كونفەرەنتسيادا عىلىم جانە جوعارى ءبىلىم ءمينيسترى ساياسات نۇربەك «AI-ready nation: قازاقستان تاجىريبەسى» تاقىرىبىندا بايانداما جاساپ, ەلىمىزدە جاساندى ينتەللەكت ەكوجۇيەسى بەلسەندى دامىپ جاتقانىن اتاپ ءوتتى. ءمينيستردىڭ ايتۋىنشا, ەلىمىزدە جاساندى ينتەللەكتى ءبىلىم بەرۋ جۇيەسىنە, ەكونوميكاعا جانە مەملەكەتتىك باسقارۋعا ينتەگراتسيالاۋعا باعىتتالعان ساياسات پەن ينفراقۇرىلىم قالىپتاسىپ كەلەدى. ايتۋىنشا, جاڭا وقۋ جىلىنىڭ باسىنان باستاپ بىرقاتار قازاقستاندىق جوعارى وقۋ ورىندارىندا جاساندى ينتەللەكت تەحنولوگيالارىن وقۋ ۇدەرىسىنە ەنگىزۋگە جانە ءبىلىم ساپاسىن ارتتىرۋعا باعىتتالعان OpenAI كومپانياسىنىڭ ChatGPT Edu ءبىلىم بەرۋ مودەلىن ەنگىزۋ بويىنشا پيلوتتىق جوبا جۇزەگە اسىپ جاتىر. حالىقارالىق «قازاق ءتىلى» قوعامىمەن سەرىكتەستىكتە ChatGPT پلاتفورماسىنىڭ مەملەكەتتىك تىلدەگى فۋنكتسيونالىن جەتىلدىرۋ جۇمىستارى جۇرگىزىلۋدە. اسىرەسە, قازاقستاننىڭ تاريحي مۇراسى مەن مادەنيەتىنە قاتىستى جاۋاپتاردىڭ ناقتىلىعى مەن شىنايىلىعىن ارتتىرۋعا ەرەكشە نازار اۋدارىلىپ وتىر.
كونفەرەنتسياعا قازاقستاننىڭ كورەيا رەسپۋبليكاسىنداعى توتەنشە جانە وكىلەتتى ەلشىسى نۇرعالي ارىستانوۆ, سونداي-اق «سەمەي مەديتسينا ۋنيۆەرسيتەتى», «ازاماتتىق اۆياتسيا اكادەمياسى», سافي وتەباەۆ اتىنداعى اتىراۋ مۇناي جانە گاز ۋنيۆەرسيتەتى, قوناەۆ ۋنيۆەرسيتەتى, Almaty Management University سياقتى ەلىمىزدىڭ جەتەكشى جوعارى وقۋ ورىندارىنىڭ وكىلدەرى قاتىستى.
كونفەرەنتسيادا ءسوز العان Almaty Management University نەگىزىن قالاۋشى جانە رەكتورى, حالىقارالىق ۋنيۆەرسيتەت پرەزيدەنتتەرى قاۋىمداستىعىنىڭ اتقارۋشى كوميتەتىنىڭ مۇشەسى اسىلبەك قوجاحمەتوۆ «زەرتتەۋلەر مەن تۇراقتى قارجىلاندىرۋ ارقىلى يننوۆاتسيالاردى دامىتۋ» سەسسياسىندا بايانداما جاساپ, «بۇگىندە قازاقستان زاماناۋي ەكونوميكانى ءبىرىزدى تۇردە قالىپتاستىرىپ كەلەدى - بۇل ۋاقىتشا ءۇردىس ەمەس, سانالى جانە ستراتەگيالىق قاجەتتىلىك. سوڭعى التى جىلدا ەلىمىزدە عىلىمدى مەملەكەتتىك قارجىلاندىرۋ كولەمى التى ەسە ارتتى, بۇل ءوز ناتيجەسىن بەرىپ وتىر. ۋنيۆەرسيتتەردە جۇرگىزىلىپ جاتقان زەرتتەۋلەر عىلىمعا سالىنعان ينۆەستيتسيالار كولەمى مەن وتاندىق عالىمداردىڭ جاريالانىمدىق بەلسەندىلىگىنىڭ ارتۋى اراسىندا تىكەلەي بايلانىس بار ەكەنىن دالەلدەيدى» دەپ اتاپ ءوتتى.
كونفەرەنتسيا اياسىندا كورەيانىڭ Seoul Cyber University, Youngsan University جانە بانگلادەشتىڭ Daffodil International University سياقتى شەتەلدىك ۋنيۆەرسيتەتتەرمەن ىنتىماقتاستىق تۋرالى مەموراندۋمعا قول قويىلدى. كەلىسىمدەر اكادەميالىق ۇتقىرلىقتى دامىتۋعا, بىرلەسكەن عىلىمي زەرتتەۋلەر جۇرگىزۋگە جانە يننوۆاتسيالىق ءبىلىم بەرۋ تەحنولوگيالارىن ەنگىزۋگە باعىتتالعان.
IAUP وڭىرلىك كونفەرەنتسياسى كەلەر جىلى الماتى قالاسىندا وتەدى.
الماتى
