2000-شى جىلداردىڭ باسىندا شىڭجاڭداعى قازاق گازەتىنىڭ شاقىرۋىمەن «ەگەمەندىك» ءبىر توپ جۋرناليست اسپاناستى ەلىندە اپتادان ارتىق بولعان. دۇنيەجۇزىندەگى ءجۇزىم تۇقىمىنىڭ ءبارى وسىرىلەتىن تۇرفان قالاسىنىڭ ەسكى ورنىندا بولعانىمىزدا تۋريستەردىڭ كوپتىگىنە قاتتى تاڭىرقاعان ەدىك. ەۋروپانىڭ سەكسەن جاستان اسقان قاريالارى ءبىر-ءبىرىن سۇيەمەلدەپ كونسەرۆاتسياعا الىنعان قالاشىقتى ارالاپ جۇرگەندەرى جانە ءسۇيسىندىردى. ولار لاس-ۆەگاس سياقتى جارق-جۇرق قالالاردىڭ قىزۋىنا ابدەن تويعان. جيعان-تەرگەنىن تۋريزمگە سالاتىن ولاردى ەجەلگى قالا ورىندارى ەرەكشە قىزىقتىرادى ەكەن.
تۋريزم – ۇلكەن قارجى, مەملەكەت بايلىعى. بۇگىندە مۇنايلى اراب امىرلىكتەرىنەن بولەك, يسپانيا سياقتى جالاڭ-جۇتاڭ مەملەكەتتەردى اسىراپ وتىرعان وسى تۋريزم. جەراستى بايلىعى سارقىلۋى مۇمكىن, ال تۋريزم تاۋسىلمايتىن قازىنا.
ىشكى تۋريزم ءبىزدىڭ ەلدە دە قارقىندى بولماسا دا دامىپ كەلەدى. ونى «وڭتۇستىك» اقپارات ورتالىعىندا وتكەن بريفينگتە تۇركىستان قالاسىنىڭ اكىمى الىپبەك وسەرباەۆ ناقتى مىسالدارمەن ايتىپ بەردى. كۇللى تۇركى دۇنيەسى ءۇشىن قاستەرلى مەكەنگە سوڭعى ءۇش جىلدا 2 ملن.-عا جۋىق تۋريست كەلگەن. ماسەلەن, 2013 جىلى 700 مىڭداي تۋريست كەلسە, 2014 جىلى سانى 1 ملن.-عا جۋىقتاعان. ال, بيىلعى جىلدىڭ التى ايىندا 594,8 مىڭ تۋريست تۇركىستانعا ارنايى كەلىپتى. سوپىلىق ءىلىمنىڭ نەگىزىن قالاعان قوجا احمەت ياساۋي كەسەنەسىندە كيىز تۋىلدىرىقتى قازاقتى ەل قىلعان, ۇلان-عايىر جەرىنىڭ شەتىنە جاۋ اياعىن باستىرماعان, ازاتتىقتى اڭساپ وتكەن حان, بي, باتىرلارىمىزدىڭ دەنى ماڭگىگە دامىلداپ جاتىر. بۇگىندە اتاعى الىسقا كەتكەن قازاقستاندى كورەمىن, وتكەنىمەن تانىسامىن دەگەنگە مۇندا كارى تاريح كوپ جايتتى بايانداپ بەرەدى. قالا تۋريزم ماسەلەسىن مىقتاپ قولعا الىپ, سوڭعى جىلداردىڭ وزىندە ونداعان نىسانداردى ىسكە قوستى. تۋريستەردىڭ كوبەيۋىنىڭ ۇلكەن سەبەبى وسىندا جاتقان سياقتى.
باقتيار تايجان, «ەگەمەن قازاقستان».
وڭتۇستىك قازاقستان وبلىسى.
