الايدا ەم-شارا ەشبىر ناتيجە بەرمەگەن سوڭ وپەراتسيا جاساتۋعا №1 قالالىق كلينيكالىق اۋرۋحاناسىنا جۇگىنگەن. دارىگەرلەر ناۋقاسقا قايتادان تولىق دياگنوستيكالىق تەكسەرۋ جۇرگىزىپ, وپەراتسياعا دايىندادى. ءسويتىپ, ەكى ساعاتتان اسا ۋاقىتقا سوزىلعان وپەراتسيا بارىسىندا كولەمى 10-11 سانتيمەترلىك ىسىك الىنىپ تاستالدى. لاپاروسكوپيالىق ءادىستىڭ ءبىر ەرەكشەلىگى وپەراتسيا تىلىكسىز ورىندالادى. سونىڭ ارقاسىندا ناۋقاس تەز وڭالىپ كەتەدى. ءارى تىلىكسىز وپەراتسيا كوسمەتيكالىق تۇرعىدان دا ءتيىمدى.
ۇيقى بەزىنىڭ قاتەرلى ىسىگى – ەڭ اگرەسسيۆتى ءارى ەمدەۋى قيىن اۋرۋ ءتۇرى. ونىڭ العاشقى بەلگىلەرى ىسىك ايتارلىقتاي ۇلكەيگەندە نەمەسە باسقا اعزاعا تارالعاندا عانا بايقالادى. نەگىزگى سيمپتومدارى ءىشتىڭ جوعارعى بولىگىندە نەمەسە ارقادا اۋىرسىنۋ سەزىلەدى, تابەتسىزدىك پايدا بولادى, جۇرەك اينىپ, سالماق كۇرت تومەندەيدى. سونداي-اق كەيبىر جاعدايدا ناۋقاس قانت ديابەتىنە ۇشىراۋى مۇمكىن. وسىعان دەيىن ۇيقى بەزىنە لاپاروسكوپيالىق وپەراتسيا سىزعانوۆ اتىنداعى ۇلتتىق عىلىمي حيرۋرگيا ورتالىعىندا عانا جاسالىپ كەلدى. ەندى مۇنداي وپەراتسيانى شىمكەنتتىك دارىگەرلەر دە مەڭگەردى.
№1 قالالىق كلينيكالىق اۋرۋحاناسى ءبىرىنشى حيرۋرگيالىق ءبولىمىنىڭ مەڭگەرۋشىسى داۋرەن قابىلوۆ جالپى جوعارىدا اتالعان اۋرۋ بەلگىلەرى ناۋقاستا بايقالعانىمەن, ونداعى ىسىك قاتەرلى ەمەس ەكەنىن گيستولوگيالىق زەرتتەۋ انىقتايتىنىن ايتتى.
«ناۋقاستىڭ جاسى 21-دە. بيىل عانا وقۋ ءبىتىرىپ, جۇمىسقا ەندى تۇرعان ەكەن. جاسىنىڭ ەرەكشەلىگىن ەسكەرىپ ءارى بولاشاق انا رەتىندە دەنساۋلىعىن ساقتاپ قالۋ ماقساتىندا لاپاروسكوپيالىق ادىسپەن وپەراتسيا جاساۋدى ۇيعاردىق. ناۋقاس ەكى كۇن تەكسەرىلىپ, وپەراتسيادان كەيىن بەس كۇننەن سوڭ ۇيىنە قايتارىلدى. تىلىكسىز وپەراتسيانىڭ ەرەكشەلىگى سول, پاتسيەنت تەز وڭالىپ كەتەدى. ءتىپتى وپەراتسيا بىتكەن سوڭ ەكى ساعاتتان كەيىن اياعىنا تۇرىپ جۇرسە بولادى. وپەراتسيا بارىسىندا الىنعان ءتۇزىلىم گيستولوگيالىق زەرتتەۋگە جىبەرىلىپ, قازىر انىقتالىپ جاتىر. ناقتى دياگنوزعا قاراي ەمدىك شاراسى تاعايىندالادى. ۇيقى بەزى مەن كوك باۋىر ءبىر-بىرىنە جاقىن جاتقان ورگان. ەكەۋى ءبىر-بىرىمەن تىعىز بايلانىستا بولعاندىقتان, اشىق وپەراتسيا كەزىندە ۇيقى بەزىنىڭ ءبىر بولىگىمەن قوسا كوك باۋىر دا الىپ تاستالادى. ال تىلىكسىز وپەراتسيادا كوك باۋىردى امان ساقتاپ قالۋعا بولادى. كەشەگى جاعدايدا ناۋقاستىڭ كوك باۋىرى ساۋ كۇيىندە قالدى. سول تۇرعىدا ماماندارىمىزدىڭ اۋىر وپەراتسيالاردى جاڭاشا ادىسپەن جاساپ جاتقانى ۇلكەن جەتىستىك. مەن ءوزىم حيرۋرگ-ونكولوگپىن. مامان رەتىندە ايتارىم, قازىر ىسىك اۋرۋلارىنىڭ بۇرىنعى كەزبەن سالىستىرعاندا ءبىرشاما وسكەنى بايقالادى. اسىرەسە جاستار اراسىندا ونكولوگيالىق دەرتكە ۇشىراپ جاتقاندار از ەمەس. وسىنىڭ ءبارى, مەنىڭ پىكىرىمشە, دۇرىس تاماقتانباۋدان بولادى. بۇگىندە جاستار كوشەنىڭ جىلدام ازىرلەنەتىن تاعامىنا اۋەس. ونىڭ ءدامى ەرەكشە, قارىندى تەز تويدىرعانىمەن, ونى دايىندايتىن مايدىڭ ادام اعزاسىنا زيانى وراسان. قولىمىزدان تاستامايتىن تەلەفون مەن نوۋتبۋكتەر دە ءوز بويىنان زياندى ساۋلە شاشاتىنىن ۇمىتپاۋ كەرەك. سوندىقتان ادامدار, ونىڭ ىشىندە اسىرەسە جاستار سالاماتتى ءومىر سالتىن ۇستانىپ, بوس ۋاقىتىندا سمارتفونعا تەلمىرمەي, تازا اۋادا كوبىرەك سەرۋەندەسە, اعزاعا پايدالى تاعامدار تۇتىنسا دەگەن كەڭەس بەرەمىن. ادامنىڭ دەنساۋلىعىنىڭ مىقتى بولۋى ەكولوگيا, قورشاعان ورتانىڭ اسەرى بار دەگەنىمەن تىكەلەي وزىنە بايلانىستى», دەدى د.قابىلوۆ.
