وبلىس اكىمدىگىنىڭ قولداۋىمەن وتكەن ءۇشىنشى فورۋمعا كرەاتيۆتى يندۋستريا, تەحنولوگيا مەن جاستار ساياساتىنا ۇلەس قوسىپ جۇرگەن تانىمال ساراپشىلارى مەن ونەر جۇلدىزدارى شاقىرىلدى. شەبەرلىك ساعاتىن وتكىزىپ, تاجىريبەسىمەن بولىسكەندەر اراسىندا جاس كومپوزيتور, ءارى وڭدەۋشى ەدىلجان عابباسوۆ, انشىلەر عالىمجان مولدانازار مەن بەيبىت كوشقاليەۆ بار. ولار قازاق ونەرىن دامىتۋدىڭ قىر-سىرى تۋرالى اڭگىمەلەدى.
جاستاردى كۇن سايىن مىڭ قۇبىلاتىن نارىقتاعى ماركەتينگ تە قىزىقتىرادى. وسى سالانىڭ بىلگىرى اقسۇلتان قاليەۆ ارنايى ءدارىس وتكىزدى. ال پروديۋسەر, ستسەناريست انار ءجۇنىسوۆا مەن رەجيسسەر ايتورە جولداسقالي كينەماتوگرافيانى ورىستەتۋ باعىتىنداعى ويىن ايتتى. سونداي-اق باۋىرجان سەيفۋللين مەن ەۆگەنيا لي حورەوگرافيادان باعىت بەردى. تەاتر جانە كينو اكتەرلەرى دۋلىعا اقمولدا مەن ءادىل احمەتوۆ كەيىپكەر سومداۋ قىرىن تالدادى.
بۇگىنگى قوعامدى تولعاندىراتىن جايتتىڭ ءبىرى – جاساندى ينتەللەكت. اتالعان فورۋمدا جاس بۋىننىڭ بەلسەندى وكىلدەرى باقداۋلەت بەكجانوۆ پەن ازامات عالىمجانوۆ نارىققا دەندەپ ەنىپ, بارلىق سالادا بايقالا باستاعان جاڭا قۇبىلىستىڭ جاي-جاپسارىنا كەڭىنەن توقتالدى.
«بۇل فورۋم كرەاتيۆتى يندۋسترياعا تىڭ سەرپىن بەرەتىنىنە سەنەمىز. ەلىمىزدىڭ كرەاتيۆتى جاستارى ەكونوميكانى دامىتۋعا, ونىڭ ىشىندە شيكىزاتتى وڭدەۋ سالاسىن عانا ەمەس, ۇلتتىق قۇندىلىقتاردى ساقتاۋعا, مادەنيەت پەن ونەردى جان-جاقتى تانىتۋعا ۇلەس قوسىپ كەلەدى», دەدى وبلىس اكىمىنىڭ ورىنباسارى دارىن شامۇراتوۆ.
فورۋمدا باعىت بيسەمباي (حورەوگرافيا), انۋاربەك ماعزوموۆ (ماركەتينگ), ماحامبەت ءابىلوۆ (مۋزىكا), نۇرپەيىس ءادىلوۆ (كينەماتوگرافيا), قۋانىشبەك ايساعالي (تەاتر), ەركەبۇلان بالعابەكوۆ (جاساندى ينتەللەكت) ۇزدىك دەپ تانىلدى. ولاردىڭ ارقايسىسىنا 500 مىڭ تەڭگەدەن سىياقى بەرىلدى.
اتىراۋ وبلىسى
