قازاق كينوسى الەمدىك ساحنادا قارقىندى دامىپ كەلەدى

مينيسترلىكتىڭ مالىمەتىنشە, سوڭعى ەكى جىلدا ءۇش پيتچينگ ۇيىمداستىرىلىپ, سونىڭ ناتيجەسىندە 57 جوبانىڭ 40-ى جاس رەجيسسەرلەر مەن ستسەناريستەردىڭ قاتىسۋىمەن ءتۇسىرىلىپ جاتىر.

«2024 جىلى كونكۋرسقا ىرىكتەۋ ەرەجەلەرى قايتا قارالىپ, پروتسەسس اشىق ءارى ءتيىمدى بولدى. باسىم تاقىرىپتار بەلگىلەنىپ, ستسەناري ازىرلەۋ مەرزىمى قىسقاردى. قۇجاتتاردى ەلەكتروندى تۇردە قابىلداۋ ەنگىزىلىپ, ساراپشىلار كەڭەسىنىڭ داۋىس بەرۋ مەحانيزمى جەتىلدىرىلدى. بۇل وزگەرىستەر قازاق تىلىندەگى ستسەناريلەر ۇلەسىن 75%-عا جەتكىزىپ, رەجيسسەرلەردىڭ قاتىسۋىن ارتتىردى», دەلىنگەن حابارلامادا.

مەملەكەتتىك قولداۋدىڭ ناقتى ناتيجەسى رەتىندە «Qaitadan» ءفيلمى ايرىقشا اتالدى. كارتينانىڭ وتاندىق پروكاتتاعى تابىسى 1 ميلليارد تەڭگەدەن اسىپ, سالىنعان ينۆەستيتسيانى بەس ەسەگە قايتارعان.

سونىمەن قاتار 2025 جىلى جاڭا تالانتتاردى انىقتاۋ ماقساتىندا «JARQYRA» رەسپۋبليكالىق كاستينگى باستاۋ الدى. جوبا وڭىرلەردەگى جاس اكتەرلەرگە ۇلكەن ەكراندا ونەر كورسەتۋگە مۇمكىندىك بەرىپ, قازاق كينوسىنىڭ جاڭا بۋىنىن قالىپتاستىرۋعا جول اشتى.

«قازاق كينوسىنىڭ ونكۇندىگى» اكتسياسى اياسىندا وتاندىق فيلمدەردىڭ كورسەتىلىمى قاراعاندى, جامبىل, سولتۇستىك قازاقستان, باتىس قازاقستان جانە جەتىسۋ وبلىستارىندا وتكىزىلدى. وتاندىق فيلمدەر كورەرمەنگە قولجەتىمدى بولا ءتۇستى. قازىر ولار تەك كينوتەاترلاردا عانا ەمەس, ونلاين پلاتفورمالاردا دا كورسەتىلەدى. «كينوپويسك» پلاتفورماسىمەن بىرلەسىپ, 17 قازاقستاندىق فيلمنەن تۇراتىن ارنايى جيناق دايىندالدى. وعان «پاتريوتتار ۋاقىتى», «كانيكۋلى off-line 2», «دوس-مۇقاسان», «قاجىمۇقان» جانە باسقا دا تۋىندىلار كىرەدى. بۇل شارا قازاقستاندىق كينەماتوگرافيانىڭ تانىمالدىلىعىن ارتتىرۋعا جاڭا مۇمكىندىكتەر اشىپ وتىر», دەلىنگەن حابارلامادا.

حالىقارالىق دەڭگەيدە دە قازاق كينوسىنىڭ بەدەلى ارتىپ كەلەدى. سوڭعى 30 جىلدا العاش رەت قازاقستان كانن كينوفەستيۆالى اياسىنداعى Marché du Film كينونارىعىنا قاتىسىپ, KazakhCinema ۇلتتىق ستەندى ارقىلى وتاندىق جوبالاردى تانىستىردى. كانندا فرانتسيا جانە گرۋزيانىڭ ۇلتتىق كينوورتالىقتارىمەن, ال اقتاۋدا ازەربايجان, قىرعىزستان, تۇركيا, تۇرىكمەنستان جانە وزبەكستاننىڭ كينو ۇيىمدارىمەن ىنتىماقتاستىق جونىندە كەلىسىمدەر جاسالدى.

سونداي-اق لوكارنو مەن پۋسان فەستيۆالدەرىندە كورسەتىلگەن «سكازكا و مورسكيح پساح» دەرەكتى ءفيلمى مەن «پوبەديتەلەي ۆيدنو نا ستارتە» اتتى بىرلەسكەن جوبا حالىقارالىق كورەرمەننىڭ جوعارى باعاسىنا يە بولدى.