فورۋمنىڭ اشىلۋىندا كاسىپوداقتار فەدەراتسياسىنىڭ توراعاسى ساتىبالدى داۋلەتالين قوناقتاردى مەرەكەمەن قۇتتىقتاپ, كاسىپوداق قوزعالىسىنىڭ تاريحي بەلەستەرىنە توقتالدى. سول جولدا ەڭبەك ەتكەن كاسىپوداق ارداگەرلەرىنە العىس ايتتى.
«بۇرىن ەڭبەك ادامدارى ەڭ قاراپايىم قۇقىقتارى ءۇشىن كۇرەستى. جۇمىس كۇنى 14 ساعاتتان اسپاسىن, ايەلدەر مەن بالالار ەڭبەگى اياۋسىز پايدالانىلماسىن دەدى. ول كەزدە مۇنداي تالاپتار باتىل باستاما سانالدى. ال بۇگىندە بۇل – قالىپتى نارسە. 120 جىلدىق كاسىپوداق قوزعالىسىنىڭ داڭقتى جولى مەن ادىلەت تۋىن 35 جىل بويى ابىرويمەن كوتەرىپ كەلە جاتقان فەدەراتسيانىڭ تاريحى – بۇل ەڭبەك ادامدارىنىڭ رۋحىن بيىكتەتكەن داڭقتى شەجىرە. قۇرمەتتى ارداگەرلەر, سىزدەر – ەلىمىزدەگى بارلىق ۇلى وزگەرىستەردىڭ كۋاگەرى ءارى تىكەلەي قاتىسۋشىسىسىزدار. سىزدەر 80-90-جىلدارداعى ەرەۋىلدەردى جاقسى بىلەسىزدەر. سول ۋاقىتتا جۇمىسشىلار العاش رەت ادىلەتتىلىكتى اشىق تالاپ ەتە باستاعان ەدى. قازىر سونىڭ جەمىسىن بۇگىنگى بۋىن كورىپ وتىر. ەڭبەك ادامىنا دەگەن سەنىم, جاقسى نيەت پەن ادالدىقتارىڭىز ءۇشىن سىزدەرگە ريزاشىلىق بىلدىرەمىز», دەدى ساتىبالدى داۋلەتالين.
ءيا, قيىن-قىستاۋ كەزەڭدەردە بۇرىننان قالىپتاسقان جۇيە كۇيرەدى. ءومىردىڭ ۇيرەنشىكتى ءتارتىبى بۇزىلعان شاقتا جۇمىسشى قۇقىعىن قورعاۋ دا وڭاي بولمادى. كاسىپورىندار جابىلىپ, جالاقى ايلاپ بەرىلمەگەن شاقتاردا كاسىپوداق قوزعالىسى جۇمىسىن جالعاستىردى. حالىقتىڭ سەنىمىن ساقتاپ قالدى. فورۋمدا ومىردەن وتكەن كاسىپوداق كوشباسشىلارى مەن بەلسەندىلەرىنىڭ رۋحىنا قۇرمەت رەتىندە ءبىر مينۋت ۇنسىزدىك جاريالاندى. وسىدان سوڭ كاسىپوداقتار فەدەراتسياسىنىڭ توراعاسى ساتىبالدى داۋلەتالين ەلىمىزدەگى ەڭ ءىرى قوعامدىق ۇيىمنىڭ جەتىستىكتەرىنە توقتالدى.
ء«بىز كاسىپوداقتاردى ساقتاپ قانا قويماي, ولاردىڭ بەدەلىن دە ارتتىرا الدىق. بۇگىندە ميلليونداعان ەڭبەككەردىڭ قۇقىعىن قورعايتىن بەرىك تىرەككە اينالدى. كاسىپوداقتار فەدەراتسياسى – ەلدەگى ەڭ ءىرى قوعامدىق ۇيىم. ونىڭ قۇرامىندا ەكى ميلليونعا جۋىق ادام بار. ياعني, ەلىمىزدەگى ءار ءۇشىنشى ەڭبەككەر – ءبىزدىڭ كاسىپوداقتىڭ مۇشەسى. فەدەراتسيا قۇرامىنا 24 سالالىق, 18 اۋماقتىق بىرلەستىك جانە 16,5 مىڭ باستاۋىش ۇيىم كىرەدى. وندا كۇن سايىن مىڭداعان ەڭبەككەردىڭ تاعدىرىنا اسەر ەتەتىن شەشىمدەر قابىلدانۋدا. بۇل – ەكى مىڭ شتاتتىق كاسىپوداق قىزمەتكەرى مەن 90 مىڭ بەلسەندىدەن قۇرالعان ۇلكەن قاۋىمداستىق. ولاردىڭ بارلىعى كاسىپوداقتار فەدەراتسياسىنىڭ بىرىڭعاي جۇيەسىندە جۇمىس ىستەيدى», دەدى كاسىپوداق كوشباسشىسى.
