سۋرەتتى تۇسىرگەن – ەرلان ومار, «EQ»
زاۋىت جۇمىس ىستەگەن 14 جىلدا 500 مىڭعا جۋىق اۆتوموبيل قۇراستىردى. كاسىپورىننان شىققان جەڭىل كولىكتەر ەل اۋماعىنان تىس, رەسەي, قىرعىزستان, وزبەكستان, ازەربايجان جانە بەلارۋس ەلدەرىنە ەكسپورتتالادى.
«الەمدە كولىك قۇراستىراتىن زاۋىتتاردىڭ ەشقايسىسى بولشەكتەردى وزدەرى وندىرمەيدى. ءبىزدىڭ كاسىپورىنداعى جاعداي دا سوعان ۇقساس. ءار كولىك ماركاسىنىڭ تەتىكتەرىن ءوزارا كەلىسىمشارت اياسىندا ءارتۇرلى شەتەلدىك زاۋىتتاردان الدىرامىز. باستىسى, كولىكتەر بارلىق شەبەرحاناداعى بىلىكتى مامانداردىڭ قولىنان ءوتىپ, جوعارى تەحنولوگيالى قوندىرعىلاردىڭ كومەگىمەن قۇراستىرىلادى. نەگىزگى ماقساتىمىز – حالىقارالىق ساپا نورمالارىنا سايكەس كەلەتىن باسەكەگە قابىلەتتى ءونىم شىعارۋ», دەيدى كومپانيا ديرەكتورى سىرىم سەمەيباەۆ.
بىلتىر ماۋسىمدا كاسىپورىن پلاستيكا بوياۋ تسەحىن ىسكە قوستى. تولىقتاي اۆتوماتتاندىرىلعان جاڭا تسەح جىلىنا اۆتوكولىككە قاجەت 62 مىڭ پلاستيكا بۇيىمدارىن وڭدەپ شىعارادى. مۇنداعى ءونىم شىعارۋ ۇدەرىسىن تولىقتاي اۆتوماتتى كونۆەيەرلەر مەن روبوتتاندىرىلعان قوندىرعىلار اتقارادى. جاڭا تسەحتىڭ اشىلۋى بۇعان دەيىن كولىك شاناعى مەن پلاستيكالىق بولشەكتەردى قاتار بوياپ كەلگەن نەگىزگى بوياۋ تسەحىنىڭ جۇمىس جۇكتەمەسىن ازايتىپ, CKD ءوندىرىسىنىڭ ۇلەسىن ۇلعايتۋ ارقىلى ءوندىرىس قۋاتىن ارتتىرۋعا جول اشىپ وتىر. پلاستيكا بوياۋ تسەحىندا التى روبوت جۇمىس ىستەيدى. مۇنداعى ءوندىرىس جەلىسىنىڭ ءوزى ءتورت ايماققا بولىنگەن. بوياۋ كامەرالارىنداعى جۇمىستىڭ ءبارىن روبوت وپەراتورلار باسقارۋ پۋنكتى ارقىلى باقىلايدى. ياعني بوياۋ تسەحىنداعى دەنساۋلىققا ەداۋىر زيان كەلتىرەتىن جۇمىستى روبوت اتقارادى.
بۇگىندە كاسىپورىندا 3 800 ادام جۇمىس ىستەيدى. جۇمىسشىلاردىڭ ءبارى تەگىن تاماقپەن, ارنايى كيىممەن قامتاماسىز ەتىلگەن. بوياۋ تسەحىنىڭ شەبەرى راۋشان بايباتجانوۆا زاۋىتتا ون شاقتى جىلدان بەرى جۇمىس ىستەيدى. كۇندەلىكتى مىندەتى – بوياۋ تسەحىنان جاڭا شىققان كولىك شاناقتارىنىڭ سىرتقى قاباتىن تەگىستەپ, جىلتىراتۋ. اتالعان تسەحتا راۋشاننان وزگە جيىرما شاقتى ايەل بار. ءبىر بريگادا ءبىر اۋىسىم ىشىندە جيىرماعا جۋىق اۆتوكولىك شاناعىن وڭدەپ شىعارادى.
«جۇمىسقا قىزمەتتىك اۆتوبۋسپەن كەلىپ, قايتامىز. بوياۋ تسەحىنداعى جۇمىسىمىز دا قىزىق. ادەتتە جاي ادامعا جاڭا سىرلانعان اۆتوكولىكتىڭ سىرتى ءمىنسىز ءارى تەپ-تەگىس بولىپ كورىنۋى مۇمكىن. ال مەن سىرت كوزگە كورىنبەيتىن ۇساق كەمشىلىكتەردى بىردەن بايقايمىن. شاناقتىڭ سىرتقى تەگىستىگىن ساۋساقپەن سەزىنە ءبىلۋ كەرەك», دەيدى تسەح شەبەرى.
