– ءتۋريزمدى دامىتۋ – مەملەكەتتىڭ باسىم باعىتتارىنىڭ ءبىرى. ءتۋريزمدى قولداۋ, قولايلى ينۆەستيتسيالىق احۋال قالىپتاستىرۋ, بيزنەسكە جاڭا مۇمكىندىكتەر اشۋ باعىتىندا مەملەكەت ناقتى شارالار قابىلداپ جاتىر. بيىل ماڭعىستاۋ وبلىسىن دامىتۋدىڭ 2025–2029 جىلدارعا ارنالعان كەشەندى جوسپارى بەكىتىلدى. قۇجات اياسىندا جالپى قۇنى 401 ملرد تەڭگەنى قۇرايتىن 100-دەن استام ءىس-شارا قاراستىرىلعان. فورۋم ءوڭىردىڭ جاڭا مۇمكىندىكتەرىن اشاتىن ماڭىزدى قادام بولماق, – دەدى تۋريزم جانە سپورت ءمينيسترى ەربول مىرزابوسىنوۆ.
ءىس-شارانىڭ ماڭعىستاۋ وڭىرىندە ءوتۋى بەكەر ەمەس, ويتكەنى ماڭعىستاۋ – بولاشاعى تۋريزم سالاسىمەن تىكەلەي بايلانىستى سانالاتىن, قازىردە وسى باعىتتا جاقسى باستامالاردىڭ قازىعى قاعىلىپ, ۇيىمداستىرۋ جۇمىستارى قولعا الىنىپ جاتقان ءوڭىر. تۋريزم جانە سپورت مينيسترلىگى ازىرلەپ, ۇكىمەت قاۋلىسىمەن قابىلدانعان 2025–2029 جىلدارعا ارنالعان كەشەندى جوسپار ءوڭىردى 9 باعىتتا جۇيەلى دامىتۋدى قامتيدى. تۋريستەر تارتۋعا جان-جاقتى جاعداي جاساپ, ءوڭىردىڭ ودان ءارى دامۋىنا قولايلى ينۆەستيتسيالىق احۋال قالىپتاستىرۋعا مۇمكىندىك بەرەدى. ماڭعىستاۋ وبلىسىنىڭ اكىمى نۇرداۋلەت قيلىباي ءوڭىردىڭ تۋريستىك سالاسىن دامىتۋعا توقتالا كەلىپ, ينفراقۇرىلىمدىق جوبالاردىڭ قالىپتى ىسكە اسىرىلىپ جاتقانىن مالىمدەدى.
– ماڭعىستاۋ – مۇناي مەن گاز عانا ەمەس, سونداي-اق قايتالانباس تابيعي, مادەني مۇراسى مول, ەرەكشە ءوڭىر. پرەزيدەنت تاپسىرماسىنا سايكەس وبلىستى ءتۋريزمدى دامىتۋ باعىتىندا جۇيەلى جۇمىس اتقارىلىپ, تۋريستەر مەن ينۆەستورلارعا تارتىمدى ورتالىققا اينالدىرۋعا قولايلى جاعداي جاسالىپ جاتىر. ماقسات – حالقىمىزدىڭ ۇلتتىق داستۇرلەرىن ساقتاي وتىرىپ, ماڭعىستاۋدا تۋريزم سالاسىن بارىنشا دامىتۋ كەرەك, – دەگەن ايماق باسشىسى ماڭعىستاۋ ءوڭىرىنىڭ ەلىمىزدىڭ تۋريستىك كارتاسىندا ايرىقشا ورىنعا يە ەكەندىگىن, كاسپي تەڭىزىنىڭ جاعالاۋى, بوزجىرا مەن قىزىلكۇپ شاتقالىنىڭ قايتالانباس لاندشافتتارى, باي تاريحي-مادەني مۇراسى ايماقتى ورتالىق ازياداعى ەڭ الەۋەتتى تۋريستىك باعىتتاردىڭ بىرىنە اينالدىراتىندىعىن اتاپ ءوتتى.
تۋريزم سالاسىنداعى مەملەكەتتىك سەكتور مەن حالىقارالىق ۇيىمداردىڭ, كاسىپكەرلەردىڭ ورتاق الاڭىنا اينالعان فورۋمدا قاتىسۋشىلار ينۆەستيتسيا تارتۋ جولدارى, ينفراقۇرىلىمدى دامىتۋ, تۋريستىك قىزمەتتەردىڭ قولجەتىمدىلىگى, ىشكى اۋە قاتىناسىن دامىتۋ ماسەلەلەرى تۋرالى كەڭەستى.
