە مەديتسينالىق حولدينگتەردىڭ ءبىرى. قۇرامىنا «Medical Park», «Liv Hospital» جانە «VM Medical Park» سىندى تانىمال برەندتەر ەنگەن. حولدينگكە قاراستى 37 اۋرۋحانادا 22 مىڭنان استام قىزمەتكەر ەڭبەك ەتەدى. سونىمەن قاتار, 7 مىڭ توسەك ورنى مەن 300-دەن استام وتا جاساۋ بولمەسى بار. ال «UMC Medical @ Mediast Medical Travel» ورتالىعى ونكولوگيا, ترانسپلانتولوگيا, گەماتولوگيا, نەيروحيرۋرگيا جانە ورتوپەديا سالالارىندا قىزمەت كورسەتەدى. بۇگىنگە دەيىن 5 500-دەن استام قازاقستاندىق ناۋقاس وسى ورتالىقتان مەديتسينالىق كومەك العان.
ماڭعىستاۋ وبلىسى