بۇگىندە كاسىپوداقتارى بار ۇيىمداردىڭ 97%-دان استامى ۇجىمدىق شارتتارمەن قامتىلعان. كەيىنگى جىلدارى ولاردىڭ سانى 40%-عا ارتىپتى. بۇل – ءاربىر ەڭبەككەر ءوز ەڭبەگىنىڭ قورعالعانىن سەزىنەدى دەگەن ءسوز. سوسىن, كاسىپوداقتاردىڭ ىقپالى ايتارلىقتاي كەڭەيدى. قازىر ماكروەكونوميكالىق باستامالاردان باستاپ, ناقتى سالالار دەڭگەيىندە اسەر ەتىپ وتىر.
حالىقارالىق دەڭگەيدەگى ماڭىزدى جەتىستىكتەردىڭ ءبىرى – 2021 جىلى ورتالىق ازياداعى جاڭا ايماقتىق كاسىپوداق پلاتفورماسىنىڭ نەگىزى قالانىپ, 2023 جىلى تۇركى مەملەكەتتەرىنىڭ كاسىپوداقتار ۇيىمى قۇرىلدى. وسى جىلدار ىشىندە بۇل قۇرىلىمدار ساراپتامالىق الاڭنان ايماقتىق ىقپالدى كۇشكە اينالدى. بۇل دەگەنىمىز, بۇگىندە ءاربىر قازاقستاندىق جۇمىسكەردىڭ ارتىندا تەك سالالىق كاسىپوداعى عانا ەمەس, بۇكىل الەمدىك ىنتىماق قوزعالىسى تۇر دەگەن ءسوز.
وكىنىشكە قاراي, جىل سايىن ەلدەگى ءوندىرىس ورىندارىندا 1300-دەن استام ادام جاراقات الادى. ونىڭ شامامەن 200-ءى قايتىس بولادى. مۇنداي قايعىلى وقيعالاردىڭ الدىن الۋ – كاسىپوداقتىڭ دا مىندەتى. سول سەبەپتى كاسىپوداق جۇمىس بەرۋشىلەردىڭ جاۋاپكەرشىلىگىن ارتتىرىپ, قاۋىپسىز ەڭبەك تۇجىرىمداماسىن تولىق ىسكە اسىرۋ جانە حالىقارالىق ەڭبەك ۇيىمىنىڭ №176 كونۆەنتسياسىن راتيفيكاتسيالاۋ قاجەت. سونداي-اق فەدەراتسيا باسشىلىعى جۇمىسشىلارعا ءادىل ەڭبەكاقى تولەۋ, بەيرەسمي سەكتوردا جۇمىس ىستەيتىن ازاماتتاردىڭ ەڭبەك قۇقىقتارىن قورعاۋ جانە تسيفرلىق سەرۆيستەردى ەنگىزۋ سىندى باعىتتاردا جۇمىستى كۇشەيتۋگە نيەتتى.
فورۋمدا ءماجىلىس توراعاسى, «Amanat» پارتياسىنىڭ توراعاسى ەرلان قوشانوۆتىڭ قۇتتىقتاۋىن پارتيا حاتشىسى داۋلەت كارىبەك جەتكىزدى. پرەمەر-مينيستر ولجاس بەكتەنوۆتىڭ قۇتتىقتاۋىن ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا وقىدى. ىزىنشە, فەدەراتسيانىڭ الەۋمەتتىك ارىپتەستەرىنە «ۇزدىك الەۋمەتتىك ارىپتەس» مەدالى تابىستالدى. سالتاناتتى ءىس-شارا بارىسىندا قازاقستان كاسىپوداق قوزعالىسىنىڭ 120 جىلدىعى مەن قركف-نىڭ 35 جىلدىعىنا وراي كاسىپوداقتار فەدەراتسياسىنىڭ «تاريحقا – تاعزىم, بۇگىنگە – وزگەرىس, بولاشاققا – سەنىم» اتتى كىتاپتىڭ تۇساۋكەسەرى ءوتتى.
فورۋم اياسىندا قركف ۇيىمداستىرعان «ماماندىق ۇزدىگى» رەسپۋبليكالىق بايقاۋىنىڭ قورىتىندىلارى شىعارىلىپ, جەڭىمپازدار ماراپاتتالدى. ولاردىڭ قاتارىندا مۇناي, تاۋ-كەن, قۇرىلىس, اۋىل شارۋاشىلىعى, ەنەرگەتيكا, كولىك, ماشينا جاساۋ, ءبىلىم بەرۋ جانە پوشتا سالالارىنىڭ ۇزدىك وكىلدەرى بار. وسى كۇنى كاسىپوداق ارداگەرلەرى, كاسىپوداق قوزعالىسىنىڭ جەتەكشىلەرى مەن بەلسەندىلەرى, سونداي-اق ەڭبەكشى جاستاردىڭ ۇزدىك وكىلدەرى كاسىپوداقتىڭ ارنايى ماراپاتتارىمەن جانە «قازاقستان كاسىپوداق قوزعالىسىنا 120 جىل» مەرەيتويلىق مەدالىمەن ماراپاتتالدى.
