كەزدەسۋ بارىسىندا قالا بويىنشا جۇزەگە اسىپ جاتقان جوبالاردىڭ ورىندالۋ بارىسى تالقىلاندى. بۇگىندە الماتىدا 147 جوبا ىسكە اسىرىلىپ جاتسا, 26 نىساندا مەرزىم مەجەسى ساقتالماعان, ساپاعا قاتىستى تالاپتاردا كەمشىلىك بار.
الماتىنىڭ قالا قۇرىلىسىن باقىلاۋ باسقارماسىنىڭ باسشىسى ولجاس تولەباەۆ مونيتورينگ ناتيجەسىندە كەلىسىمشارت مەرزىمى ۇنەمى بۇزىلىپ, قۇرىلىس نورمالارىن ساقتامايتىن توعىز مەردىگەر انىقتالعانىن اتادى. ولاردىڭ جۇمىسىندا جوبادان اۋىتقۋ, ۇيىمداستىرۋ دەڭگەيىنىڭ تومەندىگى مەن قۇجات جۇرگىزۋدەگى سالعىرتتىق ءجيى بايقالادى.
قالا اكىمى دارحان ساتىبالدى مۇنداي نەمقۇرايلىلىق قالا تۇرعىندارىنىڭ نارازىلىعىن تۋدىرىپ وتىرعانىن جەتكىزدى. كوپشىلىك مەكتەپ پەن بالاباقشا قۇرىلىسىنىڭ سوزبالاڭعا سالىنىپ, ساياباقتار مەن جاعالاۋلاردى اباتتاندىرۋ جۇمىستارىنىڭ كەشىگۋىنە, سونداي-اق جول مەن تروتۋارداعى قازىلعان جەرلەردىڭ ۋاقتىلى قالپىنا كەلتىرىلمەيتىنىنە نارازىلىق بىلدىرگەن.
«ودان بولەك, كەيبىر كومپانيالار ءبىر نىساندى بىتىرمەي جاتىپ, جاڭاسىن قولعا الاتىن كەلەڭسىز ادەت قالىپتاستىرعان. مۇنداي تاجىريبەگە مۇلدە جول بەرۋگە بولمايدى. ويتكەنى ماسەلە ادامداردىڭ قاۋىپسىزدىگى مەن جايلىلىعى تۋرالى بولىپ وتىر. ەگەر مەردىگەر مىندەتىن ءتيىستى دەڭگەيدە ورىنداماسا, ونىڭ قالا جوبالارىندا جۇمىس ىستەمەۋى كەرەك», دەدى دارحان ساتىبالدى.
كەڭەس وتىرىسىنىڭ سوڭىندا قالا اكىمى قالا قۇرىلىسىن باقىلاۋ باسقارماسىنا مۇنداي نىساندى ءار اپتا سايىن قاداعالاپ وتىرۋدى, جاۋاپسىز مەردىگەرلەردى ليتسەنزياسىنان ايىرىپ, قاجەت بولسا ماتەريالداردى قۇقىق قورعاۋ ورگاندارىنا جىبەرۋدى تاپسىردى.