ماڭعىستاۋ ورتالىق ازياداعى تۋريزم حابىنا اينالىپ كەلەدى. مىسالى, وڭىرگە تارتىلىپ جاتقان ءىرى ينۆەستيتسيالىق جوبالاردىڭ قاتارىندا «PANA» كومپانياسىنىڭ قۇنى 8,5 ملن دوللار «Sandyq» ەتنو-مەيرامحاناسى مەن اشىلۋى 2026 جىلعا جوسپارلانعان «Tary» ەتنو-كوفەحاناسى بار. فورۋم اياسىندا ينۆەستورلارعا 15 جىلعا دەيىنگى جەڭىلدەتىلگەن نەسيەلەر, 1:3 اراقاتىناسىمەن بىرلەسىپ قارجىلاندىرۋ سىندى جاڭا مۇمكىندىكتەر ۇسىنىلدى. Wellness, تۇراقتى تۋريزم تاقىرىپتارى تالقىلانعان «قىزمەت پەن قاۋىپسىزدىك» سەسسياسىندا قىتايلىق «Zowoyoo Technology» كومپانياسى ەلىمىزدى قىتاي نارىعىندا دامىتۋ ستراتەگياسىن تانىستىرسا, «تۋريستىك قامقور» جۇيەسى وتاندىق تۋريستەردىڭ شەتەلدەگى قاۋىپسىزدىگىن قامتاماسىز ەتۋ ماسەلەسىن ۇسىندى. ۇلتتىق ستاتيستيكا بيۋروسى ىشكى ءتۋريزمدى باعالاۋ ادىستەمەسى جونىندەگى جاڭا جوباسىن تانىستىردى.
فورۋمدا ەلىمىزدىڭ MICE-يندۋسترياداعى ورنى تالقىلاندى. سپيكەرلەردىڭ ايتۋىنشا, قازىردە ەلىمىز 87 ەلگە ۆيزاسىز رەجىم ۇسىنىپ وتىر, جاڭا تەرمينالدار اشىلدى, 45 كونگرەسس-قوناقۇي ىسكە قوسىلدى. 2024 جىلى ەلىمىزدە 14 حالىقارالىق ءىس-شارا وتكىزىلىپ, شامامەن 14 ميلليون دوللار كولەمىندە ەكونوميكالىق پايدا اكەلدى.
فورۋم بارىسىندا ماڭعىستاۋ وبلىسىنىڭ اكىمدىگى مەن «بايتەرەك» ۇلتتىق باسقارۋشى حولدينگى» اق ماڭعىستاۋداعى بيزنەستى قولداۋ مەن ءتۋريزمدى دامىتۋعا باعىتتالعان ىنتىماقتاستىق مەموراندۋمىنا قول قويدى. ەكىنشى دەڭگەيلى بانكتەر ارقىلى جۇزەگە اساتىن ەكىجاقتى كەلىسىم اياسىندا شاعىن جانە ورتا كاسىپكەرلىكتى قارجىلاندىرۋدىڭ جاڭا مۇمكىندىكتەرى قاراستىرىلعان.
– ماڭعىستاۋ وبلىسىندا بيزنەستىڭ دامۋ الەۋەتى زور. مەموراندۋم كاسىپكەرلەرگە قاجەتتى قاراجاتقا قول جەتكىزۋگە, ءوندىرىستى كەڭەيتۋگە, جاڭا جۇمىس ورىندارىن اشۋعا مۇمكىندىك بەرەدى. «بايتەرەك» ءوڭىر ءتۋريزمىن دامىتۋدا سەنىمدى ارىپتەس بولۋعا دايىن. حولدينگ پەن وبلىس اكىمدىگىنىڭ سەرىكتەستىگى ماڭعىستاۋدىڭ تۋريستىك تارتىمدىلىعىن ارتتىرىپ, جاڭا جوبالاردىڭ جۇزەگە اسۋىنا جول اشادى, – دەدى «بايتەرەك» ۇلتتىق باسقارۋشى حولدينگى» اق باسقارما توراعاسىنىڭ ورىنباسارى جاندوس شايحى.
تۋريزم جانە سپورت مينيسترلىگى 2025–2028 جىلدارعا ارنالعان كۋرورتتى وڭىرلەردى دامىتۋ جونىندەگى جول كارتاسىنىڭ جوباسىن ازىرلەدى. 141 ءىس-شارا ەنگىزىلگەن جوبانى جۇزەگە اسىرۋ رەسپۋبليكالىق, جەرگىلىكتى بيۋدجەتتەردەن, جەكە ينۆەستيتسيا ەسەبىنەن قارجىلاندىرىلادى. ە.مىرزابوسىنوۆ بيىل 1 قاراشاعا دەيىن وڭىرلەرگە قاتىستى ينفراقۇرىلىمدىق قاجەتتىلىك كارتاسىن دايىنداۋدى اياقتاپ, اكىمدىكتەر دەڭگەيىندە ءىس-قيمىل جوسپارلارىن بەكىتۋدى, كەيبىر وڭىرلەردە ءالى اياقتالماعان تۋريستىك مارشرۋتتاردى اباتتاندىرۋ, باس جوسپارلاردى تسيفرلاندىرۋ جۇمىستارىن جانداندىرۋدى, حالىقارالىق تۋريزم جانە مەيماندوستىق ۋنيۆەرسيتەتىمەن بىرلەسىپ, جىل سوڭىنا دەيىن سالاداعى كادر تاپشىلىعىنا تالداۋ جۇرگىزۋدى, 1 جەلتوقسانعا دەيىن 2026 جىلعا ارنالعان ءىرى تاقىرىپتىق ءىس-شارالار كۇنتىزبەسىن دايىنداۋدى, ونىڭ ىشىندە كەم دەگەندە ءبىر اۋقىمدى تۋريستىك ءىس-شارا جوسپارلاۋدى تاپسىردى.
ماڭعىستاۋ وبلىسى
