بەلارۋستە بالۋاندار باس جۇلدەنى يەلەندى

استانا. 8 مامىر. سۋردوبالۋانداردىڭ جولى بولىپ تۇر. جاقىندا ولار ەستۋ قابىلەتى تومەن بالۋاندار اراسىنداعى بەلارۋستىڭ اشىق چەمپيوناتىنا قاتىسىپ, كوماندالىق ءبىرىنشى ورىندى يەلەندى. بۇل تۋرالى egemen.kz ءتىلشىسى حابارلادى. ەسكە ءتۇسىرىپ وتسەك, اقپان ايىندا بۇل ەلگە ەركىن كۇرەس بالۋاندارى بارىپ, بوبرۋيسك قالاسىندا قازاقستاننىڭ كوك بايراعىن جەلبىرەتىپ, ءانۇرانىن قايتا-قايتا شىرقاتىپ قايتقان ەدى. بۇل جولى گرەك-ريم كۇرەسىندەگى جىگىتتەردىڭ ءجۇزى جارقىن بولدى. بەلارۋستىڭ گرودنو قالاسىندا وتكەن بوز كىلەم باسەكەسىندە ءبىزدىڭ بالۋاندار قارسىلاستارىن قيراتا جەڭىپتى. ساپاردان ورالعان قازاقستان قۇراما كومانداسىنىڭ باس جاتتىقتىرۋشىسى ەرلان مۇقاجانوۆ استاناداعى «دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنا» شاكىرتتەرىمەن بىرگە ارنايى كەلىپ, قۋانىشتارىن ءبولىستى. «بەلارۋستىڭ اشىق چەمپيوناتىنا جەتى سالماق بويىنشا بالۋان الىپ بارعان ەدىم. سونىڭ تورتەۋى ءبىرىنشى ورىندى, ۇشەۋى ەكىنشى ورىندى يەلەندى. ءسويتىپ, كوماندالىق ەسەپتە باس جۇلدە بىزگە بۇيىردى. اسىرەسە, 59 كيلو سلماقتا ەلدوس كۇزەرباەۆ, 66 كيلودا عابيت يگەنباي, 80 كيلو سالماق دارەجەسىندە ءابدىراحمان وسپانوۆ, 130 كيلودا شونكۋ قايراتحاننىڭ بەلدەسۋلەرى جاقسى بولدى. ولار باس جۇلدەنى يەلەندى. ال 75 كيلوداعى ايبار نۇرمۇحاممەد, 85 كيلو سالماقتاعى قاجىمۇقان وسپانوۆ پەن 98 كيلوداعى اسىلجان تاجيەۆ ەكىنشى ورىندى يەلەندى. وسى كەزدە شاكىرتتەرىم بابىندا ءجۇر. بۇل رەتتە, كەزىندەگى گرەك-ريم كۇرەسىنىڭ داڭقتى بالۋانى داۋلەت تۇرلىقانوۆقا ايتار العىسىمىز شەكسىز. داۋلەت اعا سۋردو بالۋانداردىڭ الماتىداعى «دوستىق» سپورت كەشەنىندە الاڭسىز جاتتىعۋىنا جاعداي جاساۋدا. ارينە, ءبىز بۇل جەڭىسىمىزگە توقمەيىلسۋدەن اۋلاقپىز. بالۋاندار وسىنداي جارىستاردا شىڭدالىپ, تاجىريبە جيناقتايدى. سول ءۇشىن بىزگە مۇمكىندىك بولسا, سىرت ەلدەردەگى باسەكەلەردەن قالماۋىمىز كەرەك. اسىرەسە, گرەك-ريمدە رەسەي بالۋاندارى مىقتى. اللا بۇيىرتسا, جاقىندا ارمەنيادا حالىقارالىق تۋرنير ۇيىمداستىرىلماقشى. ەندىگى كەزەكتە ءبىز سول جارىسقا تىڭعىلىقتى ازىرلىكتى باستايمىز», دەدى ول. داستان كەنجالين. دەرەك, سۋرەت: egemen.kz