رەسەيدىڭ ماسكەۋ قالاسىندا تاۋ-شاڭعى سالاسىنىڭ ۇزدىكتەرىن انىقتايتىن SKI BUSINESS AWARDS جۇلدەسىمەن ماراپاتتاۋ شاراسى ءوتتى. 2024-2025 جىلعى ماۋسىمنىڭ ناتيجەسىندە «شىمبۇلاق» تاۋ كۋرورتى تمد ەلدەرىندەگى ەڭ بەدەلدى اتالىمدا جەڭىمپاز دەپ تانىلدى. بيىل العاش رەت «ەڭ ۇزدىك تاۋ-شاڭعى كۋرورتىنىڭ باسشىسى» اتالىمىن ەنگىزىلىپ, «شىمبۇلاقتىڭ» باس ديرەكتورى رينات ابدراحمانوۆتىڭ ەڭبەگى ەرەكشە اتاپ ءوتىلدى.
ۇيىمداستىرۋشىلاردىڭ مالىمەتىنشە, بيىل بايقاۋعا 50 نوميناتسيا بويىنشا 240-تان استام ۇمىتكەر قاتىسقان. جەڭىمپازدار قازىلار القاسىنىڭ شەشىمى مەن ءىرى تاۋ-شاڭعى پورتالى Ski.ru ۇيىمداستىرعان اشىق داۋىس بەرۋ ناتيجەسىندە انىقتالدى. ۇزدىكتەردى انىقتاۋ كەزىندە كومپانيالاردىڭ سالانىڭ دامۋىنا قوسقان ۇلەسى عانا ەمەس, سالا جەتەكشىلەرىنىڭ جەكە جەتىستىكتەرى دە سارالاندى.
«شىمبۇلاق» تمد-داعى «ەڭ ۇزدىك تاۋ-شاڭعى كەشەنى» اتالىمىندا قاتارىنان ءۇشىنشى جىل ۇزدىك دەپ تانىلىپ وتىر. 2022 جىلى كۋرورت شىۇ ەلدەرى اراسىنداعى «ەڭ ۇزدىك تاۋ-شاڭعى كۋرورتى» اتاعىن يەلەنسە, بىلتىر تمد كۋرورتتارى اراسىندا نەگىزگى ماراپاتپەن قاتار, «ەڭ ۇزدىك گلەمپينگ/كەمپينگ» اتالىمىمەن ماراپاتتالدى.
«وتكەن ماۋسىمدا «شىمبۇلاققا» 1,5 ميلليوننان استام ادامنىڭ كەلگەنى – كۋرورتقا تەك جەرگىلىكتى دەمالۋشىلار عانا ەمەس, شەتەلدىك تۋريستەردىڭ دە قىزىعۋشىلىعى ارتىپ كەلە جاتقانىن اڭعارتادى. SKI BUSINESS AWARDS ماراپاتىنىڭ بيىلعى جەڭىسى – بۇل كوماندانىڭ كاسىبي جۇمىسىنىڭ, ينفراقۇرىلىمدى دامىتۋ جانە قىزمەت ساپاسىن ارتتىرۋ جولىنداعى ەڭبەگىنىڭ ناتيجەسى. مۇنداي بەدەلدى ماراپاتتار وڭىرىمىزدەگى وزگە دە تاۋ-شاڭعى كۋرورتتارىنا سەرپىن بەرەتىنى انىق», دەيدى ەۋرازيالىق تاۋ كۋرورتتارى اليانسىنىڭ باس حاتشىسى اندرەي كۋكۋشكين.
SKI BUSINESS AWARDS جۇلدەسى 2018 جىلى تاۋ-شاڭعى يندۋسترياسىنىڭ كاسىبي ماماندارىن ىنتالاندىرۋ جانە سالانىڭ بەدەلىن ارتتىرۋ ماقساتىندا تاعايىندالدى. جىل سايىن بۇل ماراپاتقا «روزا حۋتور», Oi-Qaragai Mountain Resort, «ەلبرۋس», «كراسنايا پوليانا», «شەرەگەش» سياقتى ايگىلى كۋرورتتاردىڭ جوبالارى ۇسىنىلادى. «شىمبۇلاقتىڭ» كەزەكتى رەت تمد اۋماعىندا ۇزدىك كۋرورت دەپ تانىلۋى ەلىمىزدەگى تاۋ-شاڭعى سالاسىنىڭ جوعارى الەۋەتىن جانە ەلدىڭ تۋريستىك بەدەلىن ارتىپ كەلە جاتقانىن اڭعارتادى.