دارىگەردىڭ ايتۋىنشا, بۇگىندە كلينيكالىق اۋرۋحانادا كوپ وپەراتسيالار لاپاروسكوپيالىق ادىسپەن جاسالادى. بۇل ءتاسىلدى مەڭگەرگەنشە, حيرۋرگ ماماندار كوپ ەڭبەك ەتتى. شەتەلگە شىعىپ تاجىريبە جينادى. ەلىمىزگە كەلگەن شەتەلدىك مامانداردان ۇيرەندى. ايتالىق, اۋرۋحانا حيرۋرگتەرى رەسەي, بەلورۋس, تۇركيا ەلدەرىندە وقۋ-تاجىريبەلىك تاعىلىمدامادان ءوتىپ قايتتى. جۋىردا ليتۆاعا بارىپ, كەۋدە حيرۋرگياسى جونىندە ارنايى كۋرستان وتەدى. وسىنداي شەبەرلىك پەن بىلىكتىلىكتىڭ ناتيجەسىندە بۇگىندە كلينيكالىق اۋرۋحاناعا شىمكەنتتىڭ وزىنەن عانا ەمەس, پورتال ارقىلى ەلىمىزدىڭ بارلىق وڭىرىنەن ەمدەلۋگە كەلىپ جاتقاندار كوپ. ءتىپتى ءۇندىستان, تۇركيا سەكىلدى ەلدەردە وپەراتسيا جاساتىپ, ودان قايران بولماعان سوڭ قالالىق كلينيكادا قايتادان وپەراتسياعا جاتىپ, قۇلان-تازا ايىعىپ كەتىپ جاتقاندار جەتەدى.
حيرۋرگيا ءبولىمىنىڭ مەڭگەرۋشىسى د.قابىلوۆتىڭ مالىمدەۋىنشە, كەيىنگى جىلدارى مەگاپوليس مەديتسيناسى دامىپ كەلەدى. سونىڭ ىشىندە №1 قالالىق كلينيكا ۇلكەن جاڭعىرتۋدى باستان وتكەردى. وپەراتسيا بولىمدەرى سوڭعى ۇلگىدەگى قۇرالدارمەن جابدىقتالىپ, زاماناۋي مەديتسينالىق اپپاراتتار مەن قوندىرعىلار ورناتىلدى. وپەراتسيانىڭ ەڭ كۇردەلى تۇرلەرى جاسالا باستادى. وسىنىڭ وزىنەن شاھاردىڭ مەديتسينا سالاسى قانشالىقتى العا قاراي قادام باسقانىن بىلۋگە بولادى. جالپى, بۇل تەك ءبىر قالانىڭ ەمەس, تۇتاس ەل مەديتسيناسىنىڭ جەتكەن جەتىستىگى.
«مەن شەتەلدە كوپ بولامىن. راس, ول جاقتاعى كلينيكالاردا سوڭعى ۇلگىدەگى زاماناۋي قوندىرعىلار بار. نەبىر ءتۇرلى اپپاراتتار تاڭداي قاقتىرادى. الايدا ماماندارىنىڭ تاجىريبەسى مەن بىلىكتىلىگى ءبىزدىڭ حيرۋرگتەردەن سونشالىقتى اسىپ كەتكەن دەپ ايتا المايمىن. كەرىسىنشە, ءبىزدىڭ دارىگەرلەردىڭ ءبىلىمى مەن شەبەرلىگى ولاردان ءبىر ساتى جوعارى تۇراتىن سەكىلدى. ونىڭ ءبىر دالەلى حيرۋرگيا سالاسىندا قانداي كۇردەلى وپەراتسيا بار, سونىڭ ءبارىن ءبىزدىڭ ماماندار شەتىنەن يگەرىپ كەلەدى. وپەراتسيا جاساۋدىڭ ءتيىمدى ءادىسى سانالاتىن لاپاروسكوپيانى وپەراتسيانىڭ بارلىق تۇرىنە قولدانىپ جاتىر. سونىڭ ءبىرى – كەشەگى ۇيقى بەزىنىڭ ىسىگىن الىپ تاستاۋ وپەراتسياسى. ۇيقى بەزى ادام اعزاسىنداعى ەڭ نازىك ورگان. قيىندىقتارعا قاراماستان, جەرگىلىكتى حيرۋرگتەر پاتسيەنتتەردى الىسقا جىبەرمەي, بارلىق ەم-دومدى ءوز قالامىزدا جاساۋعا تىرىسىپ جاتىر», دەدى د.قابىلوۆ.