86 مىڭ شارشى مەتر اۋماقتى الىپ جاتقان زاۋىتتا 7 وندىرىستىك تسەح جۇمىس ىستەيدى. كاسىپورىننىڭ جاس مامان, جاڭا كادرلارى زاۋىت جانىنان اشىلعان «SAP University» ورتالىعىندا جۇيەلى تۇردە ءبىلىم جەتىلدىرىپ, كاسىبي بىلىكتىلىگىن ارتتىرادى. زاۋىتتا جاڭا تەحنولوگيانىڭ ءتىلىن جەتىك بىلەتىن زاماناۋي ءبىلىمى بار ينجەنەر-تەحنولوگ جاستار جۇمىس ىستەپ جاتىر. مىسالى, كاسىپورىن مامانى ارمان زاكىروۆ – «دجەپيكس» دەپ اتالاتىن «اقىلدى» قۇرىلعىنىڭ مامانى. ەكى جىلدان بەرى وسى قۇرىلعىنى باسقارادى.
«بۇل – ءبىزدىڭ زاۋىتتا عانا بار جاڭا ماماندىق. «Chevrolet Onix»-ءتىڭ CKD ءوندىرىسىن ارنايى باعدارلامانىڭ كومەگىمەن باستان-اياق باقىلايمىن. باستى مىندەتىم – كولىك وندىرىسىندەگى ساپانى باقىلاۋ. مۇنىڭ سىرتىندا, ءار جىلى شىققان اۆتوكولىكتەردىڭ ارىپتەرى دە اۋىسىپ وتىرادى. سونىڭ ءبارىن الدىن الا قاداعالاۋ كەرەك. مىسالى, دانەكەرلەۋ تسەحىنان شىققان اۆتوكولىك شاناعىنا پين-كود سالامىز. ودان كەيىن اۆتوكولىك بوياۋ تسەحىنا, كەيىن ۇساق توراپتى قۇراستىرۋ تسەحىنا كىرەدى. ءبىز ءوندىرىس ۇدەرىسىندە قانداي دا ءبىر قاتەلىك كەتىپ قالماۋ ءۇشىن ولاردىڭ پورت نومىرلەرىن, بارلىق مالىمەتتى الدىن الا اۋىستىرىپ, جاڭالاپ وتىرامىز. ءوزىم باسقاراتىن «اقىلدى» قۇرىلعىنىڭ ءتىلىن تولىق يگەرىپ الدىم. بىراق مۇنىمەن جۇمىس ىستەۋ ءۇشىن كۇن سايىن ءبىلىم جەتىلدىرىپ وتىرۋ قاجەت. ويتكەنى مۇندا سان الۋان جۇيەمەن جۇمىس ىستەۋگە تۋرا كەلەدى. ءاى سالاسىنان حاباردار بولۋىڭ شارت. وتكەن جىلدان بەرى 3 مىڭنان اسا «Chevrolet Onix» اۆتوكولىگىن شىعاردىق. سول ءۇش مىڭ كولىكتىڭ تەحنيكالىق ساپاسى, دانەكەرلەنۋى, بويالۋى – ءبارى-ءبارى ءبىزدىڭ باقىلاۋىمىزدان ءوتتى», دەيدى جاس مامان.
«الليۋر» «Chevrolet Onix» ءوندىرىسىن 2024 جىلى ىسكە قوسقان. جوبا اياسىندا قاراستىرىلعان ينۆەستيتسيا كولەمى – شامامەن 33,7 ملرد تەڭگە.
اۆتوزاۋىت بۇگىندە «Allur Campus» اتتى زاماناۋي تۇرعىن ءۇي كەشەنىن سالىپ جاتىر. جالپى اۋدانى 13,5 مىڭ شارشى مەتردەن اساتىن 9 قاباتتى كىرپىش ۇيدە جاس وتباسىلار تۇراتىن 71, ستۋدەنتتەر تۇراتىن 60 جانە قوناقتارعا ارنالعان 20 بولمە بار. كامپۋس اۋماعىندا مەديتسينالىق پۋنكت, كىتاپحانا, كومپيۋتەر سىنىبى, جاتتىعۋ زالى, كىر جۋاتىن بولمە جۇمىس ىستەيتىن بولادى. «الليۋر» كومپانياسىنىڭ جەكە قاراجاتىنا سالىنىپ جاتقان كامپۋس تاياۋ كۇندەرى پايدالانۋعا بەرىلەدى دەپ جوسپارلانىپ وتىر.
الداعى ۋاقىتتا اۆتوزاۋىت باسشىلىعى «Allur Campus» اۋماعىن كەڭەيتىپ, 260 ورىندىق بالاباقشا, فۋتبول, باسكەتبول الاڭدارىن, جۇگىرۋ جولدارىن, «workout» ايماعى مەن ۇستەل تەننيسىنە ارنالعان الاڭقايلار سالۋدى جوسپارلاپ وتىر.
قوستاناي وبلىسى
