اسىرەسە, دەموكراتيالىق ەلدەردە بيلىككە قول جەتۋ ساياسي پارتيالاردىڭ بەدەلىنە بايلانىستى. جەڭگەن پارتيانىڭ وكىلى ۇكىمەتتى باسقارسا, پرەزيدەنتتىك بيلىك ەلدەرىندە دە جەكە تۇلعالاردىڭ جەڭىسكە جەتۋى ونى قولداعان پارتيالارعا بارىپ تىرەلەدى.
وعان مىسال كوپ. اقش-تا دا, ۇلىبريتانيادا, جاپونيادا, فرانتسيادا دا سولاي. بىردە دەموكراتتار, بىردە كونسەرۆاتورلار, بىردە سولشىلدار, بىردە ليبەرالدار جەڭدى دەپ, جەكە تۇلعالاردان بۇرىن ونىڭ پارتياسىن ايتىپ جاتامىز. سويتسە دە, سول پارتيالاردىڭ بەدەلىنە بەدەل قوساتىن, ءوز پارتيالارىن بيىككە كوتەرەتىن قايراتكەرلەر دە بار. ساياساتشىلار, ساراپشىلار گەرمانيا كانتسلەرى انگەلا مەركەلدى سولاردىڭ قاتارىنا قوسادى. ەلدىڭ بەدەلدى Emnid الەۋمەتتىك زەرتتەۋ ينستيتۋتتىڭ ءجۇرگىزگەن ساۋالنامالارىنا قاراعاندا, ەگەر ەلدە پارلامەنت سايلاۋى قازىر وتەتىن بولسا, حريستيان-دەموكراتيالىق وداق جانە حريستيان-الەۋمەتتىك وداق پارتيالارىنىڭ بلوگى سايلاۋشىلاردىڭ 43 پايىز داۋىسىنا يە بولعانداي ەكەن. بۇل ون جىلدان بەرگى ەڭ جوعارى تانىمالدىق رەيتينگ. مۇنداي ناتيجەمەن بۇل بلوك باسقا پارتيالارمەن كواليتسيا قۇرماي-اق وزدىگىنەن ۇكىمەت جاساقتاۋعا مۇمكىندىك الا الار ەدى. ساراپشىلار مۇنداي جوعارى رەيتينگتى بلوك ليدەرى كانتسلەر انگەلا مەركەلدىڭ بەدەلىمەن بايلانىستىرادى. ۇلكەن ساياساتقا ارالاسقالى بەرگى 15 جىلدا ول تەك جوعارى ورلەۋمەن كەلەدى. 2000 جىلى حريستيان-دەموكراتيالىق وداق پارتياسىنا جەتەكشى بولىپ سايلاندى دا, بىردەن الەۋمەتتىك ماسەلەلەردى كۇن تارتىبىنە شىعاردى. وزدەرىنىڭ ساياسي رۋحىمەن ۇندەس باۆاريالىق حريستيان-الەۋمەتتىك وداقپەن بلوكقا بىرىككەن سوڭ, حريستيان-دەموكراتتار نەمىستەر اراسىندا بەدەلدى ساياسي كۇشكە اينالدى. ونىڭ اقىرى بلوك جەتەكشىسى انگەلا مەركەلدىڭ 2005 جىلى ەل كانتسلەرى بولىپ سايلانۋىنا جەتكىزدى. بۇل جەڭىستىڭ تاعى ءبىر ەرەكشەلىگى – مەركەل ەل تاريحىندا العاشقى ايەل كانتسلەر. العاشىندا بىرەۋلەرگە ونىڭ جەڭىسى ايەل ازاماتشاعا جاسالعان قۇرمەتتەي عانا كورىنگەن. مىنە, 10 جىلدان بەرى وسىناۋ قايراتكەر الەمنىڭ ءبىر ۇلى دەرجاۆاسىنىڭ تىزگىنىن مىقتاپ ۇستاپ, جەڭىس جولىمەن جۇرگىزىپ كەلەدى. ونىڭ قايراتكەرلىگىن جۇرت ءبىر ەلمەن عانا شەكتەمەيدى, ەۋروپاداي قۇرلىقتىڭ, بۇكىل الەمنىڭ تاعدىرىمەن بايلانىستىرادى. الىسقا بارماي-اق, ونىڭ ۋكرايناعا بايلانىستى ماسەلەدەگى باستاماشىلىعى, وتكىر پروبلەمانى كەلىسىم جولىمەن شەشۋگە كۇش سالۋى نەگە تۇرادى! ايتپەسە, يراننىڭ يادرولىق باعدارلاماسىنا بايلانىستى ۇزاققا سوزىلعان كەلىسسوزدىڭ ناتيجەلى اياقتالۋىنا دا ونىڭ قوسقان ۇلەسى زور. ونىڭ قاتارىنان تالاي جىلدان بەرى الەمدەگى ەڭ ىقپالدى ايەل قايراتكەر اتالۋىندا دا ءبىراز سىر جاتىر. ارينە, مۇنداي بەدەلدى, ۇلكەن تانىمالدىق بيىككە كوتەرىلگەن قايراتكەر ەلگە, قوعامعا كەرەك. نەمىستەر, ءسىرا, ونى ءالى دە بيلىكتە قالدىرۋدى, وعان ەل تاعدىرىن جۇكتەۋدى ويلاستىراتىنداي. «شپيگەل» جۋرنالى كانتسلەردىڭ الداعى سايلاۋعا قاتىسۋ مۇمكىندىگىن جازىپتى. بلوك باسشىلىعى ودان سونى تالاپ ەتسە كەرەك. مەركەل كونەر. ولار جاۋاپكەرشىلىكتى پارىز سانايتىندار قاۋىمىنان. سايلاۋعا تاعى ءتۇسىپ, تاعى جەڭىسكە جەتىپ جاتار بولسا, بۇل ونىڭ ءتورتىنشى جەڭىسى بولار ەدى. سويتسە دە, ونىڭ جولى تەپ-تەگىس, جايلى دەي الماس ەڭ. ىشتە دە, سىرتتا دا شالىس باسار قادامىڭدى اڭديدى. ءمۇلت كەتكەنىن كورسە, شۋلاپ قويا بەرەدى. بىراق, الىسقا باعىت ۇستاعان الىپ كەمەدەي, ول ازىن-اۋلاق ايقاي-شۋعا ايالداماي, العا كەتىپ بارادى.
